31 May, 2012

တစ်ရံတစ်ခါဆီက မြို့


ရွှေအဆင်းဝင်းလက်
သမိုင်းအဆက်ဆက်က စေတီတော်တွေ…
အုတ်ရိုးရောင်မပျက် ရှေးအဆက်ဆက်ရဲ့
ကောင်းမှု လက်ရာ စေတီတော်တွေ…
အရှေ့ဘက်က ရောင်နီအောက်မှာ
တင့်တယ်နေတဲ့မြို့ ။

ခပ်လှမ်းလှမ်း
အစိမ်းရောင် လယ်ကွင်းတွေဆီက
စပါးသင်းနံ ရလာမယ့် အချိန်ကို
မျှော်လင့်နေတတ်တဲ့မြို့ ။

ညမွှေးပန်းရနံ့တွေ ဆောင်ယူလာတတ်တဲ့
ညလေ အေးအေးနဲ့  အတူ
လရောင်ဆမ်းတဲ့ သစ်ပင်တန်းတွေအောက်
ဂစ်တာသံတွေ လွင့်လာတာကို
သာယာတတ်တဲ့ မြို့ ။

ခေတ်အဆက်ဆက်မှာ
အနာတရတွေလည်း ရဖူးပါရဲ့ ၊
ခုတော့လည်း
လေးထောင့်စပ်စပ် မီးခံတိုက်တွေ နေရာမှာ
အထပ်မြင့် အသစ်တွေ တိုးပွားလား တိုးပွားရဲ့ ၊
အခြေအနေမဲ့တွေကတော့ အရင်လိုပါပဲ။
ရှေးတစ်ခေတ် ဘုရင်လို
တတိယမျက်လုံး မပိုင်ဆိုင်ပေမယ့်လည်း
ကိုယ်အားကိုယ်ကိုးတတ်ဖို့  ကြိုးစားနေတဲ့မြို့ ။

ဧရာဝတီရဲ့ ပွေ့ဖက်မှုထဲ
ဒဏ်ရာတွေကို ဖြေချတတ်ခဲ့တဲ့
မြေလတ်သူ မြေလတ်သားတွေရဲ့
ချစ်မြတ်နိုးခံ မြို့ ။

ဘယ်တော့မှ ကမ်းမကပ်တဲ့ သင်္ဘောတွေကို
လက်ပြနှုတ်ဆက်ရင်း
အနောက်ဘက်ကမ်း တောင်တန်းတွေဆီက
တေးသံကို နားစွင့်ရင်း
တံတားပေါ် ဖြန့်ခင်းထားတဲ့
လိမ္မော်ရောင် ဆည်းဆာကိုခံစားတတ်တဲ့ မြို့ ၊
စုန်ချီ ဆန်ချီ ဝင်ထွက်သွားလာသူတွေကို ကြိုဆိုရင်း
ဘယ်တော့မှ အိုမင်းခြင်း မရှိတဲ့မြို့ ။

အဲဒီမြို့ကို
ငါချစ်တယ်…။

သိင်္ဂါကျော်

29 May, 2012

သူ့စိတ်က ကိုယ့်ဆီ မရှိတော့တဲ့ အခါ

ူ့စိတ်က ကိုယ့်ဆီ မရှိတော့တဲ့ အခါ
နှုတ်ဆက်စကားတွေက
ဝတ်ကျေတန်းကျေ ပုံစံနဲ့ လာတယ်၊
မတွေ့ဖြစ်ဖို့အတွက်
အကြောင်းပြချက်တွေက များလာတယ်။

သူ့စိတ်က ကိုယ့်ဆီ မရှိတော့တဲ့ အခါ
ချိုသာတဲ့ စကားတွေက 
နားခါးစရာတွေ ဖြစ်လာတယ်၊
ချစ်ခင်ဖူးတဲ့ အမူအယာတွေက
အပြစ်မြင်စရာတွေ ဖြစ်လာတယ်။

သူ့စိတ်က ကိုယ့်ဆီ မရှိတော့တဲ့ အခါ
ရင်ဘတ်ချင်း မတိုက်ဆိုင်မှုတွေက
များများ လာတယ်၊
ရင်ခုန်သံစည်းချက်သံစဉ်က
ခြားခြား လာတယ်။

သူ့စိတ်က ကိုယ့်ဆီ မရှိတော့တဲ့ အခါ
မျက်နှာချင်း ဆိုင်ရင်းကပဲ
တဖြည်းဖြည်း ဝေးကွာသလို ခံစားရ၊
ကြိုက်နေကြ သီချင်းတွေနဲ့
သာယာတဲ့ ပတ်ဝန်းကျင်တောင်
အေးစက်ကြမ်းရှ တစပြင်ဝင်ရိုးစွန်းလို ခံစားရ။

