ကြားရ မြင်ရ သံဝေဂ ရစရာတွေ ...

ခုတလော အနီးအနားမှာ အက်ဆီးဒင့် ဖြစ်တဲ့ အကြောင်းတွေ ခဏ ခဏ မြင်နေ ကြားနေရတယ်။ စိတ်မချမ်းသာ စရာတွေပါပဲ။ လွန်ခဲ့တဲ့ သုံးပတ်လောက်ကပဲ ကိုယ်တို့ ဌာနမှူးရဲ့ အစ်ကို အရင်း တစ်ယောက် ဆုံးသွားတယ်။ သူတို့ ကိုးကွယ်တဲ့ ဘုန်းကြီးကျောင်းမှာ ခေါင်မိုး တက်ပြင်ပေးရာကနေ ပြုတ်ကျပြီး ဆုံးသွားတာပါ။ အသက်က ၄၀ လောက်ပဲ ရှိသေးတယ်။ မူကြိုအရွယ် သားလေး တစ်ယောက် ကျန်ခဲ့ပါတယ်။ သူ့ အမေ ခမျာလည်း ကြောင်တောင်တောင် ဖြစ်သွားတဲ့ အထိ ခံစားနေရရှာတယ်။ မိသားစု စီးပွားရေးကို ဦးဆောင်လုပ်နေတဲ့သူ၊ ညီအစ်မတွေ ကြားထဲ တစ်ဦးတည်းသော အစ်ကို မို့လို့ အားလုံးလည်း စိတ်မကောင်း ဖြစ်ကြရပါတယ်။ ဘုန်းကြီးကျောင်းက ဘုန်းတော်ကြီးတွေကလည်း စိတ်မကောင်းဖြစ်ကြလို့ ကိစ္စ ဝိစ္စတွေ အားလုံး လိုက်ပြီး လုပ်ဆောင်ပေးကြပါတယ်။ သုဿာန် တစ်ခုလုံးလည်း ဘုန်းကြီးတွေနဲ့တင် စည်ကားနေတယ်လို့ ပြောပါတယ်။ ရန်ကုန်အိမ်မှာ ဖြစ်တာ ဆိုတော့ ကိုယ်တို့လည်း မသွားဖြစ်ခဲ့ပါဘူး။ ဒီကပဲ ရန်ကုန် ရောက်နေတဲ့ ဆရာမတစ်ယောက် ကပဲ အားလုံး ကိုယ်စား လိုအပ်တာ အကူအညီ ပေးခဲ့ပါတယ်။ အဲဒီကိစ္စ ပြီးတော့ နောက်ရက်မှာပဲ အဲဒီ ဘုန်းကြီးကျောင်းမှာ နဂါးနှစ်ကောင် ဘုရားလာဖူးတယ် ဆိုပြီး သတင်းကြီး လိုက်ပါသေးတယ်။ (http://www.themyanmarpost.com/?p=8894) ကိုယ်တို့ကတောင် သေသွားတဲ့ အစ်ကိုကြီး နဲ့များ ပတ်သက် မလားရယ်လို့ တွေးလိုက်ကြပါသေးတယ်။


စနေနေ့ကတော့ ဈေးသွားရင်းနဲ့ လမ်းမှာ အက်ဆီးဒင့်ဖြစ်ထားတာတွေ တွေ့ခဲ့ရပြန်ပါရော။ အသွားတုန်းက ကားညိထားလို့ ဆိုပြီး ပြင်ဦးလွင် အဝင်ဝမှာ ကားတွေ တစ်တန်းကြီး ခဏ ပိတ်နေတာနဲ့ ရှေ့တိုးမရ နောက်ဆုတ်မရနဲ့ စောင့်နေရပါတယ်။ အရှေ့မှာ ဘာဖြစ်သွားတယ် ဆိုတာတော့ သေချာ မမြင်လိုက်ရပါဘူး။ ကားထွက်လာတော့မှ အန်ဗျူးလင့်န် ကားတစ်စီး ထွက်သွားတာတော့ တွေ့လိုက်ရပါတယ်။ နောက်တစ်ခါ အပြန်ကျပြန်တော့လည်း .ပြင်ဦးလွင် အသွားလမ်းဘက်က ခပ်လတ်လတ် ကုန်ကားကြီး တစ်စီးက လမ်းဘေး ချောက်ထဲကို ကျပြီး ကားခေါင်းတစ်ခုလုံး နီးပါး ပျက်စီးနေတာကို တွေ့ရပါတယ်။ စိတ်မချမ်းသာစရာ မြင်ကွင်းတွေပါ။ 


မနေ့က၊ တနင်္ဂနွေ တုန်းကတော့ ပိုပြီး နီးနီးနားနားမှာပဲ သေခြင်းတရားတွေကို မြင်လိုက်ရ ပြန်ပါရော။ ကိုယ်တို့ အဆောင်ဘေးလမ်းက ကုန်းတက်ကြီးပါ။ ကားတွေ တော်တော်များများက အဆင်းဆိုရင် ဖရီး ရိုက်ပြီး ဆင်းကြပါတယ်။ သင်္ကြန်မတိုင်ခင်တုန်းကလည်း ဆိုင်ကယ်နောက်က ထိုင်လိုက်တဲ့ မိန်းကလေး တစ်ယောက် ပြုတ်ကျပြီး ဆုံးသွားဖူးတာ ကိုယ် ရေးဖူးပါတယ်။ ဒီလမ်းကြီး ပေါ်မှာပါပဲ။ အခုကတော့ မြေသယ်ကားကြီးပါ။ ရတနာပုံမြို့သစ် ဝင်းထဲမှာ ဆောက်လုပ်ရေးတွေက လုပ်နေဆဲ ဆိုတော့ မြေသယ်ကားတွေ မကြာခဏ ဟိုဟိုသည်သည် သွားလာနေကြပါ။ ကားကြီးတွေ ပုံကိုက ကြောက်စရာမို့ ကိုယ်တို့ကတော့ လမ်းလျှောက်နေတုန်း လာနေတာ ကြုံရင်တောင် ဝေးဝေးကနေ ရှောင်ပေးထားပါတယ်။


အဲဒီနေ့ကတော့ ကိုယ်တို့ကားက လမ်းထိပ်ကနေ ပြန်လာပြီး အဆောင်ရှေ့လမ်းကို ချိုးကွေ့ ရပ်လိုက်ပါတယ်။ အဆောင်ရှေ့မှာ ရေသန့်ကားကြီးကလည်း ရောက်နေတာမို့ သူတို့ကား ထွက်လို့ ရမရ မေးရင်းနဲ့ လွတ်တဲ့ နေရာမှာ ရပ်လိုက်တာပါ။ ကိုယ်တို့ကား ရပ်ပြီးပြီးချင်းလောက်ပဲ အဲဒီ မြေသယ်ကားကြီးက နောက်က တရှိန်ထိုး ဆင်းလာပြီး ရှေ့ဘက် ချောက်ထဲကို ပြုတ်ကျသွားတာပါ။ တစ်ဘက်မှာက ကွေ့ရမယ့် လမ်းရှိပါတယ်။ အရှိန်များတာလား၊ ဘရိတ်ပဲ ပြုတ်သွားတာလား သေချာတော့ မသိပါဘူး။ ကွေ့ရမယ့် လမ်းကို မကွေ့နိုင်တော့ပဲ ချောက်ထဲ ပြုတ်ကျသွားပါတယ်။ ကိုယ်တို့ကတော့ အဲဒီ ကားသံကိုတောင် မကြားလိုက်ကြပါဘူး။ သူများကလေး တစ်နှစ်သားလောက်လေးကို ကားပေါ် ခေါ်လာခဲ့မိတော့ အိပ်သွားတဲ့ ကလေးကို အာရုံစိုက်နေတာနဲ့ နောက်ကကားကိုလည်း သတိမထားမိပါဘူး။ အဲဒီနား ရပ်နေတဲ့လူတွေ ပြောတော့မှ “ကား ချောက်ထဲ ကျသွားပြီ” ဆိုလို့ ကြည့်မိတော့ မြင်ကွင်းထဲ ဘာမှ မမြင်ရတော့ပါဘူး။ ဘာကားလဲ မေးကြည့်တော့မှ မြေသယ်ကား အကြီးကြီးမှန်း သိရပါတယ်။ ကားတစ်စီးလုံး အောက်ကျသွားတာ အစအနတောင် မမြင်ရတော့ပါဘူး။ တကယ်လို့များ ကိုယ်တို့ကားသာ တစ်မိနစ်လောက် နောက်ကျပြီးမှ ကွေ့ခဲ့ရင် အဲဒီကားကြီးရဲ့ ဝင်တိုက်တာကိုတောင် ခံရနိုင်ပါတယ်။ ကိုယ်တို့မှာ အဲဒီလို ကံ မပါလို့ပဲလို့ တွေးရင်း ကျောချမ်းစရာ ဖြစ်ရပါတယ်။


