27 July, 2011

ဇာတ်မျော



မရွာတော့ဘူးလိုလိုနဲ့ရွာချလိုက်တဲ့
ပြင်ဦးလွင်မိုးလိုပဲ
နောက်ထပ် မချစ်တော့ဘူးလိုလိုနဲ့
ချစ်မိပြန်ရောတဲ့။

ဖြတ်မယ် ဖြတ်မယ်နဲ့
ဖြတ်မိနေတာက
သံယောဇဉ်မဟုတ်ပဲ
ဆံပင်တွေပဲ ဖြစ်ဖြစ်နေပါရော။

ကိလေသာ ကိလေသာနဲ့
ဟိုဟိုဒီဒီ လက်ညှိုးထိုးပြီး
ရှောင်ရမလို ပယ်ရမလို လုပ်လုပ်နေပေမယ့်
နှလုံးသားကလည်း ကိလေသာ မစင်လေတော့
ပြတ်ပြီ ပြောပြောပြီးလည်း
မပြတ်နိုင်သူပေါ့။
မပြတ်ဘူး မဟုတ်လား ဆိုတော့လည်း
ပြတ်ပြီ လို့ ပြောချင်ပြန်ရော။

မင်းဘက်ကို ရှာရှာဖွေဖွေ ကြည့်လည်း
ဖြတ်သင့်တဲ့ အပြစ်က
လောက်လောက်လားလားမှ မရှိချင်ပဲ။
သတ္တိမရှိသူကြီးလို့
အပြစ်တင်ချင်လည်း တင်ပေါ့
တကယ်တန်းလည်း
မစွန့်စားဝံ့တာ မှန်ရဲ့။

နှစ်ပေါင်း ၃၀ ကျော် မှီခိုလာပြီးမှ
အမေ့ရင်ခွင်ကို ခြေစုံကန်ရမှာလည်း
မဖြစ်သင့်ဘူးလို့ ထင်လိုထင်။
ကိုယ့်အတ္တကိုယ် ကိုးကွယ်ရင်း
နေသားကျနေတာ ကြာပြီးမှ
ချနင်းရမယ်ဆိုလည်း
ပြေလည်ပါ့မလား ဆိုတာ စဉ်းစားစရာ။

ကြွေးဟောင်းတောင် ကြေအောင် မဆပ်နိုင်တဲ့ ဘဝထဲ
ကြွေးသစ်ချဖို့ရာတော့
မင်းကို ယုံကြည်မှုက 
လုံလုံလောက်လောက် မရှိရတဲ့အထဲ
ကိုယ့်ကိုယ်ကိုလည်း မယုံကြည်ချင်ဘူး။
တစ်ယောက်တည်းဘဝနဲ့
မရုံးမကန် ရေစုန် မျှောမျှောနေခဲ့တာကြာတော့လည်း
မင်းကို အားကိုးရဖို့ မသေချာတဲ့ဘဝမှာ
ကိုယ်တိုင် ရုံးကန်ပြီး ပင်ပန်းရမှာလည်း
ကြောက်နေသေးတယ်။

အဲလိုနဲ့ပဲ
လောကီကို စိတ်ကုန်ကုန် လာတယ်ဆိုပြီး
ရိပ်သာပဲ သွားနေဖို့ စိတ်ကူးပါရဲ့
အချိန်တန်တော့လည်း
မင်းစကားတစ်ခွန်းထဲ မျောပါမိပြန်ရော။
အပြီးသွားချင်သွားတော့လို့ မင်းကပြောလည်း
မင်းစိတ်မကုန်မချင်း
ငါကလည်း စိတ်မပြတ်နိုင်ခဲ့သူပါ။
ကိုယ့်ကိုယ်ကို ချစ်ရတဲ့အထဲ
မီးထဲ တိုးရဲတဲ့ ပိုးဖလံတစ်ကောင်လည်း မဟုတ်ခဲ့တာမို့
ဒီဇာတ်မျောထဲ မလွတ်မလပ်နဲ့
ယက်ကန်ယက်ကန် ဆက်နေတုန်းပဲ။

သိင်္ဂါကျော်

22 July, 2011

ညှိုးမာန်ဖွဲ့ လှည့်ကွက်ထဲက သားကောင် (ဇာတ်သိမ်း)



ဧည့်ခံပွဲနေ့ ရောက်ဖို့ ငါးရက်သာ လိုတော့ပေမယ့် ထိပ်ထားအကြောင်းကတော့ အစအနမှ မကြားရသေးပါ။ သူ့အိမ်က မင်္ဂလာပွဲကို ဖျက်သိမ်းလိုက်ဖို့ ပြောနေသော်လည်း သူက ခုထိ မဖျက်သိမ်းရသေး။ သူ့တိုက်ခန်းမှာ မင်္ဂလာဆောင် ဖိတ်စာတွေလည်း အထပ်လိုက်ပုံထားတုန်းပဲ ရှိသေးသည်။ သူ့ ပတ်ဝန်းကျင် အသိုင်းအဝိုင်းမှာလည်း သူ့ မင်္ဂလာပွဲ ပျက်တော့မည် ဆိုသည့် သတင်းတွေက ပျံ့နှံ့နေသည်။ အဲဒါအပြင် သတို့သမီးက အခြေအနေ အဆင့်အတန်း နိမ့်ကျနေကြောင်း ခုမှ သိသောကြောင့် မင်္ဂလာပွဲကို ဖျက်သိမ်းလိုက်ခြင်း ဖြစ်ကြောင်း ဘယ်သူလွှင့်မှန်း မသိသော သတင်းတစ်ရပ် ကလည်း အတော်ပျံ့နေသည်။ သူ့ကို ကိုယ်တိုင် လာမေးကြသော လူတွေကိုတော့ သူက မဟုတ်ကြောင်းပဲ ပြန်ပြောလိုက်သည်။ သူ့အိမ်ကလည်း အဲဒီသတင်းတွေကြောင့် သူ့ကို မေးသော်လည်း သူက သူကိုယ်တိုင်လည်း သေချာမသိသော ကိစ္စအတွက် ဘာမှ မပြောပဲ ရှောင်နေသည်။ နေခြည်ထိပ်ထား ထွက်သွားကာစ ကတော့ နှစ်ရက် သုံးရက် ထင်ပြီး သူ့အိမ်က ဘာမှ မပြောသော်လည်း ခုတော့ ဆွေ့ဆွေ့ခုန်အောင် နာနေကြပြီ။ သူမ ပြန်လာလျှင်တောင် သူတို့ဘက်က သဘောတူဖို့ မဖြစ်နိုင်၊ မင်္ဂလာပွဲကိုလည်း ဖျက်သိမ်းမည် ဘာညာနှင့် အိမ်မှာ နေရတာလည်း သူ့မှာ နားပူလှပြီ။

အဲလို အချိန်မှာ မဆုံတာကြာသော သူငယ်ချင်းတွေ Gathering လုပ်မည်ဆို၍သာ သွားဖို့ စီစဉ်ရသည်။ သူ့မှာ လုံးဝ ပျော်ရွှင်ချင်စိတ် လည်း မရှိပါ။ စိတ်ရောဂါကု ဆေးရုံမှာ တာဝန်ကျနေသော သူငယ်ချင်း ဒေါက်တာ မောင်မောင်က ဂျူတီ ရှိသည် မအားဘူး ဆို၍ အားလုံးက ဝိုင်းဝန်း ပြောဆိုနေရာ ကိုယ်ပိုင် အလုပ်ဖြစ်သော သူ့မှာ မအားဘူးလို့လည်း ပြောခွင့်မသာပဲ ဖြစ်နေသည်။ နောက်တော့ မောင်မောင်က ဆေးရုံက တန်းလာမည် ဆိုသဖြင့် မောင်မောင့်ကို ဝင်ခေါ်ဖို့ သူ တာဝန်ကျသည်။ ဆေးရုံထဲ မဝင်တော့ပဲ မောင်မောင့်ကို ဖုန်းဆက်ပြီး သူရောက်နေကြောင်း ပြောလိုက်တော့ မောင်မောင်က ခဏစောင့်ဖို့ ပြောသည်နှင့် ကားကို ရပ်ခဲ့ပြီး အပေါက်ဝနားမှာ သူ ရပ်စောင့်နေလိုက်သည်။

ဆေးရုံမှာ ဧည့်ချိန်မို့ ထင်သည်။ လူတွေ ဝင်လိုက် ထွက်လိုက်နှင့် ရှုပ်နေသည်ကို သူ လိုက်ကြည့်နေခိုက် ထမင်းချိုင့်လေး ကိုင်ပြီး ဆေးရုံထဲမှ ထွက်လာသော မိန်းကလေး တစ်ယောက်ကို လှမ်းတွေ့လိုက်ရသည်။ ထိပ်ထားမှ ထိပ်ထားပါပဲ။ အဝတ်အစား အပြင်အဆင်ကို ဖယ်ထားလိုက်လျှင် သည်မိန်းကလေးကို သူ မမှတ်မိစရာ အကြောင်း မရှိပါ။ သို့ပေမယ့် ထိပ်ထားက အဲဒီလိုပုံစံနှင့် ဖြစ်နိုင်ပါ့မလား...။ မိန်းကလေးကို လိုက်ကြည့်နေတုန်းမှာပင် မောင်မောင်ကလည်း ထွက်လာသည်။
“ဟေ့ကောင် ဘယ်သူ့ကိုများ ဒီလောက် ကြည့်နေရတာတုန်း”
“ငါ့အသိ တစ်ယောက်နဲ့ တူလို့ကွာ.. ဟိုမိန်းကလေးကို မင်းသိလား”
“နေခြည်ထိပ်ထားနဲ့ တူတာလား၊ မဟုတ်ပါဘူးကွာ၊ သူ့ကို ငါသိပါတယ်၊ သူ့နာမည် ရွက်လှတဲ့၊ သူ့အမေက ဒီဆေးရုံမှာ တက်နေတာ ကြာပြီလေ၊ လာပါကွာ သွားရအောင်”
မဟုတ်နိုင်ပါဘူး ဟု လက်လျော့ပြီး ကားကို မောင်းထွက်ခဲ့သည်။
“ထိပ်ထားနဲ့ တူတဲ့ မိန်းကလေး တစ်ယောက် ရှိတာ မင်း ငါ့ကို ဘာလို့ မပြောတာတုန်း၊ ငါ ထိပ်ထားကို ရှာနေမှန်း သိရဲ့သားနဲ့”
“မဟုတ်နိုင်ပါဘူးကွာ၊ ရွက်လှက မင်းရဲ့ ထိပ်ထား ဘယ်လိုမှ မဖြစ်နိုင်ပါဘူး၊ မင်း စေ့စပ်ပွဲမှာ ငါ ထိပ်ထားကို တွေ့တော့ ရွက်လှနဲ့ တော်တော်တူတာ သတိထားမိတယ်၊ ဒါပေမယ့် ရွက်လှမှာ စိတ္တဇဖြစ်နေတဲ့ အမေတစ်ယောက်ပဲ ရှိတာ၊ အဒေါ်လည်း မရှိဘူး၊ မင်းရဲ့ ထိပ်ထားလို ပညာတတ် သဌေးသမီး ဘယ်နည်းနဲ့မှ မဟုတ်နိုင်ဘူး”

ဆေးရုံနားက ကားမှတ်တိုင်မှာ ရပ်စောင့်နေသော သူမကို ထပ်တွေ့ရပြန်သည်။ သူမ ဝတ်ထားသော ရှပ်အင်္ကျီ ခပ်နွမ်းနွမ်းကို ဖယ်ပြီး ထိပ်ထားလို မြန်မာဆန်ဆန် ဝမ်းဆက်ကလေး ဝတ်ပေးလိုက်လျှင်တော့...။ ကားမှတ်တိုင်ကို ကျော်သွားပြီးမှ သူ ကားကို လမ်းဘေးမှာ ရပ်ပစ်လိုက်သည်။ ထိပ်ထားမှာ အမြွှာညီအစ်မ ရှိတာလား... ဒါမှမဟုတ်...။ သူ ဒီအတိုင်းတော့ ဘယ်နည်းနဲ့မှ ကျော်မသွားနိုင်တော့ပါ။
“မင်း ကားကို ယူသွားလိုက်တော့ မောင်မောင်၊ ငါ နောက်မှ လိုက်ချင်လည်း လိုက်ခဲ့မယ်၊ မလာနိုင်တာလည်း ဖြစ်ချင် ဖြစ်မယ်”
“ဟာ ဟေ့ကောင်.. ဟေ့ကောင်”
“သွားတော့၊ နှစ်ယောက်လုံး မလာရင် ဟိုကောင်တွေ စိတ်ဆိုးနေလိမ့်မယ်”
သူကတော့ ကားပေါ်က ဆင်းပြီး မိန်းကလေးဆီ ခပ်မြန်မြန် လျှောက်သွားမိသည်။ မိန်းကလေးက ကားလာရာဘက်ကို မျှော်ကြည့်နေသဖြင့် သူ့ကို မမြင်ပါ။
“ထိပ်ထား”
သူက ခေါ်တော့ မိန်းကလေးက အမှတ်မထင် လှည့်ကြည့်ပြီး ထိတ်လန့်သွားသည်။ အဲဒီ မျက်နှာ အမူအယာကို ကြည့်ခြင်းအားဖြင့် သူမက ထိပ်ထားပဲ ဆိုတာ သူ့အတွက် သေချာသွားရသည်။
“ကျွန်မ နာမည် ထိပ်ထား မဟုတ်ဘူးရှင့်၊ လူမှားနေပြီ”
“ထိပ်ထား မဟုတ်ဘူးဆိုတော့ ရွက်လှ လား”
“ရှင် ကျွန်မနာမည် ဘယ်လိုလုပ်သိသလဲ”
“ခဏလောက် မင်းနဲ့ ငါနဲ့ စကားပြောရအောင်၊ လိုက်ခဲ့ကွာ”
“ဟင့်အင်း မလိုက်ဘူး၊ ဟိုမှာ ကားလာပြီ ကျွန်မ သွားတော့မယ်”
သူမက ဇွတ်ထွက်သွားဖို့ ပြင်သောကြောင့် သူက စိတ်မရှည်တော့ပဲ သူမ လက်ကို ဆွဲခေါ်လာခဲ့မိသည်။
“ငါတို့ လူရှင်းတဲ့ ဆိုင်တစ်ခုခု သွားရအောင်၊ ငါမင်းကို ဘာမှ မလုပ်ဘူး၊ စကားပြောရုံပဲ”
သူတို့ နှစ်ယောက် ရုံးရင်းဆန်ခတ် ဖြစ်နေသဖြင့် ကားမောင်းမသွားသေးပဲ စောင့်ကြည့်နေသော မောင်မောင်ပါ မနေသာတော့ပဲ ထွက်လာရသည်။
“ရွက်လှ၊ သူက ကိုယ့် သူငယ်ချင်းပါ၊ မင်းကို သူ ရှာနေတဲ့ မိန်းကလေးနဲ့တူနေလို့ မေးချင်နေတာပါ၊ လာပါ ကားပေါ်တက်လိုက်၊ ဟိုဘက်နားက ကော်ဖီဆိုင်ကို သွားပြီး အေးအေးဆေးဆေး ပြောကြတာပေါ့”

