အိန္ဒိယ ၂

ပြီးခဲ့တဲ့ စနေနေ့ကတော့ Chandigarh မြို့ရဲ့ အထင်ကရ နေရာတွေကို Tour Bus နဲ့ သွားခဲ့ပါတယ်။ Half Day Tour အတွက်ကို Rs 50 ပဲ ပေးရပါတယ်။ မနက် ၁၀ နာရီကနေ ၁ နာရီ ခွဲထိ တစ်ခါ၊ ညနေ ၂ နာရီခွဲ ကနေ ၆ နာရီအထိက တစ်ခါ... တစ်နေ့ နှစ်ခါ ရှိပါတယ်။ ကိုယ်တို့ကတော့ ၂ နာရီခွဲ ကစတဲ့ Half Day Tour နဲ့ပဲ သွားခဲ့ပါတယ်။

ပထမဆုံး Museum & Art Gallery ကို ပို့ပါတယ်။ ပြတိုက်ရဲ့ အပြင်ဘန်းကတော့ အတော်ကို အိုဟောင်းနေတဲ့ တိုက်ကြီးတစ်တိုက်ပါ။ အပြင်ဘက် အဆောက်အအုံကို မပြင်တာ အတော်ကြာနေတဲ့ပုံပါပဲ။

အိန္ဒိယ နိုင်ငံက ယဉ်ကျေးမှုအစဉ်အလာ ကြီးမားတဲ့ နိုင်ငံပီပီ ဒီလို မြို့ငယ်လေးက ပြတိုက်မှာကိုပဲ ရှေးဟောင်း အနုပညာ လက်ရာများစွာကို ပြသထားတာ တွေ့ရပါတယ်။ အချိန်က နာရီဝက်ပဲ ရလို့ အညွှန်းစာတွေကိုတော့ သေချာမဖတ်ခဲ့ရလို့ ဘယ်ခေတ်က လက်ရာတွေ ဆိုတာတော့ မပြောနိုင်ပါဘူး။

Museum အပြင်ဘက်မှာ ပြထားတဲ့ ရှေးဟောင်း ရုပ်ထုတွေပါ။

ပြတိုက်ထဲကို ဝင်ဖို့ တစ်ယောက်ကို Rs. 10 နဲ့ ကင်မရာ အတွက် Rs. 5 ပေးရပါတယ်။ အတွင်းမှာ ရှေးဟောင်းလက်ရာ ရုပ်ထုများအပြင် ပန်းချီကားများ ကိုလည်း ပြသထားပါတယ်။

မှန်အိမ်ထဲက အရာတွေကို ရိုက်ရင် ကိုယ့်ကင်မရာက အလင်းပြန်ပြီး သိပ်အဆင်မပြေလို့ တစ်ချို့ပုံတွေက သိပ်မကောင်းပဲ ဖြစ်နေပါတယ်။

အိန္ဒိယ ရှေးဟောင်း ဒင်္ဂါးများလည်း ပြသထားပါတယ်။

ဗုဒ္ဓဘုရားရှင်ရဲ့ ပုံတော်လို့ ထင်ရတဲ့ ရုပ်ထုတော်တွေလည်း တွေ့ရပါတယ်။ ဘယ်ခေတ်က လက်ရာတွေလည်းတော့ မသိပေမယ့် အားလုံးကတော့ ကျိုးပဲ့ပျက်စီး နေပါတယ်။

 

အတွင်းဘက်မှာ ထပ်တွေ့ရတဲ့ ပန်းချီကားတွေပါ။

 

မြေအိုး နဲ့ ကြွေအိုးတွေလည်း ပြသထားပါသေးတယ်။

ပြတိုက်က ထွက်ပြီးတော့ နောက်တစ်နေရာက Bougainvillea Garden ဆိုတဲ့ ပန်းခြံငယ်လေးပါ။

ထူးထူးဆန်းဆန်း လှလှပပ ပန်းပင်ရယ်လို့ ဘာမှ မရှိပေမယ့် အေးချမ်းတိတ်ဆိတ်ပြီး အပန်းဖြေလို့ ကောင်းမယ့် နေရာတစ်ခုပါ။ တိတ်ဆိတ်တဲ့ ပန်းခြံမို့ အတွဲတွေလည်း လာကြတာကို တွေ့ရပါတယ်။ အုပ်အုပ်ဆိုင်းဆိုင်း အပင်တွေနဲ့ မြက်ခင်းပြင် ကျယ်ကျယ်လွင့်လွင့်မို့ နတ်သမီး ပြောသလို မင်းသမီး၊ မင်းသား ကလို့ ကောင်းမယ့် နေရာတစ်ခုပါပဲ။

ဆက်ပါဦးမယ်..

သိင်္ဂါကျော်