အဲဒီနားကို ကိုယ်တို့ လမ်းလျှောက်နေကြပေမယ့် အဲဒီလောက်နက်တဲ့ ချောက် ရှိနေမှန်းတောင် သတိမထားမိပါဘူး။ သွားကြည့်ဖို့ရာတော့ စိတ်ဆင်းရဲကောင်းလို့ မကြည့်ဖြစ်ပါဘူး။ ဓါတ်ပုံတော့ ရိုက်ချင်စိတ်ရှိပေမယ့် လူတွေ ဝိုင်းကြည့်နေကြတာဆိုတော့ မသွားချင်တာနဲ့ပဲ ကိုယ့်အခန်း ပြတင်းပေါက်ကပဲ လှမ်းကြည့်မိပါတယ်။ သွားကြည့်တဲ့သူတွေ မေးကြည့်တော့ နှစ်ဦးက ပွဲချင်းပြီး ဆုံးသွားတယ် လို့ သိရပါတယ်။ ကားပေါ်မှာ ပါလာတာက စုစုပေါင်း ခြောက်ယောက်ပါ။ နာရီဝက်လောက် ကြာတော့မှ တာဝန်ရှိသူတွေ ရောက်လာကြတယ် ထင်ပါတယ်။ နောက်ထပ် တစ်နာရီခွဲလောက် ကြာတော့မှ (MCC က ကားထင်ပါရဲ့) ဒိုင်နာ ကား တစ်စီးနဲ့ မသေသေးတဲ့ လူတွေကို တင်သွားတာ တွေ့ရပါတယ်။ နောက်ခုံတွေမှာ ထိုင်သွားတဲ့ အလုပ်သမားတွေလည်း ပါသွားပါရဲ့။ ထိခိုက်မိသူတွေကိုတော့ ကြက်တွေ ဝက်တွေ တင်သလို နောက်ခန်း ကြမ်းပြင်မှာ ပစ်တင်သွားတာပါ။ (တစ်ခါတုန်းက ကလေးမလေးကို ဆေးရုံပို့တော့ ဆရာမတွေက သွေးထွက်လွန်နေမှန်းသိရဲ့ အင်္ကျီ လုံချည်တွေ ရွှဲအောင် ပွေ့ပိုက်သွားကြတာပါ။ ဘာပဲဖြစ်ဖြစ် ခံစားနာကျင်ရတာ သက်သာပါစေတော့ ဆိုတဲ့ စေတနာနဲ့ပါ။)


ခဏနေတော့ သုံးတောင်နာရေးကူညီမှု အသင်းက ကားနှစ်စီး ရောက်လာပြီး ပွဲချင်းပြီး သေသူ နှစ်ယောက်ကို တင်သွားပါတယ်။ အဲဒီ နှစ်ယောက်က ကားပေါ်က ခုန်ချလိုက်တဲ့ နှစ်ယောက်လို့ သိရပါတယ်။ ခုန်ချတဲ့ နေရာမှာ အကျမတော်ပဲ မြေနီအမာနဲ့ ခေါင်းနဲ့ ကျပြီး ပွဲခြင်းပြီး ဖြစ်သွားပုံပါ။ သွေးတွေ ဘာတွေ သိပ်မထွက်ပဲ အတွင်းကြေ ဖြစ်သွားပုံ ရပါတယ်။ ဒရိုင်ဘာ အပါအဝင် လေးယောက်က ကားခေါင်းခန်းထဲမှာ အောက်အထိ ပါသွားခဲ့တာပါ။ ဒီနေ့ မနက် သိရတာကတော့ ဆေးရုံခေါ်သွားတဲ့ သုံးယောက် အနက် တစ်ယောက် ဆုံးသွားပြီလို့ သိရပါတယ်။ ကျန်တဲ့နှစ်ယောက်ကတော့ ဒဏ်ရာပြင်းပြီး နောက်ထပ် တစ်ယောက်ကတော့ ခြေထောက်နည်းနည်း နာရုံကလွဲပြီး ဘာမှ မဖြစ်ခဲ့ဘူး လို့ သိရပါတယ်။ တော်တော် ကံကောင်းတဲ့ သူလို့ ပြောရမှာပါ။ ကားကြီးကိုတော့ ခုမနက် အထိ ဆွဲတင်တာ မတွေ့ရသေးပါဘူး။ 


အတိတ်ဘဝတုန်းက အကုသိုလ်ကံတွေကြောင့် ခုဘဝမှာ ဥပစ္ဆေဒကံနဲ့ သေဆုံးရတယ် ထင်ပါတယ်။ ဒီမြို့သစ်လမ်းမကြီးမှာ ဘာအခိုက်တွေ ရှိသလဲတော့ ကိုယ်လည်း မသိနိုင်ပါ။ ကလေးမလေး သေဆုံးပြီးတုန်းကတော့ ရက်လည်မှာ ဘုန်းကြီးဆွမ်းကပ်တာအပြင် အဆောင်တွေ ကျောင်းတွေ သာမက လမ်းမကြီးတစ်လျှောက်မှာပါ ပရိတ်ရွတ်ပြီး ကမ္မဝါဖတ်ခဲ့ပြီးဖြစ်ပါတယ်။ ခုတစ်ခါတော့ သူတို့ တာဝန်ရှိသူတွေက လုပ်ပေးမလား၊ အလုပ်သမားတွေမို့လို့ပဲ လျစ်လျှူရှုထားမလား မသိပါ။ ကိုယ်တို့လည်း တတ်နိုင်သလောက်တော့ ဒီဝင်းကြီးထဲက .မြင်အပ် မမြင်အပ်တွေ အားလုံးကို ညတိုင်း မေတ္တာပို့ အမျှဝေနေပါတယ်။ သက်တမ်းကုန်ဆုံးလို့ သေရတာ မဟုတ်ပဲ သေနေ့စေ့လို့ အသေဆိုးနဲ့ သေဆုံးရတာတွေကို မကြုံရ မဆုံရ ပါစေနဲ့ လို့ဆုတောင်းမိပါတယ်။ ရုတ်တရက် မမျှော်လင့်ပဲ ဝိညာဉ်နဲ့ ခန္ဓာ ခွာသွားရသူတွေမို့ ဘယ်လို ဘုံဘဝကို ရောက်မလဲ တော့မသိပါ။ စွဲလမ်းတွယ်ငြိစိတ်တွေနဲ့ လမ်းမကြီးပေါ်မှာ လျှောက်သွားနေရတဲ့ ဘဝကို မရောက်ပဲ ကောင်းသော ဘုံဘဝကို ရောက်နိုင်ပါစေလို့ ဆုတောင်းပေး လိုက်ပါတယ်။


သိင်္ဂါကျော်

အွန်လိုင်းပေါ်က ကူးချ ကိစ္စ

အမှန်တော့ ဒီကိစ္စကို ရေးဖို့ ရည်ရွယ်ချက် မရှိပါဘူး။ ဒါပေမယ့် လောလောဆယ် ဘာမှလည်း မရေးဖြစ်နေတာနဲ့ ရေးစရာ ရှာလိုက်တယ်ပဲ ပြောပါတော့။

Ning.com တွေရဲ့ ထုံးစံအတိုင်း ကူးချ တစ်ပုဒ်တွေ့လို့ပါ။ ကိုယ်က သိတာ မဟုတ်ပါဘူး။ သူငယ်ချင်း တစ်ယောက်က ကူးပြီး mail ပို့်လိုက်လို့ပါ။ နင် တစ်ခါက ရေးဖူးတဲ့ အကြောင်းနဲ့ တူတယ်။ နင်များ နာမည် တစ်မျိုးနဲ့ ရေးတာလား တဲ့၊ သူငယ်ချင်းက မေးထားလို့ ကြည့်လိုက်တော့ တော်တော်တော့ တူတယ်။ အဲဒါနဲ့ ning site ကို သွားတော့ sign in မဝင်ရသေးတာနဲ့ ဖတ်မရတော့ ထားထားလိုက်တယ်။ မကြည့်ဖြစ်တော့ဘူး။ ငါရေးတာတော့ မဟုတ်ပါဘူး လို့...သူငယ်ချင်းကို တော့ စာပြန်လိုက်တယ်။ ဒီနေ့တော့ အဖွဲ့ဝင်လိုက်ပြီး ဝင်ကြည့်ဖြစ်လိုက်တယ်။