သူ့စိတ်က ကိုယ့်ဆီ မရှိတော့တာ သေချာလာတဲ့အခါ
အကြောင်းပြချက် မတောင်းခံပါ၊
အတင်းအကျပ်လည်း မချည်နှောင်ပါ၊
သွားလိုရာ သွားခွင့်ပေးပါ၏၊
ထပ်တူညီသော ချစ်ခြင်းများ ရှိသူသာ
ကိုယ့်ဆီလာပါ။

သိင်္ဂါကျော်

18 May, 2012

ရွံ့ပေတဲ့ ကလေးများ ပုံပြင်



တစ်ခါကပေါ့
ကလေးတစ်ချို့ ကစားကြ
ရွံ့အလူးလူးနဲ့ ကွင်းထဲ
ပြန်တက်လာတော့
အဖေ့ရှေ့မှာ တန်းစီရပ်
သူတို့ကိုယ်မှာ ညစ်ပေမနေသလိုမျိုးနဲ့။
ဒါပေမယ့်လည်း ကလေးတိုင်းသိကြ
တစ်ချို့တလေ မျက်နှာမှာ
ရွံတွေ ပေရေနေတာကိုပေါ့။

အဖေက ပြောတယ်
မျက်နှာပေါ်မှာ ရွံ့ပေနေတဲ့တစ်ယောက် ထွက်ခဲ့တဲ့
ဘယ်သူမှ ထွက်မလာပါ
ဘာကြောင့်ပါလဲ။
ကလေးတိုင်းက
မျက်နှာမှာ ရွံ့ပေနဲ့ တစ်ယောက်ယောက်
ထွက်သွားဖို့ကို စောင့်ကြ
ဘယ်သူမှ
သူကိုယ်တိုင်ရဲ့ မျက်နှာမှာ ရွံ့ပေနေတာတော့
မသိနိုင်ဘူးလေ။

Perfect Logician တွေပါ
လူမှန်ရင် အမှားမကင်းတာတော့
လူတိုင်းသိရဲ့၊
သူတစ်ပါးရဲ့ ပြစ်ချက်တိုင်းကို
အလွယ်တကူ ထောက်တတ်သူတွေလည်း ဖြစ်ရဲ့၊

ဒါပေမယ့်လေ
ကိုယ်တိုင်ရဲ့ အစွန်းအထင်းကိုတော့
ကိုယ်တိုင် ဆင်ခြင်ဖို့ ဘယ်တော့မှ အဆင်သင့်မဖြစ်သူ

သူလည်း လူ၊ ကိုယ်လည်း လူ။

သိင်္ဂါကျော်


Muddy children ဆိုတာ reasoning နဲ့ ပတ်သက်တဲ့ Logic puzzle လေးပါ။ 
http://en.wikibooks.org/wiki/Logic_for_Computer_Science/Reasoning

16 May, 2012

ကမ်းခြေအပန်းဖြေစခန်းက ခြောက်လှန့်မှု



အေနန်ဟာ ကျွန်တော်ရဲ့ အခင်ဆုံး သူငယ်ချင်း တစ်ယောက်ပါ။ ကျောင်းကတည်းက ခင်မင်လာကြတဲ့ သူငယ်ချင်းတွေထဲကမှ ခုချိန်ထိ အဆက်အသွယ် မပြတ်သေးတဲ့ သူငယ်ချင်း အနည်းငယ်ထဲ တစ်ယောက် အပါအဝင်ပေါ့။ ကျွန်တော်တို့ နှစ်ယောက်စလုံးဟာ သဘာဝအတိုင်းမဟုတ်တဲ့ ထူးခြားတဲ့ ကိစ္စတွေကိုလည်း စိတ်ဝင်စားတတ်ကြပါတယ်။ နှစ်ယောက်လုံးက အင်ဂျင်နီယာတွေ ဖြစ်နေပြီး အလုပ်လည်း များလှတော့ တစ်ယောက်နဲ့ တစ်ယောက် တွေ့ဖြစ်ကြဖို့  အခွင့်အလမ်း နည်းပြီးတော့ ဖုန်းထဲက မေးလ်ထဲကလောက်ပဲ တွေ့ဖြစ်ကြပါတယ်။