ရွက်လှကတော့ သူ့ကို မြင်လိုက်ကတည်းက ထိတ်လန့်ပြီး ငိုချင်သွားသော စိတ်ကို မနည်း ဣနြေ္ဒဆည်နေရသည်။ ကော်ဖီဆိုင်ထဲက စားပွဲမှာ ထိုင်ပြီးသည် ကော်ဖီ နှစ်ခွက် မှားပြီးသည်အထိ သူက ဘာမှ မပြောသေးပဲ သူမကို အကဲခတ်ကြည့်နေသည်။ ဒေါက်တာမောင်မောင်ကတော့ သူတို့ကို ထားပြီး တက္ကစီ တစ်စီး ငှားကာ Gathering ကို ထွက်သွားလေပြီ။ ရွက်လှကတော့ အပြစ်ရှိသူမို့ သူ့ကို တည့်တည့် မကြည့်ရဲသလို ဖြစ်နေသည်။
“မင်းဆီက အကျိုးအကြောင်း ကြားချင်တယ်၊ နေခြည်ထိပ်ထား မဟုတ်ဘူးလို့ မပြောနဲ့နော်၊ ငါမယုံဘူး”
“နေခြည်ထိပ်ထား ဆိုတာ ကျွန်မ မဟုတ်ဘူး၊ ကျွန်မ ဘာမှ မသိဘူး”
ရွက်လှက ဘူးခံဖို့ ဆုံးဖြတ်ပြီး ပြောလိုက်ရင်း လုပ်မိလုပ်ရာနှင့် လာချသော ကော်ဖီခွက်ကို လက်နှစ်ဖက်နှင့် ကိုင်ထားလိုက်မိသည်။ အဲဒီမှာတင် သူမ လက်မှ လက်စွပ်ကို သူက မြင်သွားလေတော့သည်။
“ဟား.. ဟား.. မင်းက ငြင်းတယ်ဆိုလည်း သက်သေခံ မကျန်အောင် လုပ်မှပေါ့ကွာ၊ မင်း လက်က လက်စွပ်က ဘာလဲ၊ ဘာဖြစ်လို့ အဲဒါကို ခုထိ စွပ်ထားသေးတာလဲ”
သူပြောမှပင် ရွက်လှက လက်စွပ်ကို သတိရသွားသည်။ ရွက်လှက ဘာကြောင့် ရူးရူးနှမ်းနှမ်းနှင့် ဒီလက်စွပ်ကို ခုထိ မချွတ်ရက်သေးတာပါလိမ့်။ ကိုယ့်ကိုယ်ကို မုန်းမိသည်။ အမှန်တော့ ဒီလက်စွပ်ကိုပါ ချွတ်ထားခဲ့ဖို့ပါ။ ဒါပေမယ့် သူကိုယ်တိုင် စွပ်ပေးခဲ့သော လက်စွပ်ကလေးကို အမှတ်တရ အနေနှင့် သိမ်းထားချင်မိတာနဲ့ပဲ ယူလာခဲ့ခြင်း ဖြစ်သည်။ သူတို့ အဆင့်အတန်းနှင့် လက်စွပ်တစ်ကွင်း တန်ဖိုးက ဘာမှလည်း ရှိတာမဟုတ်သည့်ပြင် သူ့ဆီ ထားခဲ့လျှင်ပင် စိတ်ဆိုးပြီး လွှင့်ပစ်နိုင်သော ပစ္စည်းတစ်ခုကို ယူလာတာ ဘာမှ မဖြစ်လောက်ဘူး ထင်ပြီး ယူလာခြင်းလည်း ဖြစ်သည်။ ခုမှတော့ ဘာမှ မတတ်နိုင်တော့ပါ။ နေခြည်ထိပ်ထား က ရွက်လှပါ ဆိုတာ ဝန်မခံလို့ မရသော အခြေအနေသို့ ရောက်ခဲ့ရပြီ ဖြစ်သည်။
“အခု ကိုယ့်ကို ပြောနိုင်ပြီလား၊ မင်း ဘာကြောင့် ထွက်ပြေး သွားတာလဲ၊ မင်းကို ဘယ်သူက ခိုင်းလို့ အဲဒီလို လုပ်ရတာလဲ ဆိုတာ”
*******

မမဝင့်ဝါကတော့ မင်္ဂလာပွဲနေ့မှာ သူမကိုယ်တိုင်လာပြီး ရွက်လှ အကြောင်းကို ဖွင့်ပြောဖို့ ရည်ရွယ်သည်။ သူမက ဖြစ်နိုင်လျှင် ရွက်လှ အမေကိုပါ ခဏ ခေါ်လာဖို့ ကြံစည်ထားသည်။ သူမပြောသည့် အချိန်မှာ ရွက်လှကလည်း ကိုယ်တိုင် ဝန်ခံလိုက်ဖို့ပင်။ နေခြည်ထိပ်ထား၏ ဘဝ အစစ်အမှန်မှာ နိုင်ငံခြားပြန် Ph.D ဘွဲ့ ရဖို့ နေနေသာသာ အဝေးသင် တက္ကသိုလ်က ဘွဲ့လေး တစ်ခုပင် အနိုင်နိုင် ယူထားရသူ ဖြစ်မှန်း သိသွားလျှင်၊ စတိုးဆိုင်မှာ အရောင်းစာရေးမ လုပ်ရင်း ရူးနေသော အမေ တစ်ယောက်ကို ကျွေးမွေးစောင့်ရှောက် နေရသူမှန်း သိသွားလျှင်... ထွဋ်ထိပ်စိုး နှင့် သူ့မိသားစု က လက်ခံပေးနိုင်ပါ့မလား။ လက်ခံတာ လက်မခံတာက နောက်မှ ဆိုလျှင်တောင် မင်္ဂလာပွဲမှာ အကြီးအကျယ် မျက်နှာပျက်ရမှာကတော့ အသေအချာပင်။

ရွက်လှက သူ့ကို စိတ်ရင်းနှင့် ချစ်မိခဲ့ပြီးသည့် နောက်မှာတော့ သူ့အတွက် နစ်နာအောင် ဘာမှ မလုပ်ချင်တော့ပါ။ သူ့ဘက်က ရွက်လှကို လက်ခံပေးရင်တောင် ရွက်လှဘက်က သူနှင့် မထိုက်တန်ဟု ထင်သည်။ စေ့စပ်ပွဲအထိ လုပ်ခဲ့ရတာကလည်း မမဝင့်ဝါ၏ ကျေးဇူးတွေကို ထောက်ထား ခဲ့ရလို့ပင်။ ဒီလောက်နှင့်ပင် လုံလောက်ပြီဟု ထင်သည်။ မင်္ဂလာဧည့်ခံပွဲ လူအများရှေ့မှာ ရွက်လှ ချစ်ရသူကို အရှက်ခွဲမှာကိုတော့ ဘယ်လိုမှ မကြည့်ရက်နိုင်ပေ။ မမဝင့်ဝါ၏ ကျေးဇူးတွေကို နောက်မှပဲ ကျေအောင် ပြန်ဆပ်တော့မည်။ နေခြည်ထိပ်ထား ဘဝက ထွက်လာခဲ့ပြီးနောက် မမဝင့်ဝါ၏ စတိုးဆိုင်ကိုလည်း ပြန်မသွား၊ သူသူ့ အခန်းကိုလည်း ပြန်မသွားပဲ ရွက်လှတို့ တိုက်ခန်းဟောင်းလေးကိုပဲ ပြန်လာခဲ့သည်။
ဖေဖေနှင့် မောင်လေး ရှိစဉ်ကတော့ မိသားစု လေးယောက် ပျော်ရွှင်စွာ နေခဲ့သော အခန်းလေးပေါ့။ ဖေဖေ ဆုံးသွားပြီး မေမေလည်း ဆေးရုံ ရောက်ပြီးနောက်တော့ ဒီအခန်းလေးက ရွက်လှအတွက် ဝမ်းနည်းခြင်း ပြတိုက်လို ဖြစ်နေခဲ့သည်။ ဘာမှလည်း မပြင်ဆင်ချင်တော့ပဲ ပစ္စည်းဟောင်းတွေလည်း ဒီတိုင်းပဲ ထားထားသည်။ အဲဒါကြောင့်လည်း သူသူက သူမနှင့် လာနေဖို့ ခေါ်သောအခါ အားရဝမ်းသာ လိုက်နေခဲ့ခြင်း ဖြစ်သည်။

သူသူ့ဆီ ရောက်ကတည်းက ပြန်မကြည့်တော့ သောကြောင့် မိုးယိုတာတွေ တံခါးပျက်တာတွေ ကိုလည်း မပြင်နိုင်၊ လှည့်လည်း မကြည့်ချင်သောကြောင့် ခုချိန်မှာတော့ အခန်းကလည်း ဖုန်အထပ်ထပ်တက်ပြီး လူနေသည့် အခန်းနှင့် မတူပဲ ဖြစ်နေတော့သည်။ အဲဒီ အခန်းလေးကိုပဲ နေလို့ ရရုံလောက် ရှင်းပြီး အနီးအနားက စတိုးဆိုင် ခပ်သေးသေးလေးမှာ အကူအလုပ် လုပ်ပြီး နေနေသည်။ မေမေ့ကိုတော့ တစ်ပတ်တခါပဲ ခါတိုင်းလို သွားကြည့်ဖြစ်သည်။ မမဝင့်ဝါကတော့ ရွက်လှကို ဒေါသထွက်ပြီး လိုက်ရှာနေသေးသည်ဟု သူသူကပြောသည်။ သူသူကတော့ ရွက်လှ၏ တိုက်ခန်းဟောင်းလေး အကြောင်းကို ပြောမပြလိုက်ပါတဲ့။ ထွဋ်ထိပ်စိုး၏ မင်္ဂလာပွဲနှင့် ပတ်သက်ပြီး သတင်းတွေ လွှင့်မည်ဟု ပြောသွားသည် ဆို၏။ ခုချိန်လောက် ဆိုလျှင် မင်္ဂလာပွဲကို ဖျက်သိမ်းပြီးလောက်ပြီ ဟု ထင်သည်။ သူကတော့ ရွက်လှကို အဲလောက်ထိ လိုက်မရှာနိုင်ကောင်းပါဘူး လို့ ထင်ခဲ့သည်။ ခုတော့ ထင်မှတ်မထားပဲ သူနှင့်မှ တည့်တည့်တိုးရသည်။

ရွက်လှလည်း မတတ်သာတော့ပဲ မမဝင့်ဝါ အကြောင်း ပြောလိုက်ရသည်။ သူကတော့ မမဝင့်ဝါကို သေချာတောင်မှ မမှတ်မိပါ။ အကုန်ပြောပြသည် ဆိုသော်လည်း ရွက်လှ ရင်ထဲက ခံစားချက်တွေတော့ မပါဘူးပေါ့။ ပြောပြလို့လည်း အကျိုးမရှိနိုင်သည့် အရာတွေပဲ။ မမဝင့်ဝါရဲ့ ညှိုးမာန်ဖွဲ့မှုအောက်မှာ ရွက်လှတို့ နှစ်ယောက်က သားကောင်တွေ ဖြစ်ခဲ့ရတာလည်း ဖြစ်ဖို့ရှိလို့ ဖြစ်ရတယ်ပဲ သဘောထား လိုက်ပါတော့မည်။ ကိုကိုနှင့် ပျော်ရွှင်ခဲ့ရသော အခိုက်အတန့်လေး အတွက်တော့ ရွက်လှက မမဝင့်ဝါကို ကျေးဇူးတောင် တင်ချင်ပါသေးသည်။

“ဒါဖြင့် မင်း ကိုယ်နဲ့တွေ့ခဲ့တာ အဲဒီ ဝင့်ဝါဖူး ဆိုတဲ့ မိန်းမ စီစဉ်လို့ပေါ့ ဟုတ်လား၊ မင်း ကိုယ်နဲ့ ပတ်သက်ခဲ့သမျှ အားလုံးက ဟန်ဆောင်ထားတာပေါ့”
“ဟုတ်တယ်၊ အခု ဘာကြောင့် ဆိုတာ သိပြီ မဟုတ်လား၊ ကျွန်မ လုပ်ခဲ့သမျှ အတွက်တော့ တောင်းပန်ပါတယ်၊ မကျေနပ်သေးရင်လည်း မမဝင့်ဝါကိုပဲ သွားပြောပါတော့၊ ကျွန်မ သွားတော့မယ်”
“နေဦး၊ မင်းအိမ်ကို လိုက်ပို့ပေးမယ်”
ရွက်လှက ငြင်းသော်လည်း မရပဲ သူ့ကားပေါ် လိုက်ခဲ့ရသည်။ မလိုက်လျှင်လည်း ဒီနေရာကနေ အနီးဆုံး ကားမှတ်တိုင်ကို သွားဖို့ရာက ဝေးသေးသည်။

ရွက်လှက လမ်းထိပ်ရောက်တော့ ဆင်းပြီး လမ်းလျှောက်ခဲ့သည်။ ရွက်လှ နေသော တိုက်ခန်းတွဲကို ရောက်အောင် ခပ်ကျဉ်းကျဉ်း ခပ်ဆိုးဆိုး လမ်းကလေးကို လျှောက်ရသေးသည်။ သူ ရွက်လှကို ကြည့်နေမှန်း သိသော်လည်း ဂရုမစိုက်တော့ပဲ ခေါင်းငုံပြီး လျှောက်လာခဲ့သည်။

သူက သူ့ဖူးစာရှင် ဆိုပြီး ရွေးချယ်ခဲ့သော မိန်းကလေးက ဒီလို မိန်းကလေးမျိုး တဲ့လား။ သူတို့ နှစ်ယောက်မှာ တူညီသော ချစ်ခြင်းတွေ ရှိခဲ့သည် လို့ ခံစားနားလည် ခဲ့တာ တကယ်တော့ သူမဘက်က ဟန်ဆောင်တာ တဲ့လား။ သူတို့ ဇာတ်လမ်းက ဒီမှာတင် ပြီးဆုံးသွားပြီလား။ သူ ဘယ်လိုမှ မခံစားနိုင်ပါ။ ဘာပဲဖြစ်ဖြစ် သူမ အိမ်အထိတော့ လိုက်ကြည့်ဖို့ ဆုံးဖြတ်ပြီး နောက်က လိုက်လာခဲ့မိသည်။ သူမကတော့ သူလိုက်ကြည့်တာကို မသိပါ။

အိုဟောင်း ဆွေးမြေ့နေသော လေးခန်းတွဲ သုံးထပ်တိုက် ၏ အပေါ်ဆုံးထပ်အထိ သူမ တက်သွားသည်အထိ သူ နောက်က လိုက်လာခဲ့မိသည်။ အခန်းရှေ့ရောက်တော့ မဖွင့်သေးပဲနှင့် တိုက်ခန်းရှေ့မှာ ငုတ်တုပ်လေး ထိုင်ချလိုက်သောကြောင့် အပေါ်တက်မည့် သူ့ခြေလှမ်းတွေ လှေကားထစ်မှာ တန့်သွားပြီး အပေါ်ကို လှမ်းကြည့်လိုက်တော့ ရှိုက်ကြီးတငင် ငိုနေသော သူမကို တွေ့လိုက်ရသည်။ ခုနက သူ့ရှေ့မှာတုန်းကတော့ မျက်ရည်လည်နေသော မျက်ဝန်းကလေးများကို ထိန်းထားနိုင်ခဲ့သေးသည်။ ခုမှ ဘာကြောင့် ငိုနေရသလဲ မိန်းကလေး ရယ်။ အဲဒီ မျက်ရည်တွေဟာ ကိုယ်နဲ့ပတ်သက်လို့ ကျရတဲ့ မျက်ရည်တွေပဲလို့ ကိုယ့်ကိုယ်ကို အထင်ကြီး လိုက်ရတော့မလား။ သူ ပြန်လှည့်ဆင်းဖို့ ပြင်လိုက်ပြီးမှ သူ့စိတ်သူ မထိန်းနိုင်ပဲ ဆက်တက်လာခဲ့မိသည်။ ငိုနေသော မိန်းကလေးကို သူ ဒီတိုင်းထားပြီး မသွားရက်နိုင်။ သူမက သူ့အပေါ် ဘယ်လို သဘောထားခဲ့သည်ကို သေချာသိရမှ ဖြစ်မည်။ သူမဘက်က ဘယ်လိုပဲ အခြေအနေတွေ ပြောင်းပြောင်း သူချစ်ခဲ့သော မိန်းကလေးက သူမ တစ်ယောက်တည်းသာ ဖြစ်ပါသည်။
*******