အောက်က link မှာပါ။ ဇွန် ၁၇၊ ၂၀၁၁ က တင်ထားတဲ့ စာပါ။

http://forverfriends.ning.com/profiles/blogs/2863689:BlogPost:4282316

အဲဒီ ဝတ္တုတိုက ကိုယ် အောက်က Link မှာ တင်ခဲ့တဲ့ “မစစ်မှန်သော ချစ်ခြင်းတို့ မည်သည်” ဝတ္တုနဲ့ လူနာမည်တွေက လွဲလို့ အားလုံး တူနေတာ တွေ့ရပါတယ်။

http://theingara.blogspot.com/2008/08/blog-post_13.html

ကိုယ်က file နှစ်ခုကို ယှဉ်ဖွင့်ပြီးတော့ ဖတ်ကြည့်ပြီးပါပြီ။ Word ထဲမှာ Find and Replace လုပ်ထားတယ်လို့ ထင်ရပါတယ်။ ကိုယ့် blog ထဲက ယူတာတော့ ဟုတ်မယ်မထင်ပါ။ အဲဒီ ဝတ္တုတိုက လောကအလှ online မဂ္ဂဇင်း မှာ ဖော်ပြပြီးသားမို့ အဲဒီက ကူးယူတာ ဖြစ်နိုင်ပါတယ်။

http://www.lawka-ahla.com/news.php?extend.847.8 မှာပါ။

အခု လောကအလှက link ကို ပြန်ရှာရင်းနဲ့ အဲဒီ ning blog မှာ ဖော်ပြထားတဲ့ တစ်ခြား ဝတ္တုတစ်ချို့ကိုလည်း လောကအလှမှာ တွေ့လိုက်တော့ အဲဒီက ကူးထားတာမှန်း သေချာ သွားပါတယ်။

ကိုယ့် ဝတ္တုထဲက စာသား တစ်ချို့နဲ့ သူ့ ဝတ္တုထဲက စာသားတစ်ချို့ကို နှိုင်းယှဉ် ပြလိုက်ပါဦးမယ်။

ကိုယ့်ဝတ္တုရဲ့ အစက

“ခက်ဝေလွင် က လူတိုင်းကို ကိုယ့်လိုပဲ ထင်ပြီး ယုံကြည်မိသည်။ အရာတိုင်းမှာ တူမျှသော အသွားအပြန် ရှိလိမ့်မည်ဟု ထင်ခဲ့မိသည်။ ယုံကြည်မှုကို အလွဲသုံးစား လုပ်ခံရကြောင်း အချိန်နှောင်းမှ သိလာရသောအခါ

လုပ်ရက်သူတို့ အပေါ် အတော်စိတ်ပျက်သွားသည်။ ပြန်လှည့် မကြည့်ချင်လောက်အောင် စိတ်ကုန်တာကို ဘယ်လို စကားလုံးနဲ့ ပြောရမှန်းတောင် မသိပါ။”

သူ့ဝတ္တုရဲ့ အစက

“ကျော်ဇင်ဟိန်း က လူတိုင်းကို ကိုယ့်လိုပဲ ထင်ပြီး ယုံကြည်မိသည်။ အရာတိုင်းမှာ တူမျှသော အသွားအပြန် ရှိလိမ့်မည်ဟု ထင်ခဲ့မိသည်။ ယုံကြည်မှုကို အလွဲသုံးစား လုပ်ခံရကြောင်း အချိန်နှောင်းမှ သိလာရသောအခါ

လုပ်ရက်သူတို့ အပေါ် အတော်စိတ်ပျက်သွားသည်။ ပြန်လှည့် မကြည့်ချင်လောက်အောင် စိတ်ကုန်တာကို ဘယ်လို စကားလုံးနဲ့ ပြောရမှန်းတောင် မသိပါ။”

ကူးယူ ဖော်ပြရင်လည်း ဘယ်က ကူးယူတယ် ဆိုတာကို ရိုးသားစွာ ဖော်ပြပေးသင့်ပါတယ်။ ခုဟာက idea တူတာလည်း ဘယ်နည်းနဲ့မှ မဖြစ်နိုင်ပဲ စကားလုံးတိုင်းက အစ တူညီတာဖြစ်လို့ ကူးယူထားတာ သိသာနေပါတယ်။ Online ပေါ်မှာ လုပ်ချင်ရာ လုပ်လို့ ရနိုင်တယ် ဆိုပေမယ့် သူ့စည်း ကိုယ့်စည်း လိုက်နာပြီး ကိုယ့်လိပ်ပြာကိုယ် သန့်စင်စွာ နေနိုင်မယ့် စာမျိုးကိုပဲ ကိုယ့်ရဲ့ ဘလော့မှာ ဖော်ပြသင့်ပါတယ်။ ဒါပေမယ့် ning.com ဆိုတာကလည်း စလာကတည်းက အဲဒီလို ကူးချ ကိစ္စ၊ သူများစာ ကိုယ့်စာ လုပ်တဲ့ ကိစ္စ နဲ့ ပတ်သက်ပြီး နာမည်ကြီး လာပြီးသားမို့ ဘာမှ ထပ်ပြောဖို့တောင် မလိုလောက်အောင်ပါပဲ။

မရေးချင်ပေမယ့်လည်း သိတဲ့ အကြောင်းလေး မှတ်တမ်းတင်ချင်တာမို့ ဒီပို့စ်ကို ရေးဖြစ်သွားပါတယ်။

သိင်္ဂါကျော်

ဤခရီး ဝေးသည် မထင်ပါနှင့်

ကျွန်တော်တို့ နိစ္စဓူဝ စားဝတ်နေရေး အတွက် အလုပ်တွေ လုပ်နေကြပါတယ်။ တကယ်တော့ တစ်နေ့ တစ်နေ့ လောဘ၊ ဒေါသ၊ မောဟတွေ ပွားများနေကြတာပါ။ အလုပ်ထဲမှာ လည်း အလုပ်ထဲမှာမို့ အထက်အရာရှိကို.. လုပ်ဖော်ကိုင်ဖက်တွေကို.. မကျေနပ်တာ၊ ဒေါသထွက်တာက တစ်မျိုး၊ ကိုယ့် အလုပ်ကို မကျေမနပ်နဲ့ ရတဲ့ လစာကို မရောင့်ရဲနိုင်တဲ့ လောဘစိတ်တွေက တစ်မျိုး၊ ဟိုပစ္စည်း အသစ်ကလေး လိုချင်လိုက်တာ၊ ဒီပစ္စည်း ကလေး လိုချင်လိုက်တာ ဆိုတဲ့ လောဘစိတ်တွေက တစ်မျိုး၊ အနားယူတဲ့ အချိန်မှာလည်း ကိုရီးယားကားလေး ကြည့်ရင်း ဟိုမင်းသားလေးကို ကြိုက်လိုက်တာ၊ ဒီမင်းသမီးလေးကို ကြိုက်လိုက်တာ ဆိုတာ လောဘ၊ ဟိုမင်းသား၊ ဟိုမင်းသမီး ကတော့ အမြင်ကပ်စရာ ကောင်းလိုက်တာ ဆိုတဲ့ ဒေါသစိတ်တွေကတစ်မျိုး၊ ကိုယ်လုပ်နေတဲ့ အလုပ်၊ ကိုယ်ထားနေတဲ့ စိတ်က မှန်သလား မှားသလား မသိတဲ့ မောဟ စိတ်တွေကတစ်မျိုးနဲ့ပဲ ကျွန်တော်တို့ရဲ့ နေ့စဉ်ဘဝကို ဖြတ်သန်း နေကြပါတယ်။ ကျွန်တော်တို့ စိတ်ထဲ ကိုယ့်အသက်က ဘယ်လောက်မှ မရှိသေးပါဘူး၊ ဒီအချိန်၊ ဒီအရွယ်ကတော့ ပညာရှာရမှာ..၊ စီးပွားရှာရမှာ.. ဆိုပြီး ပညာရဖို့ ဥစ္စာရဖို့ပဲ လုံးပန်းပြီး သေခြင်း တရားကို မေ့နေမိကြပါတယ်။ တစ်ချို့ကလည်း ဒီသံသရာကြီးက ရှည်တာ သိတယ်၊ တရားအားထုတ်ရဦးမယ်၊ ခုတော့ မလုပ်နိုင်သေးဘူး၊ ပင်စင်ယူမှပဲ လုပ်တော့မယ် ဆိုတာမျိုးလည်း ရှိကြပါတယ်။ ကျွန်တော်လည်း ဒီလိုလူတွေထဲက တစ်ယောက်ပါပဲ။ တစ်နေ့ လုပ်မယ်၊ လုပ်မယ် ဆိုပြီး နေ့ရွှေ့ ညရွှေ့နဲ့ နေလာခဲ့တာ ကြာပါပြီ။ ဒီအရွယ်နဲ့တော့ မသေနိုင်သေးဘူးလို့ သေမင်းအပေါ်လည်း ယုံကြည်မှု ကြီးကြီး ထားမိနေသလိုပါပဲ။

