ကောင်မလေး အတွက် ၈

ကောင်မလေးရေ..

အပြင်မှာ တစ်ခါမှ မနီးစပ်ဖူးပေမယ့်

ဓာတ်ပုံထဲက နင့်အပြုံးချိုချိုတွေ

ငါ့နှလုံးသားထဲ တံဆိပ်နှိပ်ပြီးသား။

ကောင်မလေးရေ..

ဖုန်းထဲက နင့်ရယ်သံ ချိုချို

မကြားရသေးတဲ့အခါ

ငါ့ရဲ့ နေ့တွေ ခြောက်ကပ် တိတ်ဆိတ်လို့ ။

နင့်ရဲ့ Good Night သံ မကြားမချင်း

ငါ့ရဲ့ ညတွေ ကြေကွဲ ထိရှ လို့ ။

ကောင်မလေးရေ..

သာသာယာယာ ပတ်ဝန်းကျင်မှာ

နင် အေးအေးသက်သာ နေနေတဲ့ နေ့ တွေ

ငါ့မှာတော့ ဝမ်းစာရှာဖို့ 

ဘဝက ခက်ခဲ ကြမ်းတမ်း လို့ ။

နင်နဲ့ ငါ့ရဲ့ 

တစ်ခုတည်းသော အဆက်အသွယ်

နင့် ဖုန်းနံပါတ်လေး ပျောက်ကွယ်သွားမှာ

ငါ အသေအကြေ စိုးရိမ်လို့ ။

တစ်ခါမှ စိတ်မကောက်..

တစ်ခါမှ စိတ်မဆိုး..

တစ်ခါမှ ဖုန်းပိတ်မထားဖူး တဲ့

ငါ့ နတ်သမီးလေးကို

တစ်ခါတစ်လေတော့ သနားမိသေးတယ်

အချစ်ကလွဲလို့ ဘာမှ မပေးနိုင်တဲ့

ငါလိုလူနဲ့ ချစ်သူ ဖြစ်သွားခဲ့ရတဲ့ အတွက်။

ကောင်မလေးရေ

လက်လွှတ်ပေးလိုက်ချင်ပေမယ့်

ငါ့ဘဝရဲ့ တစ်ဦးတည်းသော 

နင်သာ မရှိတော့ရင်

ငါ့ နေ့ တွေ ညတွေ 

အသက်မဲ့သွားတော့မယ့် အရေးမို့ 

ငါ အတ္တကြီးပါရစေ

ကောင်မလေးရေ...။

သိင်္ဂါကျော်

22.12.2017

11:35 AM