ထိပ်ထား ကို သူတို့ နေဖို့ ပြင်ဆင်ထားသော တိုက်ခန်းသို့ အတင်းဆွဲ ခေါ်လာခဲ့သည်။ မင်္ဂလာပွဲမတိုင်ခင် အထိ သူ့မျက်စိရှေ့က ပျောက်ကွယ် မသွားစေလိုသောကြောင့် ဖြစ်သည်။
“မင်းက ကိုယ့်ကို နာမည် မပျက်စေချင်ဘူး ဆိုရင် ဒီမင်္ဂလာပွဲကို အစီအစဉ်အတိုင်း ဆက်လုပ်ရမယ် ထိပ်ထား”
“ဟင့်အင်း၊ အဲလို လုပ်လို့ မဖြစ်ဘူး၊ မမဝင့်ဝါက မင်္ဂလာပွဲ ပျက်အောင် လုပ်မှာပဲ၊ ခုတည်းက ဖျက်သိမ်းလိုက်တာ ကောင်းတယ်၊ ကျွန်မက ဖျက်သိမ်းလိုက်ပြီ လို့တောင် ထင်တာ”
“မဖျက်သိမ်းရသေးပါဘူး၊ အဲဒီနေ့ မတိုင်ခင် မင်းကို တွေ့အောင် ရှာမလို့ပဲ၊ ဟိုမှာ တွေ့လား၊ ဖိတ်စာတွေ၊ မင်းရောက်လာပြီ ဆိုတော့ ဒီနေ့ပဲ ဝေလိုက်လို့ရပြီ”
“ကိုကို ဘာတွေ လျှောက်လုပ်နေတာလဲ၊ ခုလောက်ဆို ကိုကို့အိမ်ကလည်း စိတ်ဆိုးနေလောက်ပြီ မဟုတ်လား”
“အဲဒါတွေ မင်းဘာမှ စိတ်ပူနေစရာ မလိုပါဘူး၊ ကိုယ်ပဲ ဖြေရှင်းမယ်၊ မင်းရဲ့ မမဝင့်ဝါကိုလည်း ကိုယ်ပဲ အရင် သွားတွေ့လိုက်မယ်၊ သူ့လိပ်စာသာ ပေးလိုက်”
“ကိုကိုရယ်.. မဖြစ်နိုင်တာတွေကို ဆက်မလုပ်ပါနဲ့တော့၊ ကျွန်မ အိမ်ပြန်ပါရစေ၊ နောက်လည်း လာမရှာပါနဲ့တော့”
“ဘာမှ မကြားချင်ဘူးကွာ၊ တစ်ခုပဲ မေးမယ်၊ မင်းမှာ ရွက်လှ အနေနဲ့ ကိုယ့်အပြင် နောက်ထပ် ချစ်သူ ရှိသလားပဲ ပြော”
“ရှင်”
“မင်းမှာ လက်ထပ်ဖို့ ရည်ရွယ်ထားတဲ့ ချစ်သူ ရှိသလားလို့ မေးတာ၊ ရှိရင်တော့ ကိုယ် လက်လျှော့ပေးလိုက်မယ်၊ ညာမယ်တော့ စိတ်မကူးနဲ့ ကိုယ် ခုချက်ချင်း သွားတွေ့မှာနော်”
“မရှိပါဘူး၊ ကျွန်မလို မိန်းကလေးကို ဘယ်သူက ကြိုက်မှာလဲ”
“ကောင်းတယ်၊ မင်းကို စားစရာ ဝယ်ပို့ ပြီးရင် ကိုယ် အိမ်ပြန်တော့မယ်၊ မင်းကို အပြင်ကနေ သော့ပိတ်သွားမှာနော်”
“ဟာ.. ကိုကိုက အဲလိုတော့ မလုပ်နဲ့လေ”
“မလုပ်ရင် မင်းက ထပ်ပြီး ထွက်ပြေးသွားမှာပေါ့၊ ဘယ်လို လုပ်မလဲ”
“ကျွန်မ အကြောင်း ကိုကို့ အိမ်ကလူတွေ သိသွားရင် သဘောတူတော့မှာ မဟုတ်ဘူး၊ ကျွန်မ ကြောက်တယ်၊ မဖြစ်ပါဘူး”
“မင်္ဂလာပွဲ မပြီးမချင်း မင်းအကြောင်းကို တစ်ခွန်းမှ မပြောနဲ့၊ မင်း မပြောရင် မသိပါဘူး၊ ဘေးကကြားတဲ့ သတင်းတွေကို ကောလဟာလတွေလို့ ပြောထားပြီးသား၊ မင်းထွက်သွားတဲ့ အကြောင်းကို တစ်ခုခု လုပ်ဇာတ်ခင်းလိုက်မယ်၊ ကိုယ့်တာဝန်သာ ထား”
“ဘာပဲဖြစ်ဖြစ် ကျွန်မ ကိုကို့ကို လက်မထပ်နိုင်ဘူး”
“လက်မထပ်နိုင်လို့ မဖြစ်ဘူး၊ ဒီကိစ္စက ကိုယ်က အတင်းအဓမ္မ လုပ်ခဲ့တဲ့ ကိစ္စလည်း မဟုတ်ဘူး၊ မင်းနဲ့ သဘောတူညီခဲ့တဲ့ ကိစ္စပဲ”
“ကိုကို့ကို အကြောင်းစုံ ပြောပြီးပြီပဲဟာ.. ကျွန်မကို လွှတ်ပေးပါတော့”
“မရဘူးကွာ.. မင်းလုပ်ခဲ့တဲ့ ကိစ္စ မင်း တာဝန်ယူရမှာပဲ၊ ဒီမင်္ဂလာပွဲကို အောင်မြင်အောင် လုပ်ပြီးရင် အနည်းဆုံး တစ်လတိတိ မင်း ဒီမှာ နေရမယ်၊ မင်း မကျေနပ်ရင် ကိုယ် မင်းကို လက်ဖျားနဲ့တောင် မထိဘူး၊ တစ်လ ပြည့်လို့မှ မင်း ကိုယ့်ကို လက်မထပ်ချင်တာ သေချာရင် ကိုယ် မင်းကို ပြန် ကွာရှင်းပေးမယ်”

*******

မနက်ပိုင်း လက်ထပ်စာချုပ်မှာ လက်မှတ်ထိုးပြီးနောက် ညနေဘက်မှာတော့ ထွဋ်ထိပ်စိုး နှင့် နေခြည်ထိပ်ထား ရဲ့ မင်္ဂလာပွဲက အောင်မြင်စွာ ပြီးဆုံးသွားခဲ့ပါသည်။ သူက ထိပ်ထား နဲ့ သူမဒေါ်လေးတို့ နယ်ဘက်က အမျိုးတွေဆီ သွားတုန်း ထိပ်ထားရဲ့ ဒေါ်လေး ဆုံးသွားသောကြောင့် ဒီကို ပြန်မလာနိုင်ပဲ ကြာနေရကြောင်း သူ့အိမ်ကို ပြောထားသည်။ ထိပ်ထားရဲ့ ဒေါ်လေး ဆိုသူကလည်း ပျောက်သွားပြီ ဖြစ်သောကြောင့် ဒီအကြောင်းပြကို အိမ်ကလည်း လက်ခံကြသည်။ ပွဲအတွက် အလုပ်ရှုပ်နေသယောင်နှင့် ထိပ်ထားနဲ့ မေမေတို့ မတွေ့အောင် သူက ရှောင်ခိုင်းထားခဲ့သည်။

“ထိပ်ထားဖြင့် ကြောက်လိုက်တာ၊ မမဝင့်ဝါ လာမှာလားလို့၊ ပွဲပြီးမှပဲ သက်ပြင်းချနိုင်တော့တယ်”
“ကိုယ် ဖြေရှင်းမယ်လို့ ပြောထားသားပဲ ထိပ်ထားရာ.. ဘာမှ ပူမနေပါနဲ့”
ဝင့်ဝါဖူးဆီမှာ သူဘယ်လို တောင်းပန်ခဲ့ရတယ် ဆိုတာကိုတော့ ထိပ်ထားကို ပြောပြမနေချင်ပါ။ မင်္ဂလာပွဲမှာ လာပြီး မနှောက်ယှက်ဖို့ အတွက် ဝင့်ဝါဖူး ရှေ့မှာ သူ ဒူးထောက် တောင်းပန်ခဲ့ရသည်။ ဒါတောင် သူမက မင်္ဂလာပွဲမှာ မလာဖို့ပဲ ကတိပေးပြီး သူ့မိသားစုတွေကိုတော့ ထိပ်ထား အကြောင်း စာပို့ဖြစ်အောင် ပို့မယ်လို့ ခြိမ်းခြောက် သွားသေးသည်။
“ဒါပေမယ့် ထိပ်ထား ကိုကို့ မေမေတို့ကို အကြာကြီး လိမ်ညာမထားချင်ပါဘူး၊ ထိပ်ထားက သဌေးသမီး တစ်ယောက် မဟုတ်ဘူး ဆိုတာ အမှန်အတိုင်း ပြောပြချင်တယ်”
“ကောင်းပြီလေ၊ ကိုယ်တို့ ဟန်းနီးမွန်းက ပြန်လာရင် ပြောလိုက်တာပေါ့၊ ကိုယ်တို့မှာ ခံနိုင်ရည် ရှိဖို့တော့ လိုလိမ့်မယ်”

ဟန်နီးမွန်း ဆိုပေမယ့် သူများလို ကမ်းခြေ မသွားဖြစ်ပဲ ပုဂံ ညောင်ဦး ဘုရားဖူးပဲ သွားလိုက်ကြသည်။ ရွက်လှကို ကိုကို့ မိသားစုက လက်ခံပါစေကြောင်း ဆုတွေ တောင်းခဲ့ရတာလည်း အမောပင်။

နောက်ဆုံးတော့ ရွက်လှတို့ ကြိုတွေးထားသော အခြေအနေကို ပြန်လာလာခြင်းမှာပင် ကြုံလိုက်ရသည်။ ဝင့်ဝါဖူး ပေးသော စာတစ်စောင် ရောက်နှင့်နေခြင်းပင်။ ရွက်လှကလည်း ရည်ရွယ်ထားသည့် အတိုင်း ဝန်ခံလိုက်ပါသည်။ အဲဒီမှာတင် ကိုကို့ အဘွားက အကြီးအကျယ် စိတ်ထိခိုက်ပြီး မူးလဲသွားသည်။ ကိုကို့မေမေကလည်း ရွက်လှကို နှစ်ပြား မတန်အောင် ပြောဆိုပြီး နှင်ချသည်။ အခုချက်ချင်း ကွာရှင်းဖို့ တောင်းဆိုသည်။ ကိုကို့ဖေဖေ တစ်ယောက်သာ ကြားနေဝါဒီ လုပ်နေသည်။ ဒီလို ဖြစ်လိမ့်မယ် ဆိုတာ ကြိုသိပြီးသားမို့ ကိုကို့ကို ဆက်မလုပ်ပါနဲ့လို့ တောင်းပန်သည့်ကြားက သူက ဇွတ်တိုးခဲ့တာပင်။ ရွက်လှ လို မိန်းကလေး အနေနှင့် ဒီမိသားစု ကြားမှာ မျက်နှာပြောင်တိုက်ပြီး ဆက်နေသွားဖို့ ဆိုတာ သိပ်ကို မလွယ်သော ကိစ္စတစ်ခုပါ။ ကိုကိုကတော့ ချက်ချင်း ကွာရှင်းလျှင် သူ့ပတ်ဝန်းကျင်မှာ နာမည်ပျက်ရမှာမို့ တစ်လလောက် နေမှ စဉ်းစားပါရစေ ဟု ဆိုသည်။ ရွက်လှတို့ နှစ်ယောက်က ခွဲနေဖို့ နဂိုတည်းက စီစဉ်ထား၍သာ တော်သေးသည်။ သူ့မိသားစု အိမ်မှာသာဆို တစ်နာရီလောက် ဆက်နေဖို့တောင် ဝံ့ရဲမှာ မဟုတ်ပါ။

ဘာပဲဖြစ်ဖြစ် ရွက်လှ အပြစ်လို့ပဲ ခံယူပါတယ်။ အညှိုးကြီးသူက မမဝင့်ဝါ ပေမယ့် ခံရသူ သားကောင်က ရွက်လှ ရယ်ပါ။ ကိုကို ကွာရှင်းမယ် ဆိုတဲ့ တစ်လပြည့်တဲ့ အချိန်မှာ ရွက်လှ ကိုကို့ဘေးနားက ပျောက်သွားပါတော့မယ်။ ဒီတစ်ခါတော့ ကိုကိုလည်း သူ့မိသားစုကို ခြေစုံကန်ပြီး လိုက်ရှာမယ် မထင်တော့ပါ။

ရွက်လှက တစ်လပြည့်လျှင် ထွက်သွားဖို့ ပြင်ဆင်ပြီးသားမို့ ဧည့်သည်အတွက် ထားသည့် အခန်းထဲမှာပဲ နေဖို့ ဆုံးဖြတ်ပြီး နေသည်။ ကိုကိုကလည်း ဘာမှမပြောပဲ သူတစ်ယောက်တည်း နှစ်ယောက်အိပ်ခန်းမှာ နေသည်။ ထွက်သွားဖို့ ပြင်ထားပြီးသား ဆိုပေမယ့် ကိုကို့ဇနီးအဖြစ် နေသည့် အချိန်ကလေး အတွင်းမှာ ကိုကို့မိသားစု နှင့် တတ်နိုင်သမျှ ပြေလည်မှု ရချင်သဖြင့် ရွက်လှက တတ်နိုင်သလောက် ကြိုးစားပါသည်။ ကိုကို့ အဘွားကို ဆံပြုတ် သွားပို့တော့လည်း နှင်ထုတ် ခံရသည်။ ကိုကို မသိအောင် ကိုကို့အိမ်ကို သွားပြီး ချက်ပြုတ်ပေးဖို့လည်း ကြိုးစားနေသည်။

ကိုကိုကတော့ ရွက်လှမှာ မပြည့်စုံသေးသည့် ပညာအရည်အချင်းတွေ ပြည့်စုံစေချင်၍ ထင်သည်။ ရွက်လှ အိမ်မှာ အားနေတာပဲ ဆိုပြီး သင်တန်းတွေ အများအပ်ပေးထားသည်။ ကွန်ပျူတာသင်တန်း၊ အင်္ဂလိပ်စကားပြော၊ အတွင်းရေးမှူး သင်တန်း။ အဲဒါတွေ အားလုံး တက်ရမည် ဆိုတော့ ရွက်လှမှာ အားချိန်ပင် မရှိတော့ပါ။ ဒါပေမယ့် ရွက်လှက အခြေအနေကြောင့်သာ အဝေးသင် တစ်ဘွဲ့လောက်နှင့် ကျေနပ်နေရသူပါ။ တကယ်တော့ နောက်ဆုံးနှစ်မှာ ကွာလီဖိုင်းတောင် ထွက်ခဲ့သေးသည်။ ပညာရပ် အသစ်တွေ သင်ရတာ ရွက်လှလည်း သဘောကျပါသည်။ ကိုကိုကလည်း အလုပ်သွား၊ ရွက်လှကလည်း သင်တန်းသွားနှင့်.. နှစ်ယောက်သား တစ်နေကုန် အပြင်ထွက်ပြီး ညနေမှသာ တွေ့ဖြစ်ကြသည်။ ကိုကိုက ရွက်လှကို ဖုန်းတစ်လုံး ဝယ်ပေးထားရာ တစ်နေ့ တစ်ခါ လောက်တော့ ဖုန်းဆက်ပြီး check သည်။
မေမေ့ကိုတော့ ခါတိုင်းလိုပဲ တစ်ပတ်တစ်ခါ သွားတွေ့သည်။ ကိုကိုက မလိုက်ပါနဲ့ ပြောလည်း မရပဲ အတင်းလိုက် လိုက် လာသည်။ မေမေက ခုတလော အနည်းငယ် သိတတ်နေပြီမို့ ကိုကို့ကို သား သား နှင့် ခင်မင်နေပြီ။ ထိပ်ထား ကိုကို့ဆီက တစ်နေ့ ထွက်ခွာလာမှာမို့ မေမေ့ကို ကိုကို့ အပေါ် သိပ်ပြီး သံယောဇဉ် မတွယ်စေချင်ပါ။
*******