အခု ပြောမယ့် အဖြစ်အပျက်ကတော့ လွန်ခဲ့ နှစ်အနည်းငယ်က ကျွန်တော်တို့  မွမ်ဘိုင်းမှာ ရှိခဲ့စဉ် ဖြစ်ခဲ့တာပါ။ public holiday နဲ့ weekends ပေါင်းပြီး ငါးရက်ကျော်လောက် ပိတ်ရက် ရခဲ့ပါတယ်။ အလုပ်တွေများပြီး ခရီးမထွက် ဖြစ်တာလည်း ကြာခဲ့ပြီမို့  ဇနီးက ကမ်းခြေကို ခရီးထွက်ကြဖို့  အကြံပြုလာပါတယ်။ ကျွန်တော်လည်း အေနန်ကို ဖုန်းဆက်ပြီး အားမအား မေးတော့ သူနဲ့ သူ့ဇနီးကလည်း ချက်ချင်းပဲ သဘောတူတာနဲ့  သွားကြဖို့ ဆုံးဖြတ်ခဲ့ပါတယ်။

မွမ်ဘိုင်းနဲ့ ၁၈၀ ကီလိုမီတာ လောက်ဝေးပြီး ကားမောင်းသွားရင် ၃ နာရီအလောက် အကြာမှာ ရောက်နိုင်တဲ့ မူရတ်ဒ်က ကမ်းခြေ အပန်းဖြေစခန်းကို သွားကြဖို့ ဆုံးဖြတ်ခဲ့ပါတယ်။ အေနန်ရဲ့ ကားနဲ့  မနက် ၇နာရီလောက်မှာ စထွက်ခဲ့တော့ ၁၀နာရီလောက်မှာ အပန်းဖြေစခန်းကို ရောက်ပါတယ်။ အပန်းဖြေစခန်းက တကယ့်ကို လှပါတယ်။ မူရတ်ဒ် ကမ်းခြေနဲ့  အနီးဆုံး တောင်ခြေမှာ ဆောက်ထားတာပါ။ ရှေ့ဘက်မှာ ပင်လယ်ကို မြင်နေရပြီး နောက်ဘက်မှာကတော့ တောအုပ်တစ်ခု ရှိနေတာဟာ တကယ်ပဲ ကျွန်တော်တို့ကို သဘာဝကို ခံစားမိစေပါတယ်။ ကျွန်တော်တို့ ချက်ချင်းပဲ ကမ်းခြေကို ဆင်းခဲ့ကြပါတယ်။ ရေကူးလိုက်၊ ဆော့လိုက်နဲ့  တကယ် သဘောကျစရာ အချိန်ပါပဲ။ တည်းခိုဆောင်ကို နေ့ခင်းလောက်မှ ပြန်လာခဲ့ကြပါတယ်။ နေ့လည်စာ မြန်မြန်စား ခဏလောက်နား ပြီးတော့ ကျွန်တော်တို့အားလုံး အရမ်း မြင်ချင်နေတဲ့ Janjira fort ဘက်ကို ထွက်ခဲ့ကြပါတယ်။ အဲဒီကနေ ည ၈ နာရီလောက်မှ ပြန်လာခဲ့ကြပါတယ်။ ညစာစားပြီးတော့ အခန်းထဲမှာပဲ အနားယူကြဖို့ ဆုံးဖြတ်ကြပါတယ်။ ကျွန်တော်က ပင်ပန်းနေပေမယ့် အေနန်က ခေါ်တာနဲ့ ကျွန်တော်တို့ သူတို့အခန်းဘက်ကူးပြီ ကတ် ဆော့ဖြစ်ကြပါတယ်။ ကျွန်တော့် ဇနီးနဲ့  သူ့ဇနီးကလည်း ခင်နေတော့ ကိစ္စ မရှိပါဘူး။

သူ့အခန်းကို ဝင်လိုက်တယ် ဆိုရင်ပဲ ရုတ်တရက်ဆိုသလို ကျွန်တော့်ကို သက်တောင့်သက်သာ မရှိစေတဲ့ အေးစိမ့်တဲ့ ခံစားမှုကို ခံစားလိုက်ရပါတယ်။ ကျွန်တော် အေနန်ကို ပြောတော့ သူက ပင်လယ်ဘက်က လာတဲ့ အအေးဓါတ်ကြောင့် ဖြစ်ပါလိမ့်မယ်လို့ ဆိုပါတယ်။ ကျွန်တော်လည်း အဲလိုပဲ ဖြစ်ပါလိမ့်မယ်လို့ ထားလိုက်ပါတယ်။ ကျွန်တော်တို့ ၂ နာရီလောက် ကတ်ကစားကြပါတယ်။ ည ၁၂ နာရီ ဝန်းကျင်လောက်မှာ အဆုံးသတ်ပြီး ကိုယ့်အခန်းကိုယ် ပြန်လာကြပါတယ်။