တစ်လောကတော့ သေခြင်းတရားကို နီးနီးကပ်ကပ် မျက်ဝါးထင်ထင် မြင်လိုက်ရတော့မှပဲ သံဝေဂ တော်တော် ရမိပါတယ်။ ရတနာပုံ မြို့သစ်ဝန်းထဲမှာပဲ Ph.D ကျောင်းသူလေး တစ်ယောက် ဆိုင်ကယ်ပေါ်က ပြုတ်ကျပြီး သေဆုံးသွားတာပါ။ Ph.D ကျောင်းသူ ကျောင်းသားတွေကို Camp သွင်းထားတဲ့ အတွက် ညအိပ်ညနေ အပြင်ထွက်ခွင့် မရှိပါဘူး။ အခု သင်္ကြန်တွင်းကိုတော့ တရားဝင် ပိတ်ရက် ရတဲ့ အတွက် အိမ်ပြန်ဖို့ရာ အားလုံးပဲ ပြင်ဆင်နေကြတဲ့ အချိန် ဖြစ်ပါတယ်။ အခု ကျောင်းသူလေးကလည်း အိမ်ပြန်ဖို့ ကားလက်မှတ် လဲစရာ ရှိတဲ့ အတွက် နေ့လည် ထမင်းစားချိန် လမ်းထိပ် ထွက်ရာက ပြန်အလာမှာ ဖြစ်ရခြင်း ဖြစ်ပါတယ်။ ရန်ကုန်ဇာတိမို့ ဆိုင်ကယ် စီးနေကျလည်း မဟုတ်တော့ သတိလက်လွတ်စီးမိပါလိမ့်မယ်။ အပျော့သား ယူနီဖောင်း လုံချည်က ဆိုင်ကယ် နောက်ဘီးမှာ ညပ်သွားတာကို ရှေ့ကမောင်းသူကို မပြောပဲနဲ့ ကိုယ့်ဟာကိုယ် ဆွဲထုတ်ရင်း ဆိုင်ကယ်ပေါ်က ပြုတ်ကျသွားတာ ဖြစ်မယ်လို့ ယူဆကြပါတယ်။ အောက်ခံလမ်းက ကွန်ကရစ်လမ်း ဖြစ်တဲ့ အတွက် ဆိုင်ကယ်ဦးထုပ် မဆောင်းတဲ့ ဦးခေါင်းနဲ့ ရိုက်မိရာမှာ ဘယ်လိုမှ သက်သာဖွယ်ရာ လမ်းမမြင်ပါ။ သွေးတွေ မြင်မကောင်းအောင် ထွက်နေပေမယ့် အသက်ရှင်လို ရှင်ငြား ဆရာ ဆရာမတွေ ဝိုင်းဝန်းပြီး ပြင်ဦးလွင် ဆေးရုံကို ကားနဲ့ သွားပို့ပေမယ့်လို့ On the Sport ဆုံးသွားတာပါလို့ ဆရာဝန်က ပြောပါတယ်။ ကလေးမလေးရဲ့ အမေကလည်း သွေးတိုး နှလုံး ရောဂါတွေ ရှိတယ် ဆိုလို့ ချက်ချင်း အကြောင်း မကြားရဲပဲ အဖေနဲ့ အစ်ကို ကိုပဲ ရအောင် ဖုန်းဆက်ပြီး အကြောင်းလှမ်းကြားတော့ သူတို့ လာမယ် ဆိုတာနဲ့ ရောက်အောင်စောင့်ပြီး သုံးရက်မြောက်နေ့မှာ ပြင်ဦးလွင်မှာပဲ သဂြိုံဟ် လိုက်ရပါတယ်။

ဆိုင်ကယ်ကို ရှေ့က မောင်းတဲ့ ကျောင်းသူလေးကလည်း စိတ္တဇတွေ ဖြစ်လို့... အတူပြန်မယ့် ကျောင်းသူလေးကလည်း သူမသွားမိပဲ သေသွားတဲ့ ကျောင်းသူလေးကို သွားခိုင်းမိလို့ပါ ဆိုပြီး စိတ္တဇတွေ ဖြစ်လို့...။ အဲဒီညမှာ သေဆုံးသူနဲ့ တစ်တန်းတည်းသားတွေူ အားလုံးလည်း စိတ်မကောင်းတွေဖြစ်၊ စိတ်တွေ ခြောက်ခြားပြီး နေမကောင်းတွေ ဖြစ်ကြလို့ ဆေးခန်းတောင် သွားပြကြရသေးရဲ့။ အားလုံးရဲ့စိတ်ထဲမှာ အိပ်မက်လိုလို ဖြစ်နေပါတယ်။ အသက် ၂၀ ကျော် အရွယ် တက်ကြွ လန်းဆန်းပြီး ဘွဲ့လွန်တက်နေတဲ့ ကျောင်းသူလေး တစ်ဦးကို ခုလို အဖြစ်ဆိုးမျိုးနဲ့ သေဆုံးလိမ့်မယ်လို့ ဘယ်သူကမှ မျှော်လင့် မထားမိကြပါဘူး။ ဒီဝန်းထဲမှာ ဒီလိုပဲ ဆိုင်ကယ် ဦးထုပ်မဆောင်းပဲ သွားလာ နေကြတာပဲကို။ အခုတော့ ဝမ်းနည်းစရာ ကောင်းတဲ့ မတော်တဆမှု တစ်ခု ဖြစ်ခဲ့ရပါပြီ။ အားလုံးရဲ့ စိတ်ထဲမှာလည်း သေခြင်းတရား ဆိုတာ အချိန်မရွေး ရောက်လာနိုင်ပါလားလို့ သံဝေဂတွေလည်း ရလို့ ပေါ့။ ကိုယ်က ဝေးသေးတယ်လို့ မေ့ထားတဲ့ သေခြင်းတရားဆီ သွားရမယ့် ခရီးက တကယ်တော့ မျက်စိတမှိတ်၊ လျှပ်တပြက် အတွင်းလည်း ရောက်သွားနိုင်တဲ့ ခရီးပါ။ အဲဒါကြောင့် ကွေးသောလက် မဆန့်မီ၊ ဆန့်သောလက် မကွေးမီ သေနိုင်တယ် လို့ ပြောကြတာပါ။

တစ်ချို့ကလည်း သေသွားရင် ပြီးသွားတာပါပဲ လို့ ပြောကြတယ်။ ဘဝတစ်ခု ချုပ်သွားတယ် ဆိုပေမယ့် သံသရာမှာ သွားရမယ့် ခရီးက အရှည်ကြီး ကျန်ပါသေးတယ်။ ဗုဒ္ဓဘာသာဝင်တိုင်းက နောက်ဘဝ ရှိတယ် ဆိုတာကို ယုံကြည်ကြပါတယ်။ အဲဒီ နောက်ဘဝက ၃၁ ဘုံထဲက ဘယ်ဘုံ ဘယ်ဘဝမှာ ဖြစ်မယ် ဆိုတာတော့ ဘယ်သူမှ ကြို မသိနိုင်၊ ကြိုမပြောနိုင်တဲ့ အရာပါ။ ငရဲ တိရိစ္ဆာန် ပြိတ္တာ အသူရကယ် အပယ်လေးဘုံထဲ မရောက်ရအောင်တော့ ကိုယ်လုပ်တဲ့ ကံ အလုပ်တွေ ပေါ်မှာပဲ မူတည်မှာပါ။ သေဆုံးကာနီး စွဲလမ်းစိတ်တွေ ကလည်း မကောင်းတဲ့ ဘုံဘဝ ရောက်အောင် သတ်မှတ် ပြဌာန်းပေးတဲ့ အထဲမှာ ပါပါတယ်။ ကျွန်တော်လည်း ဒါမျိုးတွေ သိပ်မရေးတတ်ပါဘူး။

ပြည်မြို့ ကုဏ္ဍလာရာမ ဆရာတော်ကြီးရဲ့ တရားထဲမှာ ဟောကြားသလို ကျွန်တော်တို့ နေ့တဓူဝ တွေးနေ ကြံနေ လုပ်နေတာတွေ အားလုံးဟာ ငရဲမှာ ကိုယ်နဲ့ ပတ်သတ်တဲ့ ဒယ်အိုးကို တယ်နေသလိုပါပဲ တဲ့။ မကျေနပ်တဲ့ စိတ်ပေါ်တော့ ဒေါသ ဖြစ်တယ်၊ ကြိုက်တာ လိုချင်တာ ဖြစ်တော့ လောဘပါ၊ အဲဒီလို ဖြစ်နေတာကို မသိတာကလည်း မောဟ ပေါ့။ ဒီစိတ်တွေနဲ့ နေနေတဲ့ နောက်တော့ အကုသိုလ်တွေပဲ အမြဲ ဖြစ်နေတာပေါ့ တဲ့။ တစ်နေ့ တစ်နေ့မှာ ကိုယ်လုပ်တဲ့ (သူ့ အသတ် သတ်တာဖြတ်တာ မဟုတ်တာတောင်မှပဲ မသိမသာဖြစ်နေတဲ့) အကုသိုလ်တွေက တစ်ပိဿာ မက များပြားလှပါတယ်။ အဲဒီ အကုသိုလ်တွေ ပပျောက်ဖို့ ဆိုရင် တစ်နေ့မှာ အနည်းဆုံး တစ်နာရီ၊ နှစ်နာရီ လောက်ပဲ ဖြစ်ဖြစ် တရား ဘာဝနာ၊ ဝိပဿနာ တရား ပွားများကြဖို့ တိုက်တွန်းတာပါ။ အဲဒီလို တစ်နေ့ တစ်နေ့ မမေ့လျော့ပဲ ဝိပဿနာ ပွားများကြရင် ကိုယ်လုပ်မိတဲ့ အကုသိုလ် တရားတွေကို ပယ်သတ်နိုင်မှာပါ.. လို့ ဆရာတော်ကြီးက ဟောပါတယ်။