သူ့အိမ်က သဘောမတူတာ တစ်ခုကလွဲလျှင် သူတို့နှစ်ယောက်ဘဝက အဆင်ပြေနေသားပင်။ ဖေဖေနှင့် ဒေါ်လေး ကတော့ သူ့ဖူးစာပဲလို့ သတ်မှတ်ပြီး ထိပ်ထားကိုလည်း ချစ်ခင်ရင်းစွဲက မပျက်ပေမယ့် မေမေ နှင့် ဘွားဘွားကတော့ ခုချိန်ထိ ထိပ်ထားအပေါ် မကြည်လင်နိုင်သေးပါ။ မေမေတို့ ချစ်ခင်မှုကို ရဖို့ ထိပ်ထား ကြိုးစားနေတာလည်း သိပါသည်။ လက်ထပ်စဉ်က တစ်လပြည့်လျှင် ကွာနိုင်သည်ရယ်လို့ ထိပ်ထားကို ပြောခဲ့မိတာကို သူကတော့ လုံးဝ မေ့နေပါပြီ။ ထိပ်ထားလည်း မေ့နေပြီ ထင်ပါသည်။ သူတို့ နှစ်ယောက်က တစ်ခန်းတည်း အတူမနေတာက လွဲလျှင် တစ်သားတည်း ဖြစ်နေပြီဟု သူကတော့ ယုံကြည်ထားပါသည်။

“ထွဋ်ထိပ်ရေ.. ရွက်လှ အမေ ထွက်ပြေးသွားလို့ မြန်မြန်လာခဲ့ကွာ၊ ရွက်လှ ဖုန်းကိုလည်း ဆက်မရလို့”
ဒေါက်တာမောင်မောင်က ဖုန်းဆက်သဖြင့် သူ အပြေးအလွှား ဆေးရုံသွားရသည်။ ရွက်လှ ဖုန်းကလည်း တကယ်ကို ဆက်လို့မရပါ။ သင်တန်းချိန်မို့ ဖုန်းပိတ်ထားသလားတော့ မသိပါ။
“ခုတလော သိတတ်နေပြီ ဆိုပြီး ဆေးရုံဝင်းထဲ ထွက်ခွင့်ပေးထားတာကွာ၊ သူနာပြု ဆရာမက ခဏလေး အနားမှာ မရှိတုန်း ခုလို ပျောက်သွားတာပဲ၊ အပြင်ထွက်သွားတယ် ထင်တာပဲ၊ ခါတိုင်းတော့ ဘယ်မှ မသွားတတ်ပါဘူး”
ဒေါက်တာမောင်မောင်က သူ့လူနာ အကြောင်း ပြောသည်။ သူရော၊ မောင်မောင်ရော၊ သူနာပြုဆရာမရော.. အစောင့်တွေရော အနီးအနားမှာ လိုက်ရှာကြရသည်။ သူလည်း အနီးအနားထက် နည်းနည်းဝေးသည့် နေရာတွေ အထိ ကားနဲ့လည်း ပတ်ရှာသည်။ အပြင်ထွက် ဆင်းလျှောက်ပြီးလည်း ရှာသည်။ မတွေ့ပါ။ တွေ့မယ့် တွေ့တော့ ဒေါက်တာမောင်မောင်ကပဲ အရင်တွေ့သွားသည်။ မောင်မောင့်ကို မြင်တော့ သူ့ကို ပြန်ခေါ်တော့မည် ဆိုပြီး အမေက ပြေးသည်။ ပြေးရင်းနှင့် လမ်းမပေါ် ရောက်သွားတော့ သူ့ ကံကြမ္မာက မတွေးဝံ့စရာ ဖြစ်သွားသည်။

ကိုကို သင်တန်းကို လိုက်လာပြီး အမေ့အကြောင်းပြောတော့ ရွက်လှမှာ မယုံနိုင်အောင် အရုပ်ကြိုးပြတ် ဖြစ်သွားသည်။ အမေတို့ သားအမိ သားအဖ သုံးယောက်မှာ အတိတ်ဘဝ တစ်ခုခုက မကောင်းတဲ့ ဝဋ်ကြွေး တစ်ခုခု အတူတူ ရှိခဲ့ပုံပေါ်သည်။ ဖေဖေတို့ အက်ဆီးဒင့်မှာ မပါသွားပေမယ့် မေမေလည်း အက်ဆီးဒင့်နှင့်ပင် အသက်ဆုံးရှုံးရရှာသည်။ မေမေ ဘယ်လိုပဲဖြစ်နေနေ ရွက်လှအတွက်က တိုင်တည်ရာ အားကိုးရာ တစ်ခု ဖြစ်နေဆဲမို့ မေမေ ရှိနေပေးတာကပင် ရွက်လှအတွက် အားတစ်ခု ဖြစ်ခဲ့ပါသည်။ အခုတော့ မေမေ မရှိတော့။ မေမေ့အတွက် ဝဋ်ကျွတ်သွားတယ်လို့ ပြောလည်း ရပေမယ့် ရွက်လှ အတွက်ကတော့ ဖြည်မဆည်နိုင်စရာပင်။

ဒီနေ့က ရွက်လှက ကိုကိုနှင့် လက်ထပ်တာ တစ်လပြည့်သည့်နေ့ ဖြစ်သည်။ ကိုကိုက သတိမထားမိပေမယ့် ရွက်လှက သတိထားနေသူ ဖြစ်သောကြောင့်သိသည်။ အရင်ကတည်းက ကိုကိုက ရွှဲ့ပြီး လက်ထပ်စာချုပ်နှင့် အတူ ဝယ်ထားသည့် ကွာရှင်းစာချုပ်မှာ လက်မှတ်ထိုးခဲ့သည်။ ကိုကို့ကို ပြောလျှင် လက်ခံမှာ မဟုတ်တာ သေချာတာမို့ တစ်ယောက်တည်း တိတ်တိတ် လုပ်သွားဖို့ အရင်တည်းက ဆုံးဖြတ်ပြီးထားခဲ့သည်။ ရွက်လှ သုံးနေကျ၊ ဝတ်နေကျ  ပစ္စည်းလေး နည်းနည်းပဲ ယူပြီး အိမ်က ဆင်းခဲ့သောကြောင့် ကိုကို ပေးထားသည့် မိုဘိုင်း ဖုန်းကိုလည်း အခန်းထဲမှာ သေချာ ထားပစ်ခဲ့သောကြောင့် ရွက်လှကို ဖုန်းဆက်မရခြင်း ဖြစ်သည်။ ရွက်လှကို ဖုန်းဆက်လို့ ရပြီး မေမေ့ကို အရင် လိုက်ရှာဖြစ်ခဲ့လျှင် ဒီလို ဖြစ်ချင်မှ ဖြစ်မည်။ မေမေ ဒီလို ဖြစ်ရတာ ရွက်လှအပြစ်လည်း ပါသည် ဆိုပြီး ကိုယ့်ကိုယ်ကို အပြစ်တင်မိသည်။

မေမေ့ကိစ္စနှင့် ပတ်သက်ပြီး ကိုကိုကပဲ အားလုံးစီစဉ်ပေး၊ ရွက်လှလည်း စိတ်ထိခိုက်နေသောကြောင့် ကိုကို့ တိုက်ခန်းမှာပဲ ပြန်နေဖြစ်သည်။ တကယ်တော့ ကိုကိုက ရွက်လှ ဆင်းသွားခဲ့တာကို သိကို မသိလိုက်ပါ။ မေမေ့ ရက်လည်ကိုတော့ ကိုကို့မေမေကပဲ သူတို့ ကိုးကွယ်နေကြ ဘုန်းကြီးကျောင်းမှာ စီစဉ်ပေးသည်။ လာတာတော့ မလာ။ ဖေဖေ နှင့် ဒေါ်လေးပဲ လာသည်။ ကိုကိုကတော့ ရွက်လှ စိတ်ထိခိုက်နေတာနှင့် ပိုပြီး ဂရုစိုက်ပေးနေသည်။

*******
မေမေ့အကြောင်း မေ့ထားပြီး သင်တန်းတွေ ပြန်တက်၊ နေမြဲတိုင်း ပြန်နေရင်း ရွက်လှလည်း ကွာရှင်းသည့် ကိစ္စကိုပင် မေ့သွားသည်။ ကိုကို့ မေမေကလည်း ရွက်လှကို သနားပြီး အရင်ထက် ပိုပျော့ပြောင်းလာသည်။ ရွက်လှ မေ့သွားသည့် အချိန်မှာမှ ကိုကိုက သူ့အိပ်ခန်း အံဆွဲထဲမှာ ထားခဲ့မိသည့် ရွက်လှ တစ်ယောက်တည်း လက်မှတ်ထိုးထားသည့် ကွာရှင်းစာချုပ်ကို တွေ့သွားသည်။

“နေပါဦး ဒါက ဘာသဘောလဲ၊ ထိပ်ထားက ဘယ်တုန်းက လက်မှတ်ထိုးထားတာလဲ” တဲ့ ။ ကိုကိုက မေးတော့ အဲဒီနေ့က အကြောင်းကို အမှန်အတိုင်း ပြောလိုက်ရသည်။ အဲဒီမှာ ကိုကိုက ဒေါသ ထွက်တော့သည်။
“ထိပ်ထားက တကယ်ပဲ ကိုယ့်ကို ကွာရှင်းဖို့ စဉ်းစားထားတယ်ပေါ့၊ ကိုယ်ကတော့ လက်ထပ်ကတည်းက တစ်ခါမှ အဲဒီလို မစဉ်းစားခဲ့ဖူးဘူး၊ မေမေတို့ သဘောတူလာအောင် ဖြည်းဖြည်းချင်း ကြိုးစားကြမယ် လို့ပဲ တွေးထားတာ၊ ထိပ်ထားက ကိုယ့်အပေါ် တကယ် ရက်စက်တာပဲ၊ ကိုယ့်ကို ချန်ထားခဲ့ဖို့ သတ္တိရှိတယ်ပေါ့“

“မဟုတ်ဘူး၊ ကိုကို့ကို ချန်ထားခဲ့ဖို့ သတ္တိရှိလွန်းလို့ မဟုတ်ပါဘူး၊ ဒီလိုပဲ ဖြစ်သင့်တယ် ထင်လို့ပါ၊ ကိုကိုပဲ ကွာရှင်းစာချုပ်လည်း တစ်ခါတည်း ဝယ်ထားခဲ့တယ် မဟုတ်လား၊ ဒီကနေ ထွက်သွားဖို့ အစကတည်းက ပြင်ဆင်ခဲ့ပြီးသားပါ။ ဒါပေမယ့် ကျွန်မ တကယ် ကိုကို့ အရိပ်အောက် မသွားချင်ပါဘူး။ မတတ်သာလို့...”

“မတတ်သာ စရာ ဘာရှိလဲ၊ မေမေတို့ကလည်း တဖြည်းဖြည်းနဲ့ ကိုယ့်ကို မပစ်နိုင်တော့ ထိပ်ထားကို လက်ခံလာမှာပဲ၊ အဓိပ္ပါယ် မရှိဘူးကွာ၊ ကိုယ် စိတ်ဆိုးတယ်၊ ခုရော သွားဦးမှာလား၊ ဒီတစ်ခါ သွားရင်တော့ ကိုယ်လုံးဝ လိုက်မခေါ်ဘူးနော်”
“ဟင့် ဟင့် .. အဲဒါ ကိုကိုက ကျွန်မ မရှိပဲ နေနိုင်တယ်လို့ ပြောချင်တာလား၊ ကျွန်မကတော့ ကိုကို တစ်ယောက်တည်းပဲ ချစ်ခဲ့တာ၊ ကိုကို့အနားမှာ မနေရရင်တောင် ကိုကို့ကို အမြဲတမ်း ချစ်နေမှာကို.. ပြောရက်လိုက်တာ”

နောက်ဆုံးတော့ ထိပ်ထားက တအိအိနဲ့ ငိုတော့ သူကပဲ ပြန်ချော့ရသည်။
“တော်ပြီကွာ၊ မငိုနဲ့တော့နော်.. နောက်ကို ကိုယ့်ဆီကနေ ထွက်သွားမယ် ဆိုတဲ့ စကားလည်း ဘယ်တော့မှ မပြောနဲ့၊ ကိုယ်က တကယ်တန်းတော့ ထိပ်ထား မရှိပဲ မနေနိုင်ပါဘူး၊ ကိုယ် ထိပ်ထားကို ဘယ်လောက် ချစ်တယ် ဆိုတာ သိရဲ့သားနဲ့ မဆိုးနဲ့နော်၊ မေမေ လက်ခံလာအောင် ကိုယ်တို့ အတူတူ ကြိုးစားကြမယ် ဟုတ်ပြီလား”
ထိပ်ထားက မျက်ရည်တွေကြားက ခေါင်းညိတ်ပြသည်။
“ကိုကို့ကို ထားခဲ့ဖို့ ကြိုးစားမိတဲ့ အတွက် တောင်းပန်ပါတယ် ကိုကိုရယ်၊ နောက်ဆို ဘာပဲ ဖြစ်ဖြစ် ကိုကို အနားကနေ ထွက်မသွားတော့ပါဘူး နော်..”

အပြင်ဘက်မှာ မိုးအုံ့နေသော ရာသီဥတုကလည်း  တိမ်တွေကြားက တိုးထွက်လာသော နေခြည်တစ်စကြောင့် ချက်ချင်းပင် သာယာ ကြည်လင်လာတော့သည်။

သိင်္ဂါကျော်

21 July, 2011

ညှိုးမာန်ဖွဲ့ လှည့်ကွက်ထဲက သားကောင် (၂)



ရွက်လှသည် ဟောင်းနွမ်း ရှုပ်ပွနေသော သူ့အခန်းကျဉ်းလေးထဲတွင် စိတ်နှင့် လူနှင့် မကပ်သလို နံရံထောင့်မှာ မှီကပ်၍ ထိုင်နေမိသည်။ အရင်ကတည်းက ဒီလို အချိန်မျိုးအတွက် ကြိုတင် တွေးတောပြင်ဆင်ပြီးသားဖြစ်ပါလျက် တကယ် ရောက်လာပြန်တော့လည်း မခံစားနိုင်ပါ။ ဘာကြောင့်များ ဒီအလုပ်မျိုးကို လက်ခံ လိုက်မိပါလိမ့်။ ရွက်လှကိုယ် ရွက်လှ သိပ်ကို အသည်းမာလှသူကြီးလို့ ထင်ခဲ့လို့များလား။ ဘာပဲဖြစ်ဖြစ် ဒီလို နောင်တရဖို့တော့ မရှိပါဘူး။ မေ့မေ့ ဆေးဖိုးတွေ အဆင်ပြေခဲ့ရတာကိုကပဲ မမဝင့်ဝါရဲ့ ကျေးဇူး ရှိနေပြီ မဟုတ်လား။ မမဝင့်ဝါ ဖြစ်စေချင်သလို အဆုံးထိ မလုပ်ပေးနိုင်တာကိုတော့ ရွက်လှ စိတ်မကောင်းပါဘူး။