တစ်နေ့လုံး ပင်ပန်းထားတာနဲ့  ကျွန်တော်ရော ဇနီးပါ ချက်ချင်းပဲ အိပ်မောကျသွားခဲ့ပါတယ်။ ၁ နာရီ ခွဲ လောက်ကျတော့ အခန်းတံခါးကို ခေါက်သံကြားရပါတယ်။ ဘယ်သူပါလိမ့် ဆိုပြီး ဖွင့်လိုက်တော့ အံသြစရာ အေနန်ကို အခန်းရှေ့မှာ တွေ့လိုက်ရပါတယ်။ သူ့ကို ကြည့်ရတာ နည်းနည်းလည်း စိုးရိမ်ပူပန် နေပုံ ရပါတယ်။ ကျွန်တော်တို့ ထွက်လာပြီးတော့ သူ့ဇနီး ဂျယို ရုတ်တရက် အရမ်းအေးပြီး အဖျားတက်သလို တုန်တုန်ရီရီ ဖြစ်လာတယ် လို့ ကျွန်တော့်ကို ပြောပြပါတော့တယ်။ အေနန်ကတော့ အဲလို အေးတာမျိုး မခံစားရတဲ့ အတွက် အံသြမိတယ်လို့ ဆိုပါတယ်။ ကျွန်တော်လည်း ဆရာဝန်ဖြစ်တဲ့ ကျွန်တော့်ဇနီးကိုပါ သူ့ဆေးအိတ်ကို ယူပြီး အေနန်တို့ အခန်းကို လိုက်ခဲ့ဖို့ ပြောရပါတယ်။ အဲဒီ အခန်းထဲကို ဝင်လိုက်တယ်ဆိုရင်ပဲ ကျွန်တော်လည်း မသက်မသာ ခံစားမှု တစ်စုံတရာကို ခံစားလိုက်ရပါတယ်။  ဂွမ်းစောင် နှစ်ထည်နဲ့ ထွေးပတ်ထားတဲ့ တိုင်အောင် ဂျယိုဟာ တုန်ယင်ပြီး သွားချင်းရိုက်နေတာကို တွေ့ရပါတယ်။ ကျွန်တော့်ဇနီးက ဂျယိုကို စမ်းသပ်တဲ့ အခါမှာတော့ သူမဟာ ဖျားသလို ခံစားနေရပြီးတော့ ခန္ဓာကိုယ်ကလည်း ရေခဲတုံးလို အေးစက်နေပါတယ်။ ကျွန်တော့်ဇနီးလည်း သူမကို အဖျားကျဖို့နဲ့ အိပ်ပျော်အောင် ဆေးတိုက်ပြီး အနားယူခိုင်းထားလိုက်ပါတယ်။ ကျွန်တော်တို့လည်း သူတို့ကို ဒီတိုင်း ထားမသွားရက်တာနဲ့ သူတို့ အခန်းထဲမှာပဲ နေလိုက်ပါတော့တယ်။