အခုခေတ်မှာ တရားကို သိပြီး တရား ဘာဝနာ ပွားများဖို့ စိတ်ပါဝင်စားကြတဲ့ သူတွေထဲမှာ အသက်ကြီးပိုင်းတွေသာ မကပဲ လူငယ် လူရွယ်တွေလည်း တော်တော်များများ ပါလာပါပြီ။ သင်္ကြန်တွင်းလို အစိုးရ ရုံးပိတ်ရက်မျိုးမှာ ဆိုရင် တရားရိပ်သာတွေမှာ စခန်းဝင်တဲ့ လူငယ် လူရွယ်တွေ တော်တော်လေး များပါတယ်။ ဒါပေမယ့်လည်း အပြင်မှာ သင်္ကြန်လည်ပြီး ပျော်ပါးနေတဲ့ သူတွေနဲ့ စာရင်တော့ ရာခိုင်နှုန်း အနည်းငယ်ကလေးမျှသာ ရှိတာပါ။

ပုထုဇဉ် လူသားတွေ ပီပီ ဘယ်သူမှတော့ ဒီ လောဘ ဒေါသ မောဟ၊ အကုသိုလ် တရားတွေကို ဆင်ခြင်နိုင်ကြဦးမှာ မဟုတ်ပါဘူး။ ဒါပေမယ့်လည်း ကိုယ်သွားရမယ့် သံသရာ ခရီးကြီးက အရှည်ကြီး ကျန်နေပါသေးသည်။ ဒီ သံသရာ ခရီးရဲ့ လမ်းခုလတ်မှာ အပယ်ငရဲကို ကျရောက်သွားလို့ကတော့ နှစ်ပေါင်း များစွာ အတွင်း လွတ်မြောက်ဖို့ လမ်းမမြင်ပဲ ဒုက္ခရောက်ကြရမှာပါ။ ဒီလို ဘဝ ကူးပြောင်းသွားရမယ့် သေခြင်းတရား ဆီ ရောက်ဖို့ရာကလည်း အဝေးကြီးပဲလို့ မထင်ကြစေချင်ပါဘူး။ အချိန်မရွေး ရောက်သွားနိုင်တာပါ။ အဲဒါလေးတွေ ဆင်ခြင်ပြီး ဒီဘဝ ခဏလေး နေရခိုက်မှာ အကုသိုလ် တရားတွေ တတ်နိုင်သလောက် နည်းနိုင်သလောက် နည်းအောင် ရှောင်ကြဉ်ပြီး ဒါန၊ သီလ စတဲ့ ကုသိုလ်တရားတွေ ဖြည့်နိုင်သလောက် ဖြည့်ဆည်းပြီး ဝိပဿနာ ဘာဝနာတရား ကိုလည်း တရားရိပ်သာ ဝင်တဲ့ အချိန်ကာလလေး မျှသာ မဟုတ်ပဲ အိမ်မှာ နေရင်းလည်း အိပ်ရာဝင် အိပ်ရာထလေး လောက်ပဲ ဖြစ်ဖြစ်၊ နာရီဝက်၊ တစ်နာရီလောက်တော့ မှန်မှန်ပွားများရင်းနဲ့ တစ်နေ့တစ်နေ့ ကိုယ်လုပ်ခဲ့မိတဲ့ အကုသိုလ်တရားများကို ပယ်သတ်နိုင်အောင် လုပ်ကြဖို့ တိုက်တွန်းချင်ပါတယ်။ ဒီဘဝမှာ မဂ်ဥာဏ် ဖိုလ်ဥာဏ် ရလောက်တဲ့ အဆင့် မဟုတ်ရင်တောင်မှပဲ ဝိပဿနာတရား ပွားများအားထုတ်ခဲ့တဲ့ ပါရမီကလေး ရှိခဲ့တယ် ဆိုရင် နောင် ကိုယ် ရောက်လေရာ ဘဝတွေမှာလည်း ဆက်လက် အားထုတ်ရင်းနဲ့ နိဗ္ဗာန် မဂ်ဖိုလ် ကို မျက်မှောက်ပြုရတဲ့ ဘဝကို ရောက်နိုင်ပါတယ်။

ကျွန်တော် ကိုယ်တိုင်လည်း တရားမရသေးပါဘူး။ ဆရာကြီး လုပ်တာလည်း မဟုတ်ပါဘူး။ တရားစခန်း တော့ တစ်ခါ နှစ်ခါ ရက်တို ဝင်ဖူးပေမယ့် အိမ်မှာလည်း မှန်မှန် မလုပ်ဖြစ်သေးပါဘူး။ ကိုယ်မလုပ်နိုင်ပေမယ့်လို့ လုပ်သင့်တဲ့ အလုပ်လို့ ထင်တဲ့ အတွက် အားလုံးကို သတိပေးတဲ့ အနေနဲ့ သေခြင်းတရားကို မမေ့လျော့ကြဖို့၊ ဘုရားအလုပ်၊ တရားအလုပ်ကို မမေ့ကြဖို့ ဒီစာကို ရေးဖြစ်တာပါ။

************************

ပြည်မြို့  ကုဏ္ဍလာရာမ ကျောင်းတိုက်မှာ သင်္ကြန်ကာလ တရားဝင်သူများ ဓမ္မာရုံပေါ်မှာ တရားမထိုင်ခင်။

ဆွမ်းစားဆောင်မှာ။

နေ့  လည် တရားနားချိန် ဖျော်ရည် သောက်နေကြသော ယောဂီများ။

အမြဲနေ သံဃာများ၊ သီလရှင်များ၊ ယောဂီများ တရားထိုင်ရာ ပြင်ဦးလွင် ဖားအောက်တောရ ဓမ္မာရုံ။

သီလရှင်များ၊ ယောဂီများ နေထိုင်ရာ ကျောင်းဆောင်လေးများ။

 

 

ဆွမ်းစားဆောင်။

သင်္ကြန်တွင်း တရားစခန်းမှာ တရားထိုင်ရမယ့် ပြင်ဦးလွင် ဖားအောက်တောရ သုံးထပ် ဓမ္မာရုံအသစ်။

သိင်္ဂါကျော်

ဟိုလျှောက် ဒီလျှောက်.. ဟိုရိုက် ဒီရိုက်..

တနင်္ဂနွေနေ့က မြေနီလမ်းကို လျှောက်ဖြစ်တယ်..။ မြေနီလမ်း ဆိုတာ ကိုယ်တို့ အဆောင်ဘေးကနေ ပြင်ဇာ ရွာထိပ်ကို ထွက်တဲ့ လမ်းပေါ့။ ဈေးကားက တစ်ပတ်တစ်ခါကို မှန်မှန် မထွက်ဖြစ်ဘူး။ မောင်းမယ့်သူ မရှိတာနဲ့..။ ကားပျက်နေတာနဲ့...။ ထွက်ရင်လည်း လူနဲ့ မမျှတော့ အပတ်တိုင်း လိုက်ဖို့ မဖြစ်နိုင်ဘူး။ ခုတစ်ပတ်အတွက် အိမ်ကပါလာတဲ့ အခြောက်အခြမ်းလေးတော့ ရှိသေးပေမယ့် အသီးအရွက်က မရှိတော့ဘူး။ ဈေးဝယ်မှ ဖြစ်တော့မှာမို့ လမ်းထိပ်ကို ထွက်မှ ဖြစ်တော့မှာ...။ ပိတ်ရက် သွားထားတာက ပိုကောင်းမယ်လေ။ ဖွင့်ရက် ကျရင်လည်း ဖယ်ရီက အချိန်တိုင်း ရှိတာမဟုတ်ဘူး...။ ကိုယ့်ခြေထောက် ကိုယ်သုံးရတာက များတယ်။ အပြန် အဆင်းလမ်းလေးဆို ကိစ္စ မရှိဘူး။ ကုန်းတက်လမ်း သွားရရင်တော့ မစားသာဘူး...။ အသွားအပြန် လျှောက်ပြီးရင် ဘယ်မှ ထပ်မလျှောက်ချင်တော့ဘူးလေ..။