ရွက်လှ ဖေဖေက ပွဲရုံက စာရေးကြီး ဖြစ်ခဲ့ပြီး မေမေကတော့ သာမန် အိမ်ရှင်မ တစ်ယောက်သာ ဖြစ်ခဲ့သည်။ ရွက်လှမှာ ၁၀နှစ် တိတိ ငယ်သော မောင်လေး တစ်ယောက်လည်း ရှိခဲ့သည်။ ရွက်လှ ၁၀ တန်း အောင်ပြီးသော နှစ်မှာပဲ ဖေဖေနှင့် မောင်လေးက ဆုံးသွားခဲ့သည်။ ဘုရားဖူး ခရီးက အပြန် အဝေးပြေးကားကြီး မှောက်ပြီး မေမေ  တစ်ယောက်သာ အသက်ရှင်ကျန်ခဲ့သည်။ အဲဒီခရီးမှာ ရွက်လှ တစ်ယောက်သာ ကလေးတွေကို စာသင်နေသော အလုပ် ရှိနေသဖြင့် ကျန်ခဲ့ခြင်း ဖြစ်သည်။ မေမေ့ ခမျာလည်း သူ့မျက်စိ ရှေ့မှောက်မှာ ဖေဖေ နှင့် မောင်လေးကို သွေးသံရဲရဲ ရုပ်ပျက် ဆင်းပျက် သေဆုံး သွားသည်ကို မြင်လိုက်ရသောကြောင့် အသိစိတ် ကင်းမဲ့ကာ ရူးသွပ်သော အဖြစ်သို့ပင် ရောက်ခဲ့ရသည်။ အဲဒီနောက်တော့ ရွက်လှတစ်ယောက် ကိုယ့်ဘဝကိုယ် ကျောင်းခဲ့ရသည်။ တက္ကသိုလ် တက်ဖို့လည်း စိတ်ကူး မယဉ်ရဲတော့ပဲ ရရာ အလုပ်ဝင်လုပ်ကာ အဝေးသင်သာ ဆက်တက်ခဲ့ရသည်။ ရွက်လှကလည်း တနေကုန် အလုပ်လုပ်နေရသည့်ပြင် မေမေ့ အခြေအနေကလည်း အိမ်မှာ ထားဖို့ပင် မဖြစ်နိုင်သောကြောင့် စိတ်ရောဂါကု ဆေးရုံသို့ ပို့ထားလိုက်ရသည်။

ရွက်လှ အဝေးသင်တက္ကသိုလ်က ဘွဲ့ရပြီးနောက် မမဝင့်ဝါတို့ ပိုင်ဆိုင်သော ဖက်ရှင်ဆိုင်ကြီးမှာ သူငယ်ချင်း သူသူ နှင့် အတူ အရောင်းစာရေးမ အလုပ်ရခဲ့သည်။ အဲဒီမှာတင် မမဝင့်ဝါက ရွက်လှရဲ့ သားနား သန့်ပြန့်သော ရုပ်ရည်လေးကို သတိထားမိသွားရာက ဒီဇာတ်လမ်း စတင်ခဲ့ခြင်း ဖြစ်သည်။ ဆိုင်ပိုင်ရှင် သဌေးသမီး ဝင့်ဝါဖူးက ရွက်လှတို့နှင့် ရွယ်တူလောက်သာ ရှိဦးမှာပေမယ့် အားလုံးက မမဝင့်ဝါ ပဲ ခေါ်ကြသည်။ မမဝင့်ဝါက ရွက်လှ အမေ အကြောင်း သိပြီး အများကြီး အကူအညီ ပေးခဲ့သည်။ ရွက်လှ မပေးနိုင်ပဲ ဖြစ်နေသော မေမေ့ ဆေးဖိုးတွေကိုလည်း ရှင်းပေးခဲ့ဖူးသည်။ တစ်နေ့တော့ မမဝင့်ဝါက ရွက်လှကို ပြောစရာ ရှိသည် ဆိုပြီး ကော်ဖီဆိုင် တစ်ဆိုင်ကို ခေါ်သွားခဲ့သည်။ ယောက်ျား တစ်ယောက်ကို လက်စားချေမည့် ဇာတ်လမ်းထဲတွင် ရွက်လှကို မင်းသမီး လုပ်ခိုင်းခြင်းပင် ဖြစ်သည်။

ဝင့်ဝါဖူး ဆိုတာ ပြင်သစ်က Fashion Design ပညာ ဒီပလိုမာ ရပြီး မိန်းကလေးဝတ် ဖက်ရှင်ဆိုင်ကြီး ထောင်ပြီး ကိုယ့် စီးပွားရေး ကိုယ် ဦးဆောင်နေသူ။ ရုပ်ရည်ဆိုတာကလည်း ဘယ်ယောက်ျားမှ နှစ်ခါပြန် မကြည့်ပဲ မနေနိုင်အောင် ဆွဲဆောင်မှု ရှိသူ ဟု အားလုံးက သတ်မှတ်ထားသူ။ ဝင့်ဝါဖူးကို စကားကမ်းလှမ်းသူတွေ အမြောက်အမြား ရှိပေမယ့် ဘယ်သူ့ကိုမှ စိတ်ကြိုက်မတွေ့သေးပဲ ခေါင်းခေါက် ရွေးနေတုန်းသာ ဖြစ်သည်။ အဲဒီ အချိန်မှာ အောင်သွယ် တစ်ယောက်က လာပြသော အမျိုးသား တစ်ယောက်ကိုတော့ ဝင့်ဝါဖူး သတ်မှတ်ထားသော အချက်တွေ အားလုံးလိုလို နှင့် ကိုက်ညီသူ ရယ်လို့ တွေ့ဆုံဖို့ လက်ခံလိုက်မိခဲ့သည်။ ဝင့်ဝါဖူးက စကာနှင့် စစ်သောနေရာ တင်ကျန်သော ထို တစ်ယောက်က အတော် ကံကောင်းသူလို့ပင် ပြော၍ ရသည်။ ဝင့်ဝါဖူး အထင်က တစ်ဖက်လူက လက်ခံပြီး ၍သာ သူမကို တွေ့သည်ဟု ထင်ခဲ့သည်။ သို့သော် တွေ့ကြပြီး နောက်မှာ ဝင့်ဝါဖူး ထင်သလို မဟုတ်ကြောင်း တွေ့ရသည်။ ထိုလူက မိဘ အစီအစဉ် ကြောင့်သာ ဝင့်ဝါဖူးကို တွေ့ရခြင်း ဖြစ်ပြီး သူ့မှာ အိမ်ထောင်ပြုဖို့ စိတ်ကူး မရှိသေးသောကြောင့် ဝင့်ဝါဖူးကို လက်မခံနိုင်ပါကြောင်း ပထမဆုံး တစ်ခေါက်မှာပင် ပြတ်ပြတ်သားသား အငြင်းခံလိုက်ရသည်။

ဝင့်ဝါဖူး တစ်သက်မှာ သူမက ငြင်းခဲ့ရတာတွေသာ ရှိလျှက် သူမကို မလိုလားသူတော့ မရှိစဖူး။ သူမ မျက်နှာကို စေ့စေ့ ကြည့်ပြီး ခံစားချက် မရှိသော မျက်နှာနှင့် ငြင်းလိုက်သော ယောက်ျား တစ်ယောက်ကြောင့် သူမ မာနကို အကြီးအကျယ် ထိခိုက်သွားသည်။ သူ့ ရုပ်ရည်ကို ကြည့်ပြီး သူမဘက်က အနည်းငယ်တောင်မှ စိတ်ကူးယဉ် ကျေနပ် နေမိခဲ့သောကြောင့်လည်း ပိုပြီး စိတ်နာစရာ ဖြစ်ရသည်။ စုံစမ်းကြည့်လိုက်တော့ သူမိဘတွေက စီစဉ်ပေးသူ မိန်းကလေး အားလုံးကို သူ့ဘက်က အကြောင်းပြချက် မရှိ ငြင်းနေခဲ့ကြောင်း သိခဲ့ရသည်။ သူက ဂေးလ် မဟုတ်ရင် ဘယ်လောက် ကြီးကျယ်သောသူလဲ။ သူ့မာနကို ဘယ်လို ပြန်ချိုးရမလဲ၊ ဘယ်လို မိန်းကလေးမျိုး ကိုမှ သူ သဘောကျမှာလဲ၊ ဆိုတာ ဝင့်ဝါဖူး အချိန်တိုင်း စဉ်းစားနေခဲ့သည်။ ဆံပင်ရှည်ရှည်၊ အသားဖြူဖြူ မပြင်မဆင်နဲ့တောင်မှ ချစ်စရာ ကောင်းသော ဝန်ထမ်း ကောင်မလေးကို တွေ့သောအခါ တစ်ခါလောက်တော့ စမ်းကြည့်ဖို့ အကြံတစ်ခု ရခဲ့သည်။ သူမက တကယ့်ကို အဆင့်အတန်း နိမ့်သော မျိုးရိုးက။ အမေကလည်း စိတ္တဇ ဆေးရုံမှာ။ ကဲ.. တကယ့်ကို မျိုးကောင်း ရိုးကောင်း ဂရိတ် မိန်းကလေးကိုမှ လိုချင်တယ် ဆိုတဲ့ သူလို လူမျိုး အတွက် ဘယ်လောက် သင့်တော်မယ့် မိန်းကလေးမျိုးလဲ..။ ဝင့်ဝါဖူးကို ငြင်းလိုက်တဲ့ သူ့အတွက် အဲဒီလို အဆင့်အတန်းနဲ့ မိန်းကလေးမျိုးနဲ့ ဖြစ်သွားစေချင်သည်။ ဒီတစ်ယောက်ကို သူမကြိုက်ရင် နောက်တစ်ယောက် ထပ်ရှာမည်။ အဲဒီလို လုပ်ရမှ ဝင့်ဝါဖူး စိတ်ကျေနပ် နိုင်လိမ့်မည်။

မမဝင့်ဝါ စကားတွေကို ကြားရသောအခါ ရွက်လှလည်း အလွယ်တကူ လက်ခံခဲ့မိသည်။ မမဝင့်ဝါက အမေ့အတွက် တစ်နှစ်စာ ဆေးရုံစားရိတ်ကို တာဝန်ယူပေးမည် ဟု ပြောခဲ့သည်ကိုး။ အဲဒီ ကြီးကျယ်လှတဲ့ ယောက်ျား တစ်ယောက် အတွက် အဲဒီလောက် နာမည်ပျက်မှုက ဘာမှ မမှုလောက် ဟု ထင်ခဲ့သည်။ ရွက်လှ အတွက်လည်း ဘဝနှင့် ရင်းရသည် အထိ မလုပ်စေရပါ လို့ မမဝင့်ဝါက ကတိပေးခဲ့သည်။ ရွက်လှရဲ့ တာဝန်က ရွက်လှကို အဲဒီယောက်ျား သဘောကျ ရွေးချယ် သွားစေဖို့ပဲ။ အဲဒီလူ သဘောကျလို့ မင်္ဂလာဧည့်ခံပွဲ ကြီးကြီးကျယ်ကျယ် လုပ်ပြီးလျှင် အဲဒီ မင်္ဂလာပွဲမှာ ရွက်လှရဲ့ ဘဝမှန်ကို အားလုံး သိသွားအောင် လုပ်ပြီး ရွက်လှကတော့ ထွက်လာခဲ့ရုံပဲတဲ့..။ ရွက်လှ အတွက် အဆောင်အယောင် အဆင့်အတန်း နှင့် အခြေအနေ တစ်ခုကို မမဝင့်ဝါက အားလုံး စီစဉ်ပေးသည်။ လက်ရှိနေနေသော ရွက်လှ သူငယ်ချင်း သူသူ့ အခန်းက ပြောင်းပြီး မမဝင့်ဝါ စီစဉ်ပေးထားသည့် တိုက်ကြီးမှာ ရွက်လှကို သွားနေခိုင်းသည်။ သူသူက နယ်ကပေမယ့် ချောင်လည်သော မိသားစုကမို့ အဆောင်ကောင်းကောင်း အခန်းကျယ် တစ်ခန်း ငှားနေရာ ထိုအဆောင်က ရွက်လှတို့ လုပ်သော ဆိုင်နှင့် နီးသောကြောင့် ရွက်လှကိုလည်း သူသူက သူ့အခန်းမှာပဲ အတူနေစေခဲ့ခြင်း ဖြစ်သည်။ အခု ကိစ္စကိုလည်း သူသူ့ကို အကုန် ပြောပြထားသောကြောင့် သူသူကတော့ မလုပ်စေချင်ပေ။

ဆိုင်က ယူနီဖောင်းကလွဲပြီး အမြဲတစေ ကိုယ်လုံးကို မပေါ်လွင်စေသည့် ရှပ်အင်္ကျီ ပွပွ၊ တီရှပ်ပွပွ လိုမျိုးကိုသာ ဝတ်လေ့ ရှိသော ရွက်လှကို မမဝင့်ဝါ ကိုယ်တိုင် ဖက်ရှင်ကျကျ ဝတ်စုံတွေ ချုပ်ပေးသည်။ ဟိုဘက်အိမ်က မြန်မာဆန်တာကို တန်ဖိုးထားသော အိမ်မို့ ဆိုပြီး မြန်မာဖြစ် တန်ဖိုးကြီးကြီး ဝမ်းဆက်တွေ ချုပ်ပေးသည်။ အနေအထိုင် အပြောအဆိုက အစ အဆင့်အတန်း မြင့်မြင့် ပုံပေါက်အောင် မမဝင့်ဝါက နေတိုင်း လာသင်ပေးသည်။ နာမည်လှလှ ရွေးမည် ဆိုတော့ ရွက်လှ မှတ်ပုံတင်ထဲက နေခြည်ထိပ်ထား ဆိုသည့် အဖေ ပေးခဲ့သည့် နာမည်ကိုပဲ ယူလိုက်သည်။ ကျောင်းဝင်ခွင့်ကလွဲပြီး အဲဒီ ကြီးကြီးကျယ်ကျယ် နာမည်ကို ရွက်လှက မသုံးပါ။ ဘယ်နေရာ မဆို သိပ်လည်း ပြုစု ယုယ စရာ မလိုပဲ ရှင်သန်နိုင်သည့် ရွက်လှ ဆိုသည့် အမေ ပေးခဲ့သည့် နာမည်ကိုသာ သဘောကျသည်။ သူငယ်ချင်းတွေ အားလုံးကလည်း ရွက်လှပဲ ခေါ်သည်။ နေခြည်ထိပ်ထား ရဲ့ အဒေါ် ဆိုတာကလည်း မမဝင့်ဝါပဲ ရှာပေးထားခြင်း ဖြစ်သည်။ ထွဋ်ထိပ်စိုး ရဲ့ အဒေါ်နှင့် ဆက်စပ်မိအောင်လည်း တမင်ပင် ဖန်တီး ခဲ့ခြင်း ဖြစ်သည်။ ရွက်လှကို ဓါတ်ပုံမြင်ရုံနှင့် သဘောကျပြီး လက်ခံလိုက်တော့ မမဝင့်ဝါ စိတ်ကျေနပ်စရာ ဖြစ်ရသည်။

ရွက်လှ ထည့်မတွက်ခဲ့မိသည်က ရွက်လှရဲ့ နှလုံးသားကိုသာ ဖြစ်ပါသည်။ သူက တကယ့်ကို တည်ကြည်ခန့်ငြားသော ယောက်ျား တစ်ယောက်။ သူ့မျက်နှာကို တစ်နေ့လုံး ထိုင်ကြည့် နေချင်လောက်အောင် ဆွဲဆောင်မှုရှိပြီး ချောမောသော ယောက်ျား တစ်ယောက် ဆီမှာ ရွက်လှက ဘယ်လို နှလုံးသားနှင့် မိန်းကလေးမျိုးမို့ မကျဆုံးပဲ နေနိုင်မှာလဲ။ သူနှင့် ပထမဆုံး တွေ့ကတည်းက ရွက်လှရဲ့ အစိမ်းသက်သက် နှလုံးသားက အခုန်မြန်ခဲ့ရပါသည်။ သို့ပေမယ့် မမဝင့်ဝါ သင်ပေးထားသလို ခပ်တည်တည် ခပ်မှန်မှန်နှင့် ဣနြေ္ဒကြီးသော မိန်းကလေး တစ်ယောက်လို ပြောဆို ဆက်ဆံနိုင်ခဲ့သည်။ တကယ်တော့ ရွက်လှက ယောက်ျားလေး သူငယ်ချင်းလည်း မရှိလှသလို ယောက်ျားလေး တွေနှင့် စကား ပြောဆို ဆက်ဆံရမှာကိုလည်း ရှက်ကြောက် တတ်သူ တစ်ယောက်သာ ဖြစ်သည်။ မမဝင့်ဝါက ကိုယ့်ဘက်က တစ်ကြိမ်တည်းနှင့် ကျရှုံးသွားသည့်ပုံ မပေါက်အောင်နေ ဟု ဆိုသည်။ နောက်တော့ တဖြည်းဖြည်းနှင့် သူ့ကို သူငယ်ချင်းကောင်း တစ်ယောက်လို ခံစားလာရသည်း ရွံတွန့်တွန့် မဖြစ်တော့ပဲ ရင်းနှီးလာသည်။ သူ့နှင့် ပြောဆိုရာတွင် ဟန်ဆောင်နေတာမျိုး မဟုတ်တော့ပဲ ပုံမှန် ခံစားချက်နှင့် ခင်ခင်မင်မင် ပြောဆိုမိလာသည်။