အေနန်က အိပ်ရာပေါ်မှာ ထိုင်ပြီး ဂျယိုရဲ့ လက်ကို ကိုင်ထားပါတယ်။ ကျွန်တော်တို့ ဇနီးမောင်နှံလည်း အခန်းထဲက ခုံတွေမှာ ကိုယ့်ဟာကိုယ် သက်သာသလို ထိုင်ပြီး စောင့်ကြည့်နေကြပါတယ်။ မနက် ၃ နာရီ လောက်မှာတော့ ကျွန်တော့်ဇနီးလည်း အိပ်ပျော်သွားပါတယ်။ ကျွန်တော်ကတော့ အဲဒီအဖြစ် ဖြစ်သွားတဲ့ အချိန်မှာ တစ်ယောက်တည်း ကတ်ချိုးနေခဲ့ပါတယ်။ ဂျယိုဟာ ရုတ်တရက် အိပ်ရာပေါ်ကနေ ထထိုင်လိုက်ပြီးတော့ သူမ မျက်လုံးတွေကလည်း ကျွန်တော်တို့ အရင်က တစ်ခါမှ မမြင်ဖူးတဲ့ ပုံစံမျိုးနဲ့ ကြည့်နေပါတယ်။ သူမ ဘေးမှာ ထိုင်နေတဲ့ အေနန်က သူမကို ပွေ့ဖက်ပြီး သက်တောင့်သက်သာ ဖြစ်အောင် ကြိုးစားနေခဲ့ပါတယ်။ သူမဟာ ရုတ်တရက် အေနန် လက်ထဲက ရုံးထွက်ပြီး သူ့လည်ပင်းကို ဖမ်းကိုင် တွန်းပစ်လိုက်ပါတော့တယ်။ အင်အားက ဘယ်လောက်ကြီးသလဲ ဆိုရင် အေနန်ဟာ အိပ်ရာကနေ ခြောက်ပေလောက် ဝေးတဲ့ ကော်ဇောပေါ်ကို ရောက်သွားပါတယ်။ အေနန်လို အရပ် ၆ပေ ၃ လက်မ၊ ၉၀ ကီလို လောက် ရှိတဲ့ လူတစ်ယောက်ကို အဲလို တွန်းပစ်လိုက်နိုင်တာဟာ ပုံမှန်မဟုတ်တဲ့ အင်အားတစ်ခု ရှိမှပဲ ဖြစ်နိုင်ပါလိမ့်မယ်။ ဂျယိုဟာ ရုတ်တရက် စကားလုံးတစ်ချို့ကို ရေရွတ်လိုက်ပါတယ်။ “ငါသွားပါရစေ၊ ငါသွားရမယ်” ။ ထူးဆန်းတာက အဲဒီ အသံဟာ ဂျယိုရဲ့ အသံ မဟုတ်ပါဘူး။ ဂျယိုဟာ ထရပ်ပြီး ကော်ရစ်တာ ဆီကို သွားဖို့ ကြိုးစားနေပါတယ်။

ကျွန်တော်နဲ့ အေနန်လည်း အားရှိသလောက် ကြိုးစားပြီး ဂျယိုကို သူမ အိပ်ရာပေါ် ပြန်ခေါ်လာရပါတယ်။ ကျွန်တော့်ဇနီးကတော့ အပြင်ထွက်ပြီး အကူအညီရှာပါတယ်။ မိနစ်အနည်းငယ် အတွင်း ဟိုတယ် ဝန်ထမ်းတစ်ချို့ ရောက်လာပြီး ကူညီကြပါတယ်။ ကျွန်တော်လည်း ဂျယိုကို ကျွန်တော်တို့ အခန်းထဲကို ရွှေ့ဖို့ ချက်ချင်း ပြောလိုက်ပါတယ်။ ကျွန်တော်တို့ ငါးယောက်ဟာ ဂျယိုကို မချီပြီး ကျွန်တော်တို့ အခန်းထဲကို ပို့ရပါတယ်။ ဂျယိုကတော့ တစ်ချိန်လုံးပဲ “ငါသွားပါရစေ၊ ငါသွားရမယ်” လို့ ညည်းတွားနေပါတယ်။ ဂျယိုဟာ ကျွန်တော်တို့ အိပ်ရာပေါ်ကို ရောက်သွားတယ် ဆိုရင်ပဲ ပုံမှန် စဖြစ်သွားပါတယ်။ ဂျယိုဟာ ရုန်းကန် နေတာကို ရပ်ပြီး အိပ်မောကျ သွားပါတော့တယ်။ အချိန်ကတော့ မနက် ၅နာရီ လောက်ရှိပြီဆိုတာ ကျွန်တော် သတိထားမိခဲ့ပါတယ်။ ဂျယိုကို ဝင်ပူးတဲ့ ဝိညာဉ်ဟာ မနက်လင်းကာနီးမို့ပဲ အားလျှော့သွားလေသလား အခန်းပြောင်းလိုက်လို့ပဲ ထွက်သွားသလားတော့ မပြောတတ်ပါဘူး။