အဲဒီနေ့ကတော့ လျှောက်ဖြစ်တယ်။ လမ်းမှာ ရေတံခွန်လေး တစ်ခုလည်း ရှိတော့ ရိုက်ရအောင်ဆိုပြီး ကင်မရာလေး ယူလာတာနဲ့ ရေတံခွန်ကို တစ်ပုံလှမ်းရိုက်တယ်..၊ သိပ်ကောင်းကောင်း မမြင်ရဘူး။ ခုတလော Zoom အများကြီး ဆွဲရိုက်လို့ ရတဲ့ ကင်မရာ ကြီးကြီး ကောင်းကောင်း တစ်ခုလောက် လိုချင်နေတယ်။ အဲဒီ ရေတံခွန် အနီးအနား အထိရောက်အောင်တော့ ခုထိ မဆင်း ဘူး သေးဘူး...။ တစ်ရက်လောက်တော့ ဆင်းရဦးမယ်။

တောပန်းလေးတွေ တွေ့တော့ ရိုက်တယ်။ အနံလေးကလည်း မွှေးနေတာပဲ။

မြေနီလမ်းက လမ်းထိပ်ထွက်ဖို့ နီးတယ် ဆိုပေမယ့်လည်း ခပ်မြန်မြန်လျှောက်တောင် နာရီဝက်လောက်တော့ အနည်းဆုံး လျှောက်ရတယ်။ လမ်းကလည်း ပြေပြေပြစ်ပြစ်တော့ မဟုတ်ဘူး။ ကုန်းတက် ကုန်းဆင်းတွေက ပါသေးတယ်။ အပေါက်ဝ ရောက်တော့ မန္တလေး အဆင်းလမ်း ဘက်ကနေ ပြင်ဦးလွင် အဆင်းလမ်း ဘက်ရောက်အောင် ကျွန်းတောထဲက ဖြတ်သွားတဲ့ နွားလမ်းကြောင်းကနေ သွားရသေးတာ...။ ကိုယ်ကလည်း ပိန်ချင်တယ် သာ ပါးစပ်က အော်နေပေမယ့် ဒီမြေနီလမ်းကို နေ့တိုင်းလျှောက်ရအောင်ဆို လျှောက်ကို မလျှောက်ချင်ဘူး။

ကျွန်းတောထဲက အဖြတ်မှာ နောက်က သုံးယောက်က ဓါတ်ပုံရိုက်ပြီး နောက်ကျနေရစ်တာ... ရှေ့က နှစ်ယောက်ကတော့ ကော့ကော့ ကော့ကော့နဲ့ မသိဘူး ရှေ့ဆက်လျှောက်သွားကြတယ်။ ကျွန်းတောကိုပဲ ဖြတ်တင်လိုက်တယ်။ လူပုံပါပါရင် ကိုယ့်ကို သတ်ကြမှာ...။

ကိုယ့်တို့က အဖွဲ့လိုက် စုချက်စားတာဆိုတော့ သူများတွေ ဘာအရွက် ဝယ်ရမလဲ ကြည့်နေကြတုန်း ကိုယ်က ဟိုရိုက် ဒီရိုက်၊ ရိုက်စရာ မရှိ စက္ကူပန်းပင်ကိုရိုက်၊ ကောင်းကင်ကို ရိုက် လုပ်နေလိုက်တယ်။

အဲဒီနေ့က တိမ်တွေကလည်း အရမ်းလှတယ်။

( အမှန်တော့ စာမရေးဖြစ်လို့ ဟိုရောက် သည်ရောက် လျှောက်ရေးတာ.. )

သိင်္ဂါကျော်

9th Myanmar ICT Week မြင်ကွင်း

ခုတလော စာရေးဖို့လည်း စိတ်မပါ.. အလုပ်လည်း သိပ်မအားလို့ မရေးဖြစ်တာ ကြာပါပြီ။

စနေနေ့ကတော့ ICTပြပွဲကို ဖွင့်ပွဲအပြီး နေ့ခင်းဘက် တစ်ခေါက် သွားရင်း ရိုက်ဖြစ်ခဲ့တဲ့ ဓါတ်ပုံလေးတွေပါ။

မနက်ဘက်က ဝိုင်းစုခိုင်သိန်း သီချင်းဆိုတယ်လို့ သိရပေမယ့် ကိုယ်တို့ သွားတဲ့ အချိန်မှာတော့ ဇင်းဇင်း နဲ့ Tiger Girls အဖွဲ့ရဲ့ သီဆိုဖျော်ဖြေမှုကိုပဲ တွေ့ခဲ့ရပါတယ်။ အရမ်းကြီး မစည်ကားပေမယ့်လို့ မနှစ်ကထက် စာရင်တော့ လာရောက်ကြည့်ရှုသူတွေကို နည်းနည်း များလာတာ တွေ့ရပါတယ်။

ဒီနှစ် လူတွေရဲ့ စိတ်ဝင်စားမှုက ကွန်ပျူတာနဲ့ အပိုပစ္စည်းတွေ မဟုတ်တော့ပဲ အင်တာနက် ရရှိနိုင်မှုကိုပဲ ပိုစိတ်ဝင်စား လာကြပါတယ်။ Alpha, MMG, Fortune နဲ့ Yatanarpon Teleport စတဲ့ ကုမ္ပဏီများက FFTx (Fiber To The Home) ကို Promotion လုပ်တဲ့ အပေါ်မှာ စိတ်ဝင်စားသူ များကြပါတယ်။ သို့ပေမယ့် ဒီစနစ်က ရန်ကုန်၊ မန္တလေးနဲ့ ပြင်ဦးလွင် မြို့နယ်များ မှာသာ ဖြစ်ပြီး တစ်နိုင်လုံး မရရှိနိုင်သေးပါဘူး။ 

CDMA 800 MHz ဖုန်းများမှာ ကျပ် သုံးသောင်း ကနဦး သွင်းပြီး ရရှိနိုင်ပြီ ဖြစ်တဲ့ Internet Access ကလည်း စိတ်ဝင်စားစရာပါ။ နယ်မြို့က Internet ဆိုင်များမှာ တောင်မှ များသောအားဖြင့် နှေးနေသေးတဲ့ internet ဟာ ဖုန်းပေါ်မှာ ဘယ်လို အခြေအနေ ရှိမယ် ဆိုတာတော့ မသိနိုင်ပါ။ Internet ရရှိနိုင်ပြီ လို့ ကြော်ငြာထားတဲ့ Mc Will ကျပ် ငါးသိန်းတန် ဖုန်းကိုလည်း စိတ်ဝင်စားသူ များပါတယ်။ သူကတော့ Internet သုံးနေတဲ့ အချိန်မှာ ဖုန်းပြောလို့ လုံးဝ မရဘူး လို့ သိရပါတယ်။ Internet သုံးဖို့ အတွက် modem တစ်ခုကိုလည်း အထိုင်အနေနဲ့ ထားဖို့ လိုအပ်ပါတယ်။

ကိုယ်ကတော့ FFTx ကို စိတ်ဝင်စားပေမယ့် ရန်ကုန်မှာလည်း အိမ်ပိုင်ယာပိုင် မရှိ၊ ကိုယ်တိုင်ကလည်း အိမ်မှာ မနေနိုင်သေးတဲ့ ဘဝမို့ ဝယ်ဖို့တော့ အဝေးကြီးပါ။ ကိုယ်ကိုင်တဲ့ GSM ဖုန်းကလည်း Internet ရတဲ့ အမျိုးအစားထဲမှာ မပါတော့ ပြပွဲကနေ ဝယ်စရာ ဘာမှ မရှိပါ။ ဒါ့အပြင် ဒီလို Product တွေ ကြော်ငြာနေတဲ့ ရတနာပုံမြို့သစ် ဝင်းကြီး ထဲမှာ နေပြီး နေတဲ့ အဆောင်မှာ FFTx ဝေးလို့ TV လိုင်းလေးမှ ကောင်းကောင်း ဖမ်းလို့ မမိ။ Internet ဆိုတာ ဝေလာဝေး ဖြစ်နေတာကတော့ တကယ့်ကို ရင်နာစရာပါ။