သူနှင့် ပိုမို ရင်းနှီးလာသည်နှင့် အမျှ သူ့မိသားစု၊ ပတ်ဝန်းကျင် အသိုင်းအဝိုင်း အကြောင်းလည်း ပိုသိလာသည်။ သူ့ကို ချစ်မိခဲ့ပေမယ့် သူ့လို လူမျိုးနှင့် ရွက်လှလို မိန်းကလေးက ဘယ်လိုမှ မဖြစ်နိုင်သည်ကို သိမြင်လာသည်။ မမဝင့်ဝါ၏ လက်စားချေခြင်းက ဘယ်လောက် အဓိပ္ပါယ်ရှိသည်ကို သိလာသည်။ ဒါပေမယ့်လည်း မမဝင့်ဝါကို မရွေးချယ်ခဲ့ခြင်းသည် သူ့အပြစ်မှ မဟုတ်ပဲ။ မမဝင့်ဝါကို အထင်သေး စော်ကားခြင်းလည်း မဟုတ်။ သူမကြိုက်လို့ သူ မရွေးခြင်းပဲ။ ဒါကိုပဲ မမဝင့်ဝါက အညှိုးကြီး သွားသည်ကိုတော့ ရွက်လှက အခု နားလည် မပေးနိုင်တော့။ သူ့စိတ်ဓါတ်ကို သိလာသည်နှင့် အမျှ မမဝင့်ဝါကို တမင် နာကျင်အောင် လုပ်ခြင်း မဟုတ်သည်ကို နားလည်လာသည်။ ရွက်လှက ဘာကိုပဲ နားလည် နားလည်၊ အခုမှတော့ ဘာမှ ပြင်ဆင်လို့ မရတော့ပါ။ မမဝင့်ဝါ ရင်းနှီးထားရသည်ကလည်း တန်ဖိုးမနည်း ရှိလှပြီ။ မမဝင့်ဝါ၏ ကျေးဇူးတွေ ကလည်း ရွက်လှ အပေါ်မှာ အများအပြား ရှိနေသည်။ ရွက်လှ အနေနှင့် ဆက်လုပ်ရုံပဲ ရှိသည်။

ရွက်လှက တတ်နိုင်သလောက် လူသိရှင်ကြား ပွဲ ဖြစ်မလာစေချင်သေးသောကြောင့် စေ့စပ်ပွဲ မလုပ်လိုကြောင်း ငြင်းသော်လည်း မရပဲ သူတို့ဘက်က အတင်း လုပ်လိုကြသည်။ မမဝင့်ဝါကလည်း လုပ်တာကို သဘောကျသည်။ ရွက်လှက မမဝင့်ဝါကို မရဲတရဲ ဈေးဆစ်လိုက်သေးသည်။ စေ့စပ်ပွဲ လုပ်ပြီးလျှင် ရွက်လှ ထွက်လာတော့မည် ဆိုတော့ မမဝင့်ဝါက လုံးဝ သဘောမတူပါ။ လက်ထပ်ပွဲ အထိ လူသိရှင်ကြား လုပ်စေလိုသည်။ ရွက်လှ အတွက် ဒီဇာတ်လမ်းထဲက ဘယ်လို ရုံးထွက်မလဲ မသိတတ်နိုင်တော့ပါ။ သူ နှင့် သူ့မိသားစုကသာ ရွက်လှရဲ့ ဇစ်မြစ်ကို သိရှိသွားပါက ရွက်လှကို တော်တော်နာကျည်း သွားနိုင်သည်။

တစ်ခါတလေတော့လည်း လက်ရှိ အခြေအနေကို အတုအယောင် ဆိုတာ မေ့ထားလိုက်ပြီး တကယ်လိုပင် ခံစားကြည့်ကာ ပျော်ပျော် နေပစ်လိုက်သည်။ သူနှင့် အတူ နေခွင့်ရသော ဒီအချိန်ကလေးကို ရွက်လှ တန်ဖိုး ထားရမည် မဟုတ်ပါလား။ သူ နှင့် ရွက်လှ နှစ်ဦးသား စိတ်ကြိုက် ရွေးထားသော စေ့စပ်လက်စွပ်ကလေးကို ရွက်လှ အပိုင်လို သဘောထားလိုက်သည်။ သူ့ တိုက်ခန်းကို ရွက်လှ စိတ်ကြိုက် ပြင်ပစ်လိုက်သည်။ မင်္ဂလာပွဲအတွက် ချိတ်လုံချည် ကိုလည်း ရွက်လှ စိတ်ကြိုက် အရောင် နှင့် အဆင်ကို ရွေးပစ်လိုက်သည်။ မင်္ဂလာ အိပ်ရာခန်း အတွက်လည်း ရွက်လှ စိတ်ကြိုက် အရောင်တွေ သုံးပစ်လိုက်သည်။ စုံတွဲ အလှဓါတ်ပုံတွေလည်း အများကြီး ရိုက်ပစ်လိုက်သည်။ ဘာပဲဖြစ်ဖြစ် ရွက်လှ ထွက်သွားလျှင်လည်း အဲဒီ ဓါတ်ပုံတွေ နည်းနည်းတော့ အမှတ်တရ ယူသွားရမည်။ နှစ်ယောက်သား တိုက်ခန်း မှာ လာနေဖြစ်ကြတော့ ရွက်လှ ချက်ပြုတ်ထားသော ထမင်း၊ ဟင်းတွေ သူ့ကို ကျွေးခွင့်ရတာ ပျော်သည်။ သူသာ စိတ်ရှိလျှင် ရွက်လှဘဝ ညစ်နွမ်းလျှင်တောင် ကျေနပ်စွာ ခွင့်ပြုလိုက်အထိ ရူးမိုက်စိတ် ဖြစ်မိသည်။ သို့ပေမယ့် သူက တကယ့်ကို ဂုဏ်သိက္ခာရှိသော ယောက်ျားကောင်းတစ်ယောက် ဖြစ်ပြီး ရွက်လှကိုလည်း တန်ဖိုးထားသူ ဖြစ်သည်။ ရွက်လှ တို့နှစ်ယောက်သား ပျော်ပွဲစား ထွက်သလို စားသောက်ပြီး ရုပ်ရှင် ထိုင်ကြည့်နေကြတုန်း သူက ရွက်လှကို ချစ်စနိုး ဖြစ်လာလျှင် ပါးကလေးကို လိမ်ဆွဲတာ၊ ဆံပင်လေးကို ဆော့ကစားတာကလွဲပြီး ဘာမှ မပိုပါ။ ထွက်ပြေးရမယ့် အချိန် မတိုင်ခင် အထိတော့ ရွက်လှက စင်ဒရဲလား မင်းသမီးလေးပေါ့။ အဲဒီနေ့ မတိုင်ခင် ဘာအကြောင်းမှ မစဉ်းစားပဲ နေဖို့ ကြိုးစားနေပါသည်။
*******

“နေခြည်ထိပ်ထား ဆိုတာ တကယ်တော့ အတုအယောင် ဘဝ တစ်ခုပါ။ နေခြည်ထိပ်ထား ပိုင်ဆိုင်တဲ့ စီးပွားရေး လုပ်ငန်းတွေ ပညာအရည်အချင်းတွေ အားလုံးကလည်း ဟန်ဆောင်ထားတာပါ။ တကယ့် နေခြည်ထိပ်ထား အစစ်အမှန်က ကိုကို နဲ့ ဘယ်လိုမှ မထိုက်တန်တဲ့ သာမန်အဆင့်အတန်းက မိန်းကလေး တစ်ယောက်ပါ။ ဘယ်သူက ခိုင်းလို့ လုပ်ရတယ် ဆိုတာ မပြောပါရစေနဲ့တော့။ တကယ်တော့ မင်္ဂလာဧည့်ခံပွဲ ပြီးတဲ့ ညကျမှ ထွက်ပြေးလာဖို့ ဖြစ်ပေမယ့် ကိုကို့ကို အဲလောက်ထိ မျက်နှာ မပျက်စေချင်တော့ပါဘူး။ ထိပ်ထားကို ခွင့်လွှတ်ဖို့ ပြောခွင့်မရှိပါဘူး။ ကိုကို ထိပ်ထားကို မေ့လိုက်ပါတော့”

သူ့အတွက် ထိပ်ထား ပေးထားခဲ့သော စာပါ။ အဲဒီစာကို သူ့ဟာသူပဲ ဖတ်ပြီး အိမ်ကိုတော့ မပြခဲ့ပါ။ သူမမှာ ဘာအကြောင်း ရှိလို့ သူ့ကို ဒီလို လုပ်ခဲ့သလဲဆိုတာ သိချင်သည်။ သူမ ပြောတဲ့ ဟန်ဆောင်ထားတဲ့ ဘဝဆိုတာ ဘယ်လိုမျိုးလဲ၊ ဘာရည်ရွယ်ချက်နဲ့ သူ့ကို ဒီလို လုပ်ချင်တာလဲ ဆိုတာ သေချာသိရမှ ဖြစ်မည်။ ထိပ်ထား ပျောက်သွားတယ် ဆိုတာ သူ့မိသားစု နှင့် သူနှင့် အနီးစပ်ဆုံးသူတွေ သိကုန်တော့ လက်ထပ်ရမှာ ကြောက်တဲ့ စိတ္တဇနဲ့ မိန်းကလေး သဘာဝအတိုင်း တစ်နေရာရာ ခဏ ထွက်သွားသည် ဟု ထင်ကြသည်။ တစ်ပတ်လောက်နေရင်တော့ ပြန်လာနိုင်သည် ဟု ထင်ပြီး သိပ်စိတ်မပူကြ။ သူကတော့ ထိပ်ထား စာ အရ အပြီးထွက်သွားသည်ကို သိလိုက်သည်။ ထိပ်ထားကို နေရာအနှံမှာ လိုက်ရှာခဲ့သည်။ သူမ၏ ဆိုင်ကလည်း ပိုင်ရှင် အသစ် ဖြစ်နေပြီး သူမ နေထိုင်ခဲ့သော တိုက်နှင့် ခြံကလည်း လပြတ်နှင့် ငှားနေခဲ့ခြင်း ဖြစ်ကြောင်း သိရသည်။ သူမ၏ အဒေါ်ဆိုသူပါ ပျောက်ခြင်းမလှ ပျောက်နေသည်။ မင်္ဂလာပွဲအတွက် သူ့ဘက်က အကုန်ခံပြီး ပြင်ဆင်နေတာကလွဲလို့ သူမအတွက် သီးသန့်ရယ်လို့ ဝယ်ပေးခဲ့ရသော တန်ဖိုးကြီး ပစ္စည်းလည်း မရှိပါ။ သူတို့နှစ်ယောက် အတူနေဖို့ ပြင်ဆင်နေသော တိုက်ခန်းမှာ ထားသည့် သူတို့ အလှဓါတ်ပုံများထည့်ထားသည့် အယ်လ်ဘမ် တစ်အုပ်ကလွဲပြီး သူမ ဘာမှ ယူမသွားပါ။ စေ့စပ်ပွဲတုန်းက မေမေက သူမကို အပြီးပေးပြီး ဆင်ပေးလိုက်သည့် ခရမ်းစွဲနှင့်စပ်ထားသည့် စိန်တစ်ဆင်စာကိုလည်း အိပ်ခန်းထဲက အံဆွဲထဲမှာ ဒီအတိုင်း ထားသွားသည်။ သူမအတွက် သူဝယ်ပေးထားသည့် ဝတ်စုံတွေနှင့် ဖိနပ်တွေပါ အဲဒီ အိပ်ခန်းထဲမှာပဲ ထားသွားသည်။

သူကတော့ လွယ်လွယ် လက်မလျှော့နိုင်ပါ။ သူမ နှင့် မျက်နှာချင်းဆိုင် တွေ့ရပြီး သူမ သဘောထားကို ပြတ်ပြတ်သားသား မေးပြီးမှသာ လက်လျှော့နိုင်ပါလိမ့်မည်။ လက်ထပ်ဖို့ ရက်က တစ်လနီးနီး လိုသေးသည်မို့ သူကတော့ သူမ ဓါတ်ပုံကိုပါ ပေးပြီး သူ လူယုံများကိုလည်း လိုက်ရှာခိုင်းထားသည်။ သို့ပေမယ့် သူမကို အရိပ်အယောင်မျှ မတွေ့ရတော့ပါ။ သူမက တကယ့်ကို အကယ်ဒမီ မင်းသမီး တစ်ယောက်လို သရုပ်ဆောင်ကောင်းသူလား...။ သူ့အပေါ်မှာ ဆက်ဆံခဲ့သမျှက ဟန်ဆောင်ခဲ့တာပဲလား...။ အဲဒီ အပြစ်ကင်းစင်သည် ထင်ရသည့် မျက်ဝန်းလဲ့လဲ့ တွေက တစ်စုံတစ်ခုကို ဖုံးကွယ်ထားသည်လို့ သူ လုံးဝကို မထင်မိခဲ့ပါလား။ သူ့တိုက်ခန်းမှာ ချက်ပြုတ် စားသောက်ပြီး တီဗွီကြည့်နေသည့်အခါ အိမ်ပြန်ချိန်ရောက်တိုင်း “ကိုကိုနဲ့ အတူတူ နေချင်သေးတယ်၊ မပြန်ချင်သေးဘူး” လို့ ပြောတတ်ခဲ့တာကရော ဟန်ဆောင်ခြင်း တစ်ရပ်ပဲလား။ သူ့ကို အသည်းခွဲဖို့ သက်သက် သူမက လာခဲ့တာတဲ့လား...။ သူမကို လိုက်ရှာနေသော ရက်တွေမှာ သူ့အလုပ်ထဲလည်း လုပ်သာ လုပ်နေရသည်။ လုံးဝ စိတ်ပါဝင်စားမှု မရှိ။ အားလုံးကလည်း သူ့မင်္ဂလာကိစ္စမှာ ပြဿနာ ရှိနေတာကို သတိထားမိကုန်ကြပြီ။ သူကတော့ သူမ ပြန်မလာတော့မှန်း သိပေမယ့် မင်္ဂလာပွဲကို ခုထိ မဖျက်သိမ်းသေးပဲ ထားသည်။ သူမဘက်ကသာ လက်ခံမည် ဆိုလျှင်တော့ သူမက ဘယ်လို အဆင့်အတန်းမျိုးပဲ ဖြစ်ဖြစ် သူ့ဘက်က လက်ထပ်ပွဲကို ဆက်ပြီး ကျင်းပဖို့ အဆင်သင့် ရှိပါသည်။
*******
ဆက်ရန်
သိင်္ဂါကျော်

20 July, 2011

ညှိုးမာန်ဖွဲ့ လှည့်ကွက်ထဲက သားကောင် (၁)