နောက်တစ်နေ့ မနက်မှာတော့ ကျွန်တော်တို့ဟာ check out လုပ်ဖို့ ဆုံးဖြတ်လိုက်ပါတယ်။ နည်းနည်း ပင်ပန်း နေသယောင် ရှိပေမယ့် ဂျယိုဟာ နောက်တစ်နေ့ မနက်မှာ လုံးဝ နေကောင်းပါပြီ။ မနေ့ညက အဖြစ်တွေကိုလည်း လုံးဝ မမှတ်မိပါဘူး။ သူမ နိုးလာတော့ ကျွန်တော်တို့ အခန်းထဲ ရောက်နေတာကို အံသြ နေခဲ့ပါတယ်။ ဟိုတယ်က ပြန်မှ အဖြစ်အပျက်တွေ အားလုံး ရှင်းပြမယ်လို့ အေနန်က သူမကို နှစ်သိမ့်ထားလိုက်ပါတယ်။ အေနန် ကောင်တာမှာ ငွေရှင်းနေတုန်း ဟိုတယ် ဝန်ထမ်း တစ်ယောက်က ကျွန်တော့်ကို ခေါ်ပြီး လွန်ခဲ့တဲ့ လအနည်းငယ်က အဲဒီအခန်းမှာ စုံတွဲ တစ်တွဲ မတော်တဆမှု ဖြစ်ခဲ့တဲ့ အကြောင်းကို ပြောပြခဲ့ပါတယ်။
စုံတွဲ တစ်တွဲ လာတည်းခဲ့ပြီး ညဘက်မှာ ကြီးကြီးမားမား ရန်ပွဲ ဖြစ်ခဲ့ပါတယ်။ အမျိုးသားက အမျိုးသမီးကို ထားပြီး အခန်းထဲက ထွက်သွားခဲ့ပါတယ်။ ခဏကြာတော့ အမျိုးသမီးကို အခန်းရှေ့ ကော်ရစ်တာမှာ ကိုယ့်ကိုယ်ကိုယ် သတ်သေနေတာကို တွေ့ခဲ့ရပါတယ်။ ရဲတွေ လာရောက် စုံစမ်း စစ်ဆေးခဲ့ပေမယ့် သူမနဲ့ ရန်ဖြစ်ခဲ့တဲ့ အမျိုးသားကို ရှာမတွေ့ခဲ့ပါဘူး။ အဲဒီကေ့စ် ကိုလည်း မကြာခင်မှာ ပိတ်ပစ်ခဲ့ပါတယ်။ အဲဒီနောက်ပိုင်း လာတည်းတဲ့ လူတွေမှာ ဘာ မတော်တဆမှုမှ မဖြစ်ခဲ့ပေမယ့် သန့်ရှင်းရေး ဝန်ထမ်းတွေကတော့ အဲဒီအခန်းထဲ ရောက်တိုင်း ထူးဆန်းတဲ့ ခံစားမှုမျိုးကို ခံစားခဲ့ရတယ် လို့ ဆိုပါတယ်။

ကျွန်တော်တို့ မပြန်ခင်မှာ မန်နေဂျာကို အဲဒီ ကိစ္စ အသိပေးပြီး အဲဒီ အခန်းထဲက မကျွတ်မလွတ်သေးတဲ့ ဝိညာဉ်နဲ့ ပတ်သက်ပြီး တစ်ခုခု လုပ်ဖို့ အကြံပေးခဲ့ပါတယ်။ ကျွန်တော်တို့လည်း အဲဒီကို နောက်တစ်ခေါက် ပြန်မရောက်တော့တဲ့ အတွက် ကျွန်တော်တို့ အကြံပေးတဲ့ အတိုင်း မန်နေဂျာ လုပ်မလုပ်ကိုတော့ မသိရတော့ပါ။

Sanjub ၏ A Beach Resort Haunting ကို သင့်လျော်သလို ပြန်ဆိုပါသည်။

သိင်္ဂါကျော်

09 May, 2012

ပျောက်ဆုံးခြင်း အကြောင်း


 
ဖော်ဖော်ရွေရွေ
စကားလုံးတွေ ပျောက်ဆုံးနေတယ်
ဘာကြောင့်မှန်းလည်း
ကိုယ်ကိုယ်တိုင်ပဲ နားမလည်တော့ဘူး။

ကိုယ့်ကိုယ်ကို တံခါးပိတ်ထားမိတဲ့ နေ့ရက်တွေ
တိတ်တဆိတ် နေပျော်သလိုလိုနဲ့
ကူကယ်ရာမဲ့သယောင် လုပ်ယူခံစား
မပြောပလောက် ပေမယ့်လည်း
အတွင်းလှိုက် ရူးသွပ်တဲ့ ဒဏ်ရာ
သေရာပါတော့မလား။

အပြင်ထုတ်မပြောဖြစ်တဲ့
စကားလုံးတွေနဲ့ပဲ နေထိုင်တော့မယ်
ကိုယ်တိုင်ဖွဲ့စည်းထားတဲ့ လှပမှုနဲ့
တစ်စစီ ပြန့်ကျဲတဲ့ အတွေးတွေထဲ
တစ်စုံတစ်ယောက်ကို တမ်းတမှုတောင်မှ
ပါမှန်းမသိ ပါနေသေးရဲ့။