သိင်္ဂါကျော်

ဒီသင်္ကြန်

ပြန်ရောက်လာပါပြီ။ 

ဒီသင်္ကြန်ပိတ်ရက်မှာ ရည်မှန်းမထားပဲ သီလရှင်ဝတ်ရင်း တရားစခန်းဝင်ဖြစ်ခဲ့ပါတယ်။ မေမေတို့ တက္ကသိုလ်နားက ဘုန်းကြီးကျောင်းမှာပါ။  ဒုလ္လဘ ကံထူးရှင်မဲတွေ ဖောက်ပြီး ရဟန်းခံ၊ သီလရှင်ဝတ်တာ နှစ်စဉ်လုပ်နေကြဖြစ်ပြီး စတုတ္ထအကြိမ် ရှိခဲ့ပါပြီ။ ကိုယ်လည်း သူများက သီလရှင် ဝတ်မယ်ဆိုတဲ့ အသံကြားတော့ စိတ်ထဲမှာ အရမ်း ဝတ်ချင်သွားတာနဲ့ ဘုန်းကြီးကျောင်း သွားပြီး စုံစမ်းခိုင်းတော့ မဲပေါက်ပြီး မဝတ်တဲ့လူရှိသေးလို့ အစားဝတ်လို့ ရတယ်ဆိုတာနဲ့ ဝတ်ဖြစ်သွားတာပါ။ 
အကြိုနေ့ ညနေပိုင်း ဒုလ္လဘ ရဟန်း၊ သီလရှင်များ ဖြစ်ပြီးနောက် သိမ်ဆင်း လောင်းလှူကြပါတယ်။

ပြီးတော့ သီလရှင်များပါ အပါအဝင် အနီးအနား ရပ်ကွက်မှ သိမ်ဆင်း လောင်းလှူချင်သူများအတွက် ရပ်ကွက်၊ လမ်းများ အတိုင်း ကြွခဲ့ကြပါတယ်။

သင်္ကြန်အကြိုနေ့ ညနေ သုံးနာရီလောက်က စဝင်ခဲ့ပြီး နှစ်ဆန်း နှစ်ရက်နေ့ မနက်ပိုင်းမှာ ထွက်ခဲ့ပါတယ်။ နံနက်ပိုင်း ၄း၀၀၊ ၄း၃၀ မှာ အိပ်ရာက ထပြီး ၅း၀၀ မှာ ဘုရားဝတ်တက်ကာ နာရီဝက်ခန့် တရားထိုင်ရပါတယ်။ အဲဒီနောက် နံနက် အာရုဏ်ဆွမ်း စားရပါတယ်။ ခဏနားပြီး နံနက် ၇း၀၀ နာရီမှာ တရားနာ သို့ တရားထိုင်ခြင်း ကို တစ်နာရီကြာ လုပ်ရပါတယ်။ ၈း၀၀ မှာ နားပြီး ၈း၃၀ မှာ တရားနာ သို့ တရားထိုင်ခြင်း ပြန်စပါတယ်။ တစ်ချို့ရက်မှာ ဆရာတော် ကိုယ်တိုင် တရားဟောပြီး ၉း၀၀ သို့ ၉း၁၅ မှာ ပြီးဆုံးပါတယ်။ အဲဒီနောက် ၉း၃၀ လောက်မှာ ကျောင်းနေ ရဟန်းတော်များနဲ့ ဒုလ္လဘ ရဟန်းများက ဆွမ်းခံထွက်ကြရပါတယ်။ သီလရှင်များကတော့ လာရောက်ကြတဲ့ ဥပုသ်သည်များနဲ့အတူ တရားနာပြီး ကိုးပါးသီလ ခံယူကြရပါတယ်။ တရားနာပြီး ခဏအကြာ ၁၁ နာရီ ကျော်ကျော်လောက်မှာ ဆွမ်းစားကြရပါတယ်။ 

အချိုပွဲတွေ ဘာတွေ စားရင်း မွန်းတည့် ၁၂ နာရီမှာ စားသောက်ခြင်း အမှု ပြီးသွားတော့ အနားယူကြပြီး မွန်းလွဲ ၂ နာရီမှာ အလုပ်စခန်း ပြန်စပါတယ်။ သိပ်မပြည့်စုံတဲ့ ကျောင်းတိုက်မို့ ဆွမ်းစားဆောင်နဲ့ တရားနာခန်းမက အတူတူ ဖြစ်နေတော့ စားပွဲခုံတွေ ဟင်းကျန် ဆွမ်းကျန်တွေ ရှင်းလင်း သိမ်းဆည်းပြီးမှ တရားထိုင်ရာ ခန်းမ အဖြစ် ပြန်ပြင်ဆင်နိုင်မှာ မို့ပါ။ ၂ နာရီကနေ ၃ နာရီ အထိ တရားထိုင်၊ ပြီးတော့ နားပြီး ၅ နာရီမှာ ပဋိစ္စသမုပ္ပတ် တရားတော် သင်ကြား ဟောပြောပါတယ်။ ၆ နာရီမှာ ပြီးပြီးတော့ ၂ နာရီ နားပါတယ်။ ၈ နာရီမှာ တရားနာခြင်း သို့ တရားထိုင်ခြင်း ပြန်လည် စတင်ပြီး ည ၉ နာရီမှာ ပြီးဆုံးပါတယ်။

တရားထိုင်တာနဲ့ ပတ်သက်ပြီး ငယ်ငယ်ကတည်းက အဘိုးရော အမေရော ပြောဆိုကြတာနဲ့ စာအုပ်တွေ ဖတ်ထားတာနဲ့ နည်းစနစ်တွေကိုလည်း သိနေပေမယ့်လည်း မလုပ်ဖြစ်ပါဘူး။ ခပ်ငယ်ငယ်ကမှ တစ်ခါတရံ ၁၅မိနစ်လောက် ထိုင်ဖူးသေးပေမယ့် ခုနောက်ပိုင်းတော့ လုံးဝကို ဘာမှလည်း မလုပ်ဖြစ်တာပါ။ ခုတရားစခန်းဝင်တော့မှပဲ စနစ်တကျ လုပ်ဖြစ်သွားပါတယ်။ ကိုယ်က သူများထက်ပိုပြီး အတွေးများတတ်တဲ့ လူမို့ ပြေးလွှားနေတဲ့ စိတ်ကလေးကို တည်ငြိမ်အောင်ထိန်းဖို့ အတော်ကြိုးစားရပေမယ့် တတ်နိုင်သမျှ ရတဲ့ အချိန်လေးမှာတော့ အကျိုးရှိအောင်တော့ ကြိုးစားလုပ်ခဲ့ပါတယ်။ အမှန်တကယ်တော့ တရားစခန်းဝင်မှ မဟုတ်ပါဘူး။ ကိုယ်ရဲ့ အားတဲ့အချိန်လေးတွေမှာ တတ်နိုင်သလောက် ဘာဝနာ အလုပ်ကို လုပ်နေသင့်တာပါ။ တချို့က တရားစခန်းဝင်တယ်၊ ဝင်တယ် ဆိုပြီး အိမ်လည်း ပြန်ရောက်ရော တရားဆိုတာ ဘယ်နေမှန်းမသိ လုံးဝမေ့ပစ်ပြီး လောဘ၊ ဒေါသ၊ မောဟတွေထဲပဲ ပြန်နစ်နေတတ်ကြတာပါ။ တကယ်တော့ ကိုယ် ဘယ်အချိန်သေမလဲ ဆိုတာ ဘယ်သူမှ မသိနိုင်တဲ့ အရာပါ။ အသက်ငယ်သေးတာပဲ ဆိုပြီး သေမင်းကလည်း မခေါ်ပဲ နေမှာ မဟုတ်ပါ။ အဲဒီတော့ ကိုယ် သွားတဲ့အချိန်မှာ ဒါန၊ သီလ၊ ဘာဝနာ နဲ့ ထိုက်သင့်သလောက် ပြည့်နေအောင် ကြိုးစားကြရမှာပါ။ (တကယ်တမ်းတော့ ကိုယ်လည်း မလုပ်ဖြစ်ပါဘူး... ဒါပေမယ့် မေ့လျော့နေတဲ့ စာဖတ်သူများကို သတိပေးချင်လို့ပါ ) 

ကိုယ်တို့ အားထုတ်ခဲ့တာ မိုးကုတ် ဆရာတော်ဘုရားကြီး ရဲ့ တရား နည်းလမ်း ဖြစ်ပါတယ်။ ပဋိစ္စသမုပ္ပတ် စက်ဝိုင်းကြီးကိုတော့ ပြန်ရှင်းမပြချင်တော့ပါဘူး။ မိုးကုတ် တရားစခန်း ဝင်ဖူးတဲ့ သူတိုင်း သိမှာပါ။ ဆရာတော် ဟောတာကလည်း ရှင်းလင်း ပြတ်သားပြီး နားလည်လွယ်ပါတယ်။ (ဒါပေမယ့် စာမေးပွဲစစ်မယ်လို့ ပြောတော့ ဘယ်သူမှ မလှုပ်ကြပါဘူး..။ :D)