ငယ်ငယ်က သူ့ကို မယ်မယ် ပေးထားသည့် နာမည်က ထိပ်တင်ထွဋ်။ သူ သိတတ်လာတော့ ထိပ်တင် ဆိုသည့် နာမည်ကြီးက ရှေးဝတ္တုတွေထဲက နာမည်ကြီးနှင့် တူသည့်အတွက် သူ့ဟာသူ ပြောင်းလိုက်သည့်နာမည်က ထွဋ်ထိပ်စိုး။ ဘွားဘွားကြီးက သူမ နာမည် ထိပ်တင်မမကြီး ဆိုတာကို ဂုဏ်ယူလှသလို မေမေကလည်း သူမ နာမည် ထိပ်တင်ခင်မမ ဆိုတာကို သဘောကျလှသည်။ သူ မသိနိုင်သည့် ဘယ် ဘိုးဘေး ဘီဘင် ကလည်း တော့ မသိပါ။ ဘွားဘွား နှင့် မေမေက သူတို့ကိုယ် သူတို့ မှူးကြီး မတ်ကြီး မျိုးနွယ် ဟု ဆိုသည်။ မယ်မယ်ကြီးတို့ မယ်မယ် တို့ စသည့် အခေါ်အဝေါ် တွေကိုတောင် ဖေဖေက မရအရ ပြောင်းထားရခြင်း ဖြစ်သည်။ သူသိသလောက် မေမေတို့ မျိုးရိုး စဉ်ဆက် ချမ်းသာ လာသလို ဖေဖေ တို့ ဘက်ကလည်း မျိုးရိုး စဉ်ဆက် ချမ်းသာလာသူများ ဖြစ်သည်။ ဖေဖေ နှင့် မေမေ ကိုလည်း မိဘများက စပ်ဟပ် ပေးစားခဲ့ခြင်းသာ ဖြစ်သည်။ သူ့ရဲ့ တစ်ဦးတည်းသော ဒေါ်လေး ကိုလည်း မျိုးကြီး ရိုးကြီး ထဲက အရာရှိကြီး တစ်ယောက်နှင့် စီစဉ် ပေးခဲ့သည်။ သူတို့ ဇနီးမောင်နှံမှာက ကလေး မရသဖြင့် သူတစ်ယောက်တည်းသာ မျိုးရိုး ဆက်ခံသူ ဖြစ်နေရသည်။

အခုတော့ သူက နိုင်ငံခြားကလည်း ဘွဲ့လွန် တစ်ခု ယူပြီး ပြန်လာခဲ့ပြီ။ သူကိုယ်တိုင် ဦးစီးသော ကုမ္ပဏီ တစ်ခုလည်း ထူထောင်နိုင်ခဲ့ပြီ။  အသက်ကလည်း ၃၀ ကျော်စပြုချိန်မှာ ဘွားဘွားနှင့် မေမေက သူ့ကို မိန်းမ ပေးစားဖို့ အရေး စီမံကိန်းတစ်ခုလို ကြံစည်လာသည်။ အသက် ၈၀ ကျော်ပြီ ဖြစ်သော ဘွားဘွား ကလည်း မှတ်ဥာဏ် မေ့လျော့တာ ဘာညာတောင် မရှိပဲ ကျန်းကျန်းမာမာ ရှိသူမို့ အိမ်မှာလည်း အစစ နေရာတကာ ဝင်ပါတတ်တုန်းပင်။ ဒေါ်လေးကလည်း သူ့ရဲ့ ဝမ်းမနာသား မိန်းမရဖို့ အရေးမှာ တစ်တပ် တစ်အား ပါသေးသည်။ မေမေ့ သူငယ်ချင်း ဒေါ်မေရီ ဆိုသည့် အဘွားကြီးကလည်း အောင်သွယ် အလုပ်မှာ နာမည်ကြီးသူ တစ်ယောက်ဟု ဆိုသည်။ သူ့ကို တစ်ပတ်တစ်ပတ်မှာ ဓါတ်ပုံ သုံးပုံလောက် ပုံမှန် ပြသည်။ သူ့ကို ပြသည့် ဓါတ်ပုံတွေ ဆိုတာ သူတို့ လေးယောက် ရွေးချယ်ထားသည့် စကာတင်တွေသာ ဖြစ်သည်။ မိဘမျိုးရိုး၊ ပညာအဆင့်အတန်း၊ စီးပွားရေး အခြေအနေ၊ ရုပ်ရည်ပြေပြစ်မှု စသည် စသည် သူတို့ သတ်မှတ်ထားသည့် စံနှုန်းတွေတော့ အသေးစိပ်တော့ သူမသိပါ။ သူက လောလောဆယ်မှာ အိမ်ထောင်ရေးကို လုံးဝ စိတ်မဝင်စားသေး။ သူ နိုင်ငံခြားမှ ပြန်ရောက်ကာမှ စတင်ခဲ့ရသည့် သူ့အလုပ်ကို တိုးတက်အောင်မြင်အောင် လုပ်ဖို့ လောက်သာ ခေါင်းထဲ ရှိသည်။ အရင်ကတည်းကလည်း သူက မိန်းကလေးတွေနှင့် ရင်းရင်းနှီးနှီး မနေတတ်သူမို့ သူ့မှာ ချစ်သူ ရယ်လို့ ပီပီပြင်ပြင် ဆိုစရာလည်း တစ်ယောက်မှတောင် မရှိခဲ့ပါ။ ကျောင်းတုန်းက သဘောကျခဲ့တာ တစ်ယောက် နှစ်ယောက် ရှိပေမယ့် သူ့အဘွား၊ သူ့အမေ ရဲ့ စံနှုန်းနဲ့ ကိုက်ညီပါ့မလား ဆိုတာ စဉ်းစားရင်းနဲ့ပင် ဖွင့်မပြောဖြစ်ခဲ့ပါ။

သူတို့ ပြသမျှ ဓါတ်ပုံတွေကို သေချာတောင် မကြည့်ပဲ တစ်ယောက်ပြီး တစ်ယောက် ငြင်းပစ်နေတော့ မေမေ က သိပ် လက်မခံချင်တော့။ သူ့ရဲ့ Selection အကောင်းစားလေးတွေ လွတ်သွားမှာ စိုး၍ထင်သည်။ သူ့ကို ချော့မော့ပြီး တစ်ခါလောက် တွေ့ခိုင်းသည်။ မေမေ ရွေးထားသော မိန်းကလေးတွေက တကယ့်ကို ပြစ်မျိုးမှဲ့မထင်တွေ ဖြစ်သော်လည်း သူက ဒီနှစ်အတွင်း သူ့စီးပွားရေးကိုသာ အာရုံစိုက်လိုသည့်အတွက် ဘယ်နည်းနဲ့ ဖြစ်ဖြစ် ငြင်းဖို့ စဉ်းစားထားပြီး ဖြစ်သည်။ အိမ်ထောင် ဆိုတာ အချစ်မပါပဲ မပြုမဖြစ် ပြုကို ပြုရမည် ရယ်လို့ သူ ဘယ်တုန်းကမှ မတွေးစဖူး။ သူ ချစ်သော မိန်းကလေးကို သူ့အိမ်က သဘောမတူလျှင် မယူပဲ နေချင်နေမည်။ သူမချစ်သော မိန်းကလေးကိုတော့ အိမ်က သဘောတူတာလောက်နှင့် လက်မထပ်ချင်ပါ။ နှစ်လ အတွင်းမှာ မိန်းကလေး ငါးယောက်နှင့် သူတွေ့ခဲ့သည်။ တစ်ယောက်မှ သူ့နှလုံးသားကို မဆွဲဆောင်နိုင်သည်မို့ ယဉ်ယဉ်ကျေးကျေးနှင့် ဇာတ်လမ်းဖြတ်ခဲ့သည်။ ထိုအထဲက တစ်ယောက်ယောက်က သူမကို ငြင်းသည့်အတွက် သူ့ကို အညှိုးတကြီး ရှိသွားခဲ့လိမ့်မည် ဟုတော့ သူက ယောင်ယောင်လေးမှ တွေးမထားခဲ့မိပါ။
*******
သူ့သဘောထားကို မေမေတို့ သိအောင် အပြတ်ပြောထားပြီးနောက် ငါးလလောက် တော့ ဘယ်မိန်းကလေး နှင့်မှ မစပ်ဟပ်တော့ပဲ ငြိမ်နေကြပြန်သည်။ ၃၅ မကျော်ခင် အိမ်ထောင်ပြုရမည် ရယ်လို့တော့ သူ့ကို ရာဇသံပေးထားသည်။ ဘွားဘွားကလည်း မသေခင်မှာ သူမြေး အိမ်ထောင်ကျတာ မြင်သွားချင်သည်တဲ့။ သူ့ဘက်ကတော့ ခုချိန်ထိ မေမေတို့ ရွေးထားသည့် အကောင်းစားလေးတွေသာမက သူ့ပတ်ဝန်းကျင်က သူလို ငါလို သာမန် အချောအလှလေးများ ကိုလည်း စိတ်မဝင်စားမိသေးပါ။ သူ့အသက်က ခုမှ ၃၂ သာ ရှိသေးသည့်အတွက် နောက် သုံးနှစ်လောက်တော့ နားအေးပါးအေး နေနိုင်လောက်သည် ဟု ထင်နေဆဲမှာပင် ဒေါ်လေးက တစ်စခန်း ထလာပြန်သည်။ ဒီဓါတ်ပုံလေး တစ်ချက်လောက်တော့ ကြည့်ပါဦး သားရယ် တဲ့။

“ဟာ ဒေါ်လေးရာ လာပြန်ပြီဗျာ၊ ကျွန်တော် ဒီနှစ်ထဲမှာ အိမ်ထောင်ပြုဖို့ စိတ်မဝင်စားသေးပါဘူး ဆိုမှပဲ၊ ဓါတ်ပုံတွေ ယူယူ လာပြီး ဒေါ်လေးတို့ပဲ မျက်နှာပျက်ရမှာ”
“သားရယ်၊ တကယ် ချစ်စရာကောင်းတာ၊ နာမည်လေးကလည်း အပျံစား၊ နေခြည်ထိပ်ထားတဲ့။ နိုင်ငံခြားက Ph.D ဘွဲ့ ရပြီးသား၊ အဖေက စစ်ဘက်က အရာရှိကြီး၊ အမေကလည်း ရတနာဆိုင်ဖွင့်ခဲ့တာ၊ ခုတော့ မိဘနှစ်ပါးလုံးက ကား အက်ဆီးဒင့်နဲ့ ဆုံးသွားပြီတဲ့။ သူလည်း သူ့ပညာနဲ့ မလုပ်ပဲ သူ့အမေရဲ့ ဆိုင်ကိုပဲ ဦးစီးနေတယ်တဲ့။ အပြောအဆို ဆိုတာကလည်း ယဉ်ကျေးသိမ်မွေ့သလား မပြောနဲ့ ပုံစံလေးကိုက အဆင့်အတန်း မြင့်မြင့် ပုံပေါက်နေတာ၊ မိန်းကလေး ပီပီသသ မြန်မာ ဆန်ဆန် ဝတ်ထားတာကလည်း ခုခေတ်မှာ မြင်ရခဲပါဘိတော့၊ ဒီတစ်ယောက်ကို တော့ လက်မလွတ်ချင်ဘူး သားရယ်၊ ဓါတ်ပုံလေး အရင်ကြည့်လိုက်၊ သား သဘောကျသွားမှာ..”

ဒီလိုပဲ တစ်ယောက်တွေ့ရင် တစ်မျိုး အဲလို အရည်အချင်းတွေကို အရင် ရွတ်လေ့ ရှိတာ သူ့အတွက် ရိုးနေပါပြီ။
“ထားခဲ့ပါ ဒေါ်လေးရာ၊ ကျွန်တော် ဒီ Mail လေးပို့ဖို့ အရေးကြီးလို့၊ ပြီးရင် ကြည့်မယ်နော်..”

ဒေါ်လေး ဓါတ်ပုံထားသွားတာ သိသော်လည်း မကြည့်မိသေးပဲ သူ့အလုပ်သူ လုပ်နေမိတာ တော်တော် ကြာသွားသည်။ အလုပ်ပြီးတော့မှ ရေငတ်လာတာ သတိထားမိပြီး စားပွဲမှ ထလိုက်ရင်း ဓါတ်ပုံလေးကို မြင်သွားသည်။ အရင်တုန်းက မိန်းကလေးတွေလို တစ်ချက်ကြည့်ပြီး ပစ်ထားလိုက်ဖို့ထက် ဓါတ်ပုံထဲက မိန်းကလေးဆီက အကြည့်ကို မခွာနိုင် ဖြစ်သွားသည်။ ဖြောင့်စင်း ပျောင့်ပြောင်းသော ဆံပင်ရှည်ရှည်များနှင့် အနားသတ်ထားသော မျက်နှာလေးက ကြည်စင် ဝင်းပနေသည်။ ပန်းရောင် ဖျော့ဖျော့ နှုတ်ခမ်းနီလေး အပြင် တစ်ခြား ဘာမှ ခြယ်သထားသည်မထင်ရ။ ကော့ရွှန်းသော မျက်တောင် စိပ်စိပ်များ ဝန်းရံထားသည့် မျက်ဝန်းနက်နက်များက ကိုယ့်ကိုယ်ကို ယုံကြည်မှု ရှိသည့်ပုံ။ ဘာမှ ထူးခြားလှသည် မထင်ရပေမယ့် ချစ်စရာ ကောင်းသည့် မျက်နှာလေးက အပြစ်ကင်းစင်လှသည်။ Ph.D ရပြီးသား စီးပွားရေး လုပ်ငန်းတစ်ခုကို လုပ်ဆောင်နေသူ ဟု လုံးဝ မထင်ရ။ အင်း တစ်ခေါက်လောက်တော့ သွားတွေ့ကြည့်လိုက်ဦးမှပါပဲ ဟု သူ့ဟာသူ တွေးရင်း မလုံမလဲ ပြုံးလိုက်မိသည်။

အိပ်ရာဝင်ကာနီး သူမ ဓါတ်ပုံလေးကို တစ်ခေါက် ကြည့်မိပြန်သည်။ အရင်လို ဒေါ်လေးတို့ မေမေတို့ကို ကျွန်တော့်အခန်းထဲမှာ ရှုပ်တယ် ဆိုပြီး ဓါတ်ပုံ ပြန်ပေးတာမျိုး မလုပ်မိတာ သူ့အတွက် နည်းနည်းတော့ မှားယွင်း နေလေပြီ။

*******

“ထိပ်ထား ဓါတ်ပုံ ကျွန်တော့်ဆီ ရောက်လာတယ်၊ အဲလို ရောက်လာဖို့ကို ထိပ်ထား သဘောတူခဲ့တာပေါ့နော်..”
“ဟုတ်ကဲ့၊ ဒေါ်လေးက ထိပ်ထားကို ဒီတိုင်း အေးအေး နေတာ မကြည့်ချင်ဘူး ဖြစ်နေတယ်လေ.. အဲဒါနဲ့ ဒေါ်လေး စီစဉ်တဲ့ သူနဲ့ တွေ့ကြည့်မယ်လို့ ပြောလိုက်တာ”
“အဲလို ဆိုတော့ ထိပ်ထားမှာ ချစ်သူ မရှိဘူးပေါ့.. ဒါမှမဟုတ် အဆင်မပြေခဲ့တာ များလား”
“ထိပ်ထားမှာ ချစ်သူ မရှိပါဘူး၊ ရှိမှတော့ ဒီလို တွေ့နေပါ့မလား ရှင်၊ ဒါနဲ့ ရှင်ကရော အရွယ်ရောက်နေတဲ့ ယောက်ျား တစ်ယောက် ဖြစ်ရဲ့နဲ့ မိဘ စီစဉ်တဲ့သူနဲ့ လက်ခံမယ် ဆိုတာက နည်းနည်း ထူးဆန်း မနေဘူးလား”
“ဟုတ်တော့ ဟုတ်တယ်.. ယုံပါ့မလားတော့ မသိဘူးဗျ၊ ကျွန်တော့်မှာ ခုချိန်ထိ ချစ်သူရယ်လို့ တစ်ယောက်မှ မည်မည်ရရ မထားဖူးပါဘူး၊ တကယ်ပြောတာ၊ ခုတလောတော့ အိမ်က အမေတွေက ကျွန်တော့်ကို အိမ်ထောင်ချပေးဖို့ အကြီးအကျယ် ကြိုးစားနေကြတယ်လေ၊ ကျွန်တော့်အနေနဲ့ ပြောရရင် လောလောဆယ် စီးပွားရေးမှာပဲ အာရုံစိုက်ချင်သေးတာနဲ့လေ.. မိန်းကလေး တစ်ချို့နဲ့ တွေ့ကြည့်ပေမယ့် ငြင်းဖြစ်လိုက်တယ်.. နောက်ထပ် မတွေ့တော့ဘူးလို့ပဲ.. အမှန်အတိုင်း ဝန်ခံရရင် ခင်ဗျားကိုတော့ နည်းနည်း စိတ်ဝင်စားသွားလို့...”
“ကိုထွဋ်ထိပ်စိုးလို လူတစ်ယောက်က ကျွန်မကို စိတ်ဝင်စားတယ် ဆိုတော့ ဂုဏ်ယူရမှာပေါ့နော်..”
“ဟား ဟား.. မဟုတ်သေးဘူးဗျာ.. ခင်ဗျားလို ချစ်စရာကောင်းတဲ့ မိန်းကလေး တစ်ယောက်မှာ ချစ်သူ မရှိသေးပဲ ကျွန်တော်နဲ့ စီစဉ်မှာကို လက်ခံမယ် ဆိုတာကသာ ကျွန်တော့်အတွက် ကံကောင်းတာ ဖြစ်မှာပါဗျာ”

