တတိယအကြိမ်မြောက် ဇလွန်ဘုရားဖူး

ဇလွန်ကို ပထမဆုံး Graduate ဒုတိယနှစ်တုန်းက သွားခဲ့တာပါ။ သူငယ်ချင်းသုံးယောက် သွားခဲ့ကြတာ။ ဘုရားဖူးကားကတော့ သန်းဌေးနဲ့ရောင်းရင်းများ လား၊ စိန်ဝင်းနဲ့ရောင်းရင်းများလား မမှတ်မိတော့ဘူး။ အဲဒီတုန်းက ဗိုလ်မြတ်ထွန်းတံတားကြီး မဆောက်ရသေးလို့တစ်ဖက်ကမ်းကို ဇက်နဲ့ ကူးခဲ့ရပါတယ်။ မနက်လည်း အစောကြီး သွားရပါတယ်။

နောက်တစ်ခေါက်ကတော့ လွန်ခဲ့တဲ့ တစ်နှစ်ကျော်လောက်က သူငယ်ချင်းတစ်ချို့က မရောက်ဖူးသေးဖူး ဆိုတာနဲ့ ဇလွန်လိုင်းကားနဲ့သွားခဲ့ကြတာပါ။ အဲဒီတုန်းက ရာသီဥတုက နွေခေါင်ခေါင် မဟုတ်လို့ ဖုန်တွေတော့ သိပ်မလူးခဲ့ပါဘူး။

ဒီတစ်ခေါက်တော့ အိမ်က မိသားစုနဲ့ အတူသွားတာပါ။ သူတို့က တစ်ခါမှ မရောက်ဖူးသေးလို့ ရန်ကုန်ရောက်တုန်း သွားဖို့စီစဉ်လိုက်တာပါ။ ၂၁.၂.၂၀၀၉ ။ ရွှေအိုးစည် ဘုရားဖူးကားကို လမ်းထိပ်မှာ ထွက်စီးပြီးသွားကြတာပါ။ ဒီခရီးမှာတော့ ဓာတ်ပုံ တစ်ပုံမှ မရိုက်ခဲ့နိုင်ပါဘူး။ ကိုယ့် ကင်မရာ ပျောက်သွားလို့ပါ။ (ဘွဲ့ယူတဲ့နေ့မှာ ပျောက်သွားတာပါ၊ ဘွဲ့ယူအပြီး ဆရာမတွေနဲ့ ဓါတ်ပုံရိုက်ဖို့လုပ်ကြတော့ သိဂီရွှေရည်က ဓါတ်ပုံဆရာတွေက ခြေရှုပ်နေလို့ သူတို့နဲ့ပဲ ရိုက်လိုက်ရတယ်။ ဓါတ်ပုံဖိုးတွေလည်း ပိုတောင်းသွားကြတယ်။ ကိုယ့် ကင်မရာကို လက်ထဲမှာ ကိုင်ထားရာက ပြန်အထွက်မှာ ခဏချမိခဲ့တာ... ပြန်သွားရှာတော့ မတွေ့တော့ပါဘူး။ မနက်က ရိုက်ခဲ့တဲ့ ဓါတ်ပုံတွေ ပါသွားလို့ အရမ်းနှမြောတာ...။)

ဓနုဖြူ ကျိုက်ကလွန်ဗွန်း ဘုရားက မြွေကြီး ၂၆ ကောင်ကို လည်း ဓါတ်ပုံ မရိုက်ခဲ့ရပါဘူး။ အဲဒီ မြွေကြီးတွေက ဘုရားဂေါပက လူကြီးတစ်ယောက်ကို အိပ်မက်ပေးပြီး လာခဲ့တာပါတဲ့။ ၃၃ ကောင် ပြည့်အောင်လာမယ်လို့ ပြောခဲ့ပြီး တစ်ကောင်စ နှစ်ကောင်စ တစ်ဖြည်းဖြည်း လာခဲ့တာ ၂၇ ကောင် တိတိ ရောက်လာခဲ့ပါတယ်တဲ့။ ၃၃ ကောင် တော့ မပြည့်ခဲ့ပါဘူး။ ၂၇ ကောင်မှာ တစ်ကောင်က သေသွားခဲ့ပါတယ် တဲ့။

ပြည်တော်ပြန် ရုပ်ရှင်တော်မြတ်ကြီးကိုတော့ ဘယ်နှစ်ကြိမ်ပဲဖူးဖူး အရမ်းကို ကြည်နူးရပါတယ်။

လမ်းတစ်လျှောက် မှာတော့ ဖုန်တွေကတော့ ထပ်ထပ်ကြမ်း နေတာပါပဲ။ အရင်တစ်ခါလို လိုင်းကားနဲ့ဆိုရင်တော့ မလွယ်ပါဘူး။ အခု မှန်လုံကားနဲ့မို့လို့ပဲ တော်ပါတော့တယ်။
ကင်မရာ ပြန်ဝယ်ပြီးရင် တစ်ခေါက်ထပ်လာဦးမယ်လို့ ဆုတောင်းခဲ့ပါတယ်။