ကမ္ဘာကြီး ပူနွေးလာနေတဲ့ အကြောင်း
တစ်စုံတစ်ယောက် ပြောသံကြားလိုက်တယ်
တို့အားလုံး သွားမှာပဲတဲ့
နောက်တစ်ယောက်က ဆိုတယ်
ဘယ်လောက်ကြာမှ လဲ တဲ့။
အဲဒီနောက်
ယောက်ျားတွေက ကွန်ပျူတာဂိမ်းတွေ အကြောင်းပြော
မိန်းမတွေက ဟင်းချက်နည်း အကြောင်းပြော
ငါ ဘာမှ စိတ်မဝင်စားဘူး
စကားလုံးတွေ ပျောက်ဆုံးနေတုန်းပဲ။

ကိုယ့်ကိုယ်ကိုတောင် ရှာမတွေ့နိုင်မှတော့
စကားလုံးတွေ ပျောက်ဆုံးတာလောက်ကို
စကားထဲ ထည့်ပြောမနေချင်ဘူး
ဒါပေမယ့် ပြောမိနေပါရော..။

အပြင်မှာ မိုးတွေ ရွာနေတယ်
ဘယ်သစ်ရွက်မှာ တင်ကျန်တဲ့ မိုးစက်က ငါလဲ
မမြဲတဲ့ အရာတွေထဲက တစ်ခုအပါအဝင်ပါ
ဘာကိုများ ဆုပ်ကိုင်ထားဖို့ ကြိုးစားနေဦးမလဲ
ပျောက်ဆုံးသွားလည်း သွားပါစေပေါ့။

သိင်္ဂါကျော်



 

07 May, 2012

ရောက်ခဲ့သမျှ ရိုက်ခဲ့သမျှ ၃ (Paris)

ဧပရယ် လကုန်က ပဲရစ်ကို နှစ်ရက် နဲ့ တစ်ည သွားလည်ခဲ့ပါတယ်။ ကိုယ်နေတဲ့ Groningen မြို့ကနေ Utrech ဆိုတဲ့ မြို့ကို ရထား ၂ နာရီလောက်စီး၊ အဲဒီကမှ Euroline Express ညကား နဲ့ သွားတော့ Paris ကို မနက်စောစော ၆ နာရီလောက် ရောက်ပါတယ်။ ဟိုတယ်ကို check in ဝင်ဖို့လည်း မဖြစ်နိုင်သေးတော့ ကျောပိုးအိတ် တစ်လုံးနဲ့ပဲ မြို့ကို ပတ်ဖို့ စိတ်ကူးထားခဲ့ပါတယ်။ မနက်စောစောစီးစီး မိုးကလည်း စိတ်ကုန်စရာ ကောင်းလောက်အောင် တဖွဲဖွဲ ရွာနေပါတယ်။ ဒါပေမယ့်လည်း မတတ်နိုင်ဘူး ထီးစောင်းပြီး လျှောက်သွားရတော့တာပဲ။ Notre Dame Cathedral ရောက်တော့ မိုးတွေ တော်တော်အုံဆိုင်းပြီး ရွာနေပါတယ်။

Love padlocks တွေ ချိတ်ဆွဲထားတဲ့ တံတားတစ်ခုပါ။
 
နောက်တော့ Sein မြစ်ကမ်း တစ်လျှောက် လျှောက်ရင်းနဲ့ နာမည်ကျော် မိုနာလီဇာ ရှိတဲ့ Louvre ပြတိုက်ကို ရောက်တော့ ပြတိုက်ထဲ ဝင်ကြည့်လိုက်ပါတယ်။ မိုးကလည်း တော်တော် ရွာနေတော့ လူတိုင်းပဲ ထီးတွေနဲ့ တန်းစီနေခဲ့ရပါတယ်။ သိပ်အကြာကြီးတော့ မစီရပဲ ဝင်ခဲ့ရပါတယ်။

ဒီပြတိုက်ထဲမှာတော့ ကြိုက်သလောက် ဓါတ်ပုံ ရိုက်လို့ရပါတယ်။ မိုနာလီဇာကိုလည်း မှန်ထဲထည့်ထားတော့ ကြိုက်သလို ရိုက်လို့ရပါတယ်။




ပြတိုက်က ထွက်လာတော့ မိုးစဲသွားပါပြီ။ လမ်းတစ်လျှောက် တွေ့သမျှ ရိုက်ရင်းနဲ့ပဲ Arc de Triomphe အထိ သွားခဲ့ပါတယ်။ ကိုယ့်လိုပဲ လမ်းတလျှောက် သွားလာနေတဲ့ Tourist တွေလည်း အများကြီးပါ။


အဲဒီကမှ Eiffel Tower ဘက် ပြန်လျှောက်ခဲ့ပါတယ်။ နောက်တစ်နေ့လည်း ထပ်ရောက်ပါသေးတယ်။

 