နေခြည်ထိပ်ထား၏ ချစ်စဖွယ် အပြုံးတစ်ပွင့်က သူ့ကို ကြွေကျသွားစေတော့သည်။ တစ်ခေါက် တွေ့အပြီးမှာပင် မြန်မာဆန်ဆန် နှင့် ချစ်စရာကောင်းသည့် ဆံပင်ရှည်မလေးကို သူ ချစ်မိသွားပြီ ဖြစ်ကြောင်း သေချာခဲ့လေပြီ။ “မေမေ တို့ သဘောပဲဗျာ၊ နောက်ထပ် အဲလို သွားသွား မတွေ့ချင်တော့ဘူး” လို့ မတတ်သာလို့ပဲ လက်ခံလိုက်ရသလို ပြောလိုက်သော်လည်း သူ့သဘောကို နောကြေနေသော မေမေ နှင့် ဒေါ်လေးကတော့ သူ သဘောကျလို့ လက်ခံလိုက်မှန်း သိပါသည်။ သူမမှာက မိဘ မရှိတော့ သောကြောင့် အုပ်ထိန်းသူ ဒေါ်လေး တစ်ယောက်သာ ရှိသည်။ သူမ ဒေါ်လေးနှင့် သူ့ ဒေါ်လေး တွေ့ပြီး သူမ ရတနာဆိုင်သို့ မတော်တဆ ရောက်သွားရင်း သူ့ဒေါ်လေးက သူမကို သဘောကျသွားခဲ့ခြင်း ဖြစ်သည်။ သူမက ရွှေတောင်ကြားလမ်းမှာ သူမ အဒေါ်နှင့် အတူ နေထိုင်သူ ဖြစ်သည်။ ခြံကျယ် ဝင်းကျယ်ကြီးထဲက နှစ်ထပ်တိုက်ကြီးကလည်း သူတို့ လောက် မကြီးကျယ် ပေမယ့် သူ့ မေမေနှင့် ဒေါ်လေး တို့ အတွက်တော့ ကျေနပ်စရာ ဖြစ်သည်။ သူ့ဘက်က လက်ခံလိုက်ပြီ ဆိုတာနှင့် မေမေက ဟိုတယ်မှာ ဒိတ်သွားယူသည်။ ဒေါ်လေးကတော့ မန္တလေးကို ချိတ်လုံချည် မှာဖို့ စီစဉ်နေပြီ။

သူတို့နှစ်ယောက် တရားဝင် တွဲကြရင်း ပိုပြီး ခင်မင်လာခဲ့ကြသည်။ သူမ ပုံစံက သွက်သွက်လက်လက်ကြီး မဟုတ်သော်လည်း ရှက်ကိုးရှက်ကန်း ထုံထုံအအ ပုံစံလည်း မဟုတ်ပါ။ သူ့ကို တည်တည်တံ့တံ့ ပုံမှန်ပဲ ဆက်ဆံသည်။ တမင် လုပ်ယူထားခြင်း မဟုတ်ပဲ သူမကိုယ်ပေါ်မှာ ဘာလေးပဲ ဝတ်လိုက် ဝတ်လိုက် စမတ်ကျသော ပုံစံက ပေါ်လွင်နေသည်။ သူမ ပုံစံက ခပ်တည်တည် ဖြစ်နေသဖြင့် သူ့ဘက်က သူမကို မြင်မြင်ချင်း သဘောကျမိသည့် အကြောင်းကိုပင် ပြောဖို့ရာ တွန့်နေသည်။ သူမ ဘက်က သူ့ကို သဘောကျ မကျလည်း ခန့်မှန်းဖို့ ခက်သည်။ သူနှင့် ပတ်သက်လာလျှင် မိန်းကလေးတိုင်းက အရေးပေးဆက်ဆံတာကိုသာ ခံရနေကြမို့ ခုလို သူမက သူငယ်ချင်းလို ရိုးရိုးသားသား ပုံမှန် ဆက်ဆံတာက သူ့အတွက် ထူးဆန်းသလို ဖြစ်နေသည်။ ဘာပဲဖြစ်ဖြစ် သူမက သူ့ကို လက်ထပ်ဖို့ လက်ခံတာကိုပင် သူက ကျေးဇူးတင်ရသည်။

သူ နှင့် သူမက သတ်မှတ်ထားသည့် ရက်ကျမှ တစ်ခါတည်း မင်္ဂလာဧည့်ခံပွဲပဲ လုပ်လို သော်လည်း မေမေနှင့် ဘွားဘွားက စေ့စပ်ပွဲကိုလည်း ခမ်းခမ်းနားနား လုပ်ထားစေလိုသည်။ နောက်ဆုံးမှာ ဘွားဘွား အလိုကို လိုက်လျောပြီး စေ့စပ်ပွဲ လုပ်ဖို့ သဘောတူလိုက်ရသည်။ မင်္ဂလာဧည့်ခံပွဲ လုပ်ဖို့ သုံးလအလိုမှာ သူတို့ စေ့စပ်ပွဲ လုပ်ဖြစ်သွားသည်။ လာရောက် ချီးမြှင့်သူ ပရိတ်သတ် အပေါင်းက နေနဲ့ လ ရွှေနဲ့ မြ လို့ ကောင်းချီးပေးကြရလောက်အောင် သူတို့ နှစ်ယောက်က အတွဲညီခဲ့သည်။ သူ့စိတ်ကြိုက် ဒီဇိုင်းဆန်းဆန်းကို ရွေးဝယ်ထားသော အရည်သန့် စိန်တစ်လုံးတည်းနှင့် ပလက်တီနမ် လက်စွပ်ကလေးကို သူမ၏ ဖြူဖြူသွယ်သွယ် လက်ကလေးမှာ စွပ်ပေးရင်း သူမ ကြားသာရုံ တီးတိုး ပြောမိသည်။
“ဒီနေ့က စပြီး ထိပ်ထား က ကိုယ်နဲ့ပဲ ဆိုင်တော့တာနော်၊ သိလား၊ ကိုယ့်ကို ဘယ်တော့မှ ခွဲမသွားရဘူး”
အမြဲတန်း ရုပ်တည်ကြီးနှင့် နေတတ်သော သူမက အဲလို ပြောတော့လည်း ရှက်ရိပ်သန်းသော မျက်နှာကလေးနှင့် ပြုံးပြုံးကလေး...။
“ထိပ်ထားလည်း ကိုကို နဲ့ အတူ အမြဲရှိနေချင်ပါတယ်”
သူမကလည်း သူ့ကို လက်စွပ်ကလေး ပြန်ဝတ်ပေးရင်း ပြောသည်။
“အခွင့်အရေး ရှိရင်ပေါ့ ကိုကို ရယ်..” သူမ၏ နောက်ဆက်တွဲ စကားကိုတော့ သူက မကြားလိုက်တော့ပါ။

ဧည့်သည်တွေကို လိုက်နှုတ်ဆက်ကြတော့လည်း နှစ်ယောက်သား ပြုံးပြုံး ရွှင်ရွှင်နှင့်ပါ။ သို့ပေမယ့် ဝိုင်းတစ်ဝိုင်းက အမျိုးသမီး တစ်ယောက်ကို မြင်သည့် အခါမှာတော့ နေခြည်ထိပ်ထားရဲ့ မျက်နှာက အပြုံးရိပ်တို့ ပျောက်ကွယ် သွားပါသည်။ သူကတော့ မသိလိုက်ပါ။
“ကိုထွဋ်ထိပ်စိုးက ကျွန်မတို့ အသိုင်းအဝိုင်းတွေမှာတော့ နာမည်ကြီးပဲ၊ ခုတော့ ဖူးစာရှင် ရှာတွေ့သွားပြီပေါ့။ ရှင်နဲ့ လိုက်ဖက်ညီတဲ့ ကြင်ယာဖက် အမှန်တကယ် ဖြစ်ပါစေလို့ ဆုတောင်းပါတယ် ရှင်”
သူမ မျက်နှာက ခပ်ထည်ထည်။ ဝတ်ထားသော အဝတ်အစားနှင့် လက်ဝတ်ရတနာများကလည်း သတို့သမီး ထက်တောင် တောက်ပနေသေးသည်။ သူက ပြုံးပြီး နှုတ်ဆက်လိုက်သော်လည်း သူမကို ဘယ်သူ ဘယ်ဝါ သေချာမသိပါ။ သူမ စကားထဲမှာ အဓိပ္ပါယ် တစ်ခုခု ပါဝင်နေတယ်ရယ်လို့လည်း သူ မထင်မိပါ။

*******

ပြည်လမ်းပေါ်မှာ သူကိုယ်ပိုင် ဝယ်ထားသော ကွန်ဒို တိုက်ခန်း နှစ်ခန်းတွဲ တစ်ခု ရှိသည်။ သူတို့ လက်ထပ်ပြီးလျှင် သူက သူ့မိသားစုအိမ်မှာလည်း မနေချင်၊ သူမ အိမ်မှာလည်း မနေချင်သောကြောင့် သူ့တိုက်ခန်းမှာပဲ နေမည်ဟု စိတ်ကူးသည်။ သူမကို ပြောပြတော့ သူမက သူ့သဘောပဲ ဟု ဆိုသည်။ သူ့မေမေက သိပ်သဘောမတူလိုသော်လည်း ဖေဖေက သဘောတူပေးလိုက်သောကြောင့် လက်မခံချင် ခံချင်နှင့် လက်ခံလိုက်ရသည်။ ထိပ်ထားကို ခေါ်ပြီး တိုက်ခန်းကို စိတ်ကြိုက် ပြင်ဆင်ဖို့ သွားကြသည်။ ထိပ်ထားကလည်း ပျော်ပျော်ရွှင်ရွှင် လိုလိုလားလားနှင့် နှစ်ယောက်သား တိုင်ပင်ကြတော့ အကြိုက်ချင်းက တော်တော်တူကြတာကို တွေ့ရသည်။ သူ မအားသော နေ့များမှာ သူမ တစ်ယောက်တည်း သွားပြီး နေရာချသည်။ အလုပ်သမားတွေ များများ လာမည့် နေ့များမှာသာ သူသွားပြီး ကျန်သည့်နေ့တွေမှာ သူမပဲ သွားတာများသည်။ အိမ်ထဲမှာ ထားမည့် ဘွန်ဆိုင်းအပင်ပုလေးများနှင့် ဂမုန်းပင်သေးသေးလေးများ ကိုလည်း သူမပဲ စိတ်ကြိုက် ရှာဖွေပြီး ဝယ်ထည့်လာသည်။

အခုတော့ တိုက်ခန်းတစ်ခုလုံး အချောသတ် နေရာချဖို့လောက်ပဲ ကျန်တော့သည်။ ပိတ်ရက်မှာ နှစ်ယောက်သား တိုက်ခန်းကို သွားပြီး ချက်ပြုတ် စားသောက်ကာ အခွေ ထိုင်ကြည့်ပြီး ပြန်လာကြသည်။ မင်္ဂလာစုံတွဲ ဓါတ်ပုံ ရိုက်ဖို့ကိုတော့ ဘာကြောင့်မှန်း မသိ သူမ နှင့် အတော်ငြင်းခုန် လိုက်ရသည်။ သူမက စေ့စပ်ပွဲ တုန်းကလည်း ရိုက်ပြီးသားမို့ မင်္ဂလာဆောင်နေ့ကျမှ ထပ်ရိုက်မည်၊ ကြိုရိုက် မထားချင် ဆိုပေမယ့် သူကတော့ ကြိုရိုက်ထားချင်သည်။ လူတိုင်းလည်း အဲလိုပဲ လုပ်နေကြမို့ ထုံးစံလို ဖြစ်နေပြီ လို့ အာပေါက်အောင် ပြောဆိုပြီးမှ ဓါတ်ပုံဆိုင် သွားရိုက်ရသည်။ အမြဲတစေ မိတ်ကပ် သိပ်မပြင်ပဲ သဘာဝအတိုင်းလေး နေတတ်သော ထိပ်ထားက မိတ်ကပ်ပြင်လိုက်တော့လည်း မင်းသမီးလေး တစ်ပါးလို လှပသွားတာ စေ့စပ်ပွဲနေ့ကတည်းက သိပြီးသား ပေမယ့် သူမကို မြင်ရတိုင်းမှာ သူ့အတွက် အသစ်အသစ်လို ရင်ခုန်ရသည်။ ဓါတ်ပုံ ကြိုမရိုက်ချင်ဘူးလို့ ပြောထားသူမှာ ထိပ်ထား ပေမယ့် ဓါတ်ပုံဆိုင် ရောက်တော့လည်း ကလေး တစ်ယောက်လို တက်ကြွပြီး ဝတ်စုံ တစ်စုံပြီး တစ်စုံ ရွေးပြီး ရိုက်သူမှာ ထိပ်ထားသာ ဖြစ်သည်။ အဲဒီနေ့က အနောက်တိုင်းဝတ်စုံနှင့်ရော မြန်မာဝတ်စုံနဲ့ပါ ဓါတ်ပုံတော်တော် ရိုက်ဖြစ်ခဲ့သည်။

သူတို့ အတွက် ဝတ်စုံကိုလည်း ထိပ်ထားနှင့် ဒေါ်လေး နှစ်ယောက်သား ကိုယ်တိုင် မန္တလေးက ပိုးထည် ယက်ကန်းဆိုင်ကြီးသို့ သွားပြီး စိတ်ကြိုက် ဒီဇိုင်းနှင့် အရောင်ကို ရွေးမှာ ထားပြီးပြီ။ ဖိတ်စာကိုလည်း နှစ်ယောက် စိတ်ကြိုက် ပန်းနုရောင် အကောင်းဆုံး အမျိုးအစားကို မှာထားပြီးပြီ။ တစ်လလောက် အလိုမှာတော့ သူ့တိုက်ခန်းမှာ မင်္ဂလာခန်းဝင် ပစ္စည်းတွေက အစ အဆင်သင့် ဖြစ်နေလေပြီ။ သူငယ်ချင်းတွေ၊ ဆွေမျိုး အသိုင်းအဝိုင်းတွေ အားလုံးကလည်း သူ့ မင်္ဂလာဆောင်အတွက် စိတ်ဝင်တစား သိရှိ စောင့်မျှော်နေလေပြီ။ အဲဒီ အချိန်မှာမှ သတို့သမီးလောင်းက ရုတ်တရက် ပျောက်ကွယ် သွားလေတော့သည်။

*******
ဆက်ရန်
သိင်္ဂါကျော်