အဲဒီနောက်တော့ booking လုပ်ထားတဲ့ Stella Hotel ကို တော်တော်ကြာအောင် ပတ်ရှာလိုက်ရပါတယ်။ လွယ်ထားတဲ့ ကျောပိုးအိတ်ကလည်း အဝတ်တစ်စုံ ရေပုလင်း တစ်လုံး၊ ပေါင်မုန့် တစ်ထုပ်ပဲ ပါတာကိုပဲ တော်တော်လေးလာပါပြီ။ ကျောပိုးအိတ် အကြီးကြီးတွေ လွယ်ပြီး သွားလာနေတဲ့ Tourist တွေကို တော်တော် လေးစားမိပါရဲ့။ ဟိုတယ်မှာ အိတ်ကို ချ ကင်မရာပဲ ယူပြီး လမ်းဆက်လျှောက်ခဲ့ပါတယ်။ Montparnasse 56 tower အပေါ်ကိုတော့ မတက်တော့ပဲ အောက်ကပဲ ဓါတ်ပုံ ရိုက်ခဲ့ပါတယ်။

နောက် တွေ့တဲ့ bus ကားစီးပြီး sacre Coeur ဆိုတဲ့ နေရာကို ရောက်အောင်ရှာပြီး သွားလိုက်ပါသေးတယ်။ နေမဝင်ခင် ရောက်သွားပြီး ပြန်မယ် ဆိုတော့ မှောင်သွားတာနဲ့ ဟိုတယ်နား ရောက်မယ့်၊ အလာတုန်းက လာခဲ့တဲ့ ဘတ်စ်ကားဂိတ်ကလည်း ရှာမတွေ့တော့တာနဲ့ ကြောက်ပြီး Taxi ငှား ပြန်လာရပါတယ်။


ကိုယ်က သွားချင်လွန်းလို့သာ လျှောက်သွားနေတာ.. တကယ်တော့ မြေပုံလည်း သေချာမကြည့်တတ်၊ လမ်းလည်း သိပ်မမှတ်မိ တတ်တဲ့ သူပါ။ လမ်းတွေ မှားမှားနေတာနဲ့ပဲ လျှောက်ရမှာထက်ကို ပိုလျှောက်ခဲ့ရတာ ခဏ ခဏပါ။ အောက်ကပုံတွေကတော့ ဒုတိယ နေ့မှာ ရာသီဥတုကလည်း သာယာတာနဲ့ ဆိန်းမြစ်ကမ်း တစ်လျှောက် လျှောက်ရင်း ရိုက်ခဲ့တဲ့ ပုံလေးတွေပါ။






 Louvre ပြတိုက်ဘက် ပြန်လျှောက်ပြီး ရိုက်ခဲ့တာတွေပါ။


ဒါကတော့ ဘာမှန်း မသိဘူး ဘတ်စ် ပေါ်က လှမ်းတွေ့တာနဲ့ ဆင်းပြီး ရိုက်ခဲ့တာ..။ စစ်သမိုင်းပြတိုက် လိုမျိုး ဖြစ်မယ် ထင်ပါရဲ့။ အထဲတော့ ဝင်မကြည့်ခဲ့တော့ပါဘူး။ ပြင်သစ်မှာ ပြတိုက်တွေကလည်း အများကြီးပါ။


ဒုတိယနေ့ နေ့လည်မှာတော့ Disneyland ကို Rer ရထား စီးပြီး သွားခဲ့ပါတယ်။ ဟိုရောက်တော့ မိုးနည်းနည်း အုံ့နေပြီမို့ တိမ်ပြာပြာအောက်က ပုံတွေတော့ မရခဲ့တော့ပါဘူး။







အပေါ်က space mountain ဆိုတဲ့ ရိုလာကိုစတာ လိုမျိုးဟာကို စီးခဲ့တယ်။ ကားကလေး မောင်းခဲ့တယ်။ အချိန်ကလည်း သိပ်မရှိတော့ လျှောက်ကြည့် ဓါတ်ပုံရိုက်ပြီး ည ၈ နာရီလောက်မှာ ပြန်ထွက်ခဲ့ပါတယ်။ Disneyland က ည ၁၁ မှ ပိတ်မှာပါ။ ပြန်အထွက်မှာ မိုးက တဖွဲဖွဲ ရွာလာပါပြီ။  ကားက ည  ၁၁ နာရီ ထွက်မှာမို့ Euroline Bus gate ကို စောစောပြန်ရောက်နေအောင် ပြန်ခဲ့ပါတယ်။

သိင်္ဂါကျော်