အတိုဆုံး နဲ့ ကိုယ်သိသလို တရား နည်းစနစ်လေး တော့ပြန်ပြောပါရစေ...။ ကြာရှည်ထိုင်နိုင်မယ့် ပုံစံနဲ့ ကိုယ်နှစ်သက်သလို ထိုင်နိုင်ပါတယ်။ (ခြေထောက်တစ်ခုနဲ့ တစ်ခု မဖိပဲ တင်ပလ္လင်ခွေထိုင်ကတော့ အကောင်းဆုံးပါ) ခါးကို ခပ်ဆန့်ဆန့် သင့်လျော်သလိုထားနိုင်ပါတယ်။ အထိုင်ပြင်ပြီးရင်တော့ နှာသီးဖျားက ဝင်လေ ထွက်လေကို သိနေရမှာ ဖြစ်ပါတယ်။ အာနာပါန ကမ္မဌာန်း သက်သက်ကပဲ စိတ်တည်ငြိမ် သမာဓိ ရစေခြင်း၊ ရောဂါများ ပျောက်ကင်းစေခြင်း အကျိုးကျေးဇူးများ ရရှိစေပါတယ်။ ဝိပဿနာ အနေနဲ့ ပွားများမယ် ဆိုရင်တော့ ပုံမှန် အသက်ရှုနေရင်း နှာသီးဖျားကို ရိုက်ခတ်ပြီး ဝင်သွားတဲ့လေ၊ ထွက်သွားတဲ့လေကို သိနေရင်း စိတ်တည်ငြိမ်လာပြီ ဆိုရင် ကိုယ့်ရဲ့  ခန္ဓာကိုယ် တစ်ခုလုံးကို စိတ်အာရုံ အသိနဲ့ ခြုံကြည့်ပြီး ဝေဒနာ (ယားနာ၊ နာတာ၊ ကျင်တာ၊ အေးတာ၊ ပူတာ စသည်) ဖြစ်ပေါ်နေတဲ့ နေရာကို သိစိတ်ကို ပြောင်း သိရပါမယ်။ ဝေဒနာ ရဲ့

ဖြစ်ပြီးရင် ပျက်တတ်တဲ့ သဘောလေးကို သိနေရမှာ ဖြစ်ပါတယ်။

ကိုယ် တရားစခန်း ဝင်ခဲ့တဲ့ ကျောင်းက ပြည်မြို့ သံတချောင်းလမ်း၊ ပြည်တက္ကသိုလ် အနီးက မဟာဇေယျုံကျောင်းတိုက်မှာပါ။ ဆရာတော်ကလည်း သက်တော် ငယ်ရွယ်ပြီး လက်ရှိ ပဲခူးတိုင်း ဥက္ကဌ ဖြစ်ပါတယ်။ အဲဒီကျောင်းက ဘုန်းကြီးကျောင်းသင် ပညာရေးကို အကောင်အထည်ဖော်နေတဲ့ ကျောင်းတစ်ကျောင်းပါ။ အနီးအနား ပတ်ဝန်းကျင်က ကျောင်းသားများအပြင် မတတ်နိုင်ရှာတဲ့ ခပ်ဝေးဝေး ရွာများက ကျောင်းသားများပါ လာရောက်တက်ကြပါတယ်။ သူငယ်တန်းမှ ဆယ်တန်းအထိ ဆရာ၊ ဆရာမများကို ပုံမှန် လခပေး ငှားရမ်းထားပြီး သင်ကြားစေပါတယ်။ ဆရာတော်က တရားပွဲများ လိုက်လံဟောကြားရင်း ရရှိသော အလှူငွေများကို အဲဒီ ပရဟိတ လုပ်ငန်း အတွက် သုံးစွဲနေတာပါ။ ဆယ်တန်း စာမေးပွဲကြီး နီးလာရင်လည်း နာမည်ကြီး ကျူရှင်ဆရာများကို ငှားရမ်းပေးပြီး ဆယ်တန်း ကျောင်းသားများကို  Guide လုပ်ပေးစေပါတယ်။ ကျူရှင်တက်ဖို့ မတတ်နိုင်တဲ့ ဘယ်သူမဆို လာရောက် တက်နိုင်အောင် စီစဉ်ပေးထားပါတယ်။ 

ကိုယ်တို့ ညအိပ်ရတဲ့ အဆောင်က ကလေးတွေရဲ့ ကျောင်းဆောင်ပါ။ မမြင်ဖူးတာ ကြာပြီဖြစ်တဲ့ မြေဖြူနဲ့ ရေးတဲ့ ကျောက်သင်ပုံးတွေ ရှိပါတယ်။ ကလေးတွေရဲ့ ထိုင်ခုံ ခပ်စုတ်စုတ်လေးတွေကို စုပြီး ကုတင်လုပ်ပေးထားတာပါ။ အိမ်က လူတွေကလည်း ကိုယ့်ကို သီလရှင်ဝတ်ချင်တာ ကြိုမပြောလို့ ဆိုပြီး ပြောကြပါတယ်။ ကြိုပြောရင် ပိုပြီးပြည့်စုံတဲ့ ကျောင်းမှာ ဝတ်ဖို့ စီစဉ်ပေးမှာပေါ့လို့ ဆိုပေမယ့် ကိုယ့်အတွက်တော့ ခဏတဖြုတ် တရားအလုပ်လုပ်ခိုက်မှာ ပြည့်စုံတာ မပြည့်စုံတာကို စကားထဲ ထည့်မပြောချင်ပါ။ ဘုန်းကြီးကျောင်း ပညာရေး၊ ကလေးတွေ အတွက် လှူချင်စိတ်နဲ့ နောင် တရားစခန်းတွေ ပြည့်ပြည့်စုံစုံ ဖွင့်နိုင်အောင် ကျောင်းတိုက်အသစ် ဆောက်လှူချင်တွေတော့ ဖြစ်ပေါ်ခဲ့ပါတယ်။ ကိုယ်တို့ မိသားစုက နှစ်ဆန်းတစ်ရက်နေ့မှာ အရုဏ်ဆွမ်း တစ်နပ်စာ လှူခဲ့ပြီး ထွက်တဲ့ နေ့မှာလည်း တတ်နိုင်သလောက် နည်းနည်း ထပ်လှူခဲ့ပါသေးတယ်။ ပရဟိတ အလှူကို စိတ်ဝင်စားကြသူများ အတွက် ဒီကျောင်းတိုက်ကိုလည်း လှူနိုင်ပါတယ်လို့ သတင်းပေးလိုက်ပါရစေ..။

သိင်္ဂါကျော်

ဟိုရောက် ဒီရောက် အတွေးများ

ချော က အတွေးတွေ အကြောင်း ရေးခိုင်းလို့ စဉ်းစားလိုက်တော့ တွေးတာတွေက များလွန်းလို့ ဘာရေးရမှန်း မသိအောင် ဖြစ်သွားပါတယ်။ အတွေး ဆိုတာကလည်း တစ်စက္ကန့်မှာကို အများကြီး ဖြစ်နိုင်တဲ့ အရာ မဟုတ်လား...။ လောလောဆယ်တော့ လုပ်စရာ ရှိတဲ့ Project အကြောင်းပဲ စဉ်းစားနေမိလို့ ဘာပြောရမှန်းတောင် မသိပါဘူး။ ကိုယ်က ဒီလိုပဲ Thesis တုန်းကလည်း ခေါင်းစဉ် မသေချာမချင်း အဲဒီအကြောင်းပဲ စဉ်းစားနေမိတာ.. လမ်းသွားတုန်းရော.. အိပ်ကာနီးရော.. Toilet ဝင်ချိန်တောင် စဉ်းစားးနေတတ်သေးတာ...။ တစ်ခါတလေ ဝတ္တုဇာတ်လမ်း ဆက်မရေးတတ်တော့ရင်လည်း ဒီလိုပဲ နေရာမရွေး တွေးနေတတ်တာ..။ ဦးနှောက်ထဲမှာ တွေးလိုက်တာနဲ့ စာနဲ့ရေးပြီးသား ဖြစ်သွားရင် ကောင်းမှာပဲလို့တောင် တွေးမိပါတယ်။ ဇာတ်လမ်း တွေ ဟိုရောက်ဒီရောက် တွေးတာတွေတော့ အများကြီးပေမယ့် စာအနေနဲ့တော့ အကုန် မရေးဖြစ်ပါဘူး။ အချိန်ကုန် အကျိုးမရှိမှန်း သိပေမယ့် ဝါသနာပါနေတဲ့ ရုပ်ရှင်ကြည့်တတ်တာကလည်း အားတဲ့ အချိန်တစ်ချို့ကို ယူနေပြန်ပါရော..။

ကိုယ် တွေးပြီး ဇာတ်လမ်းဆင်တဲ့ အထဲမှာ တစ်ခါတလေ ကိုယ့်သူငယ်ချင်းတွေတောင် အလွတ်မပေးတတ်ပါဘူး။ ဘယ်လိုမှ မတွေ့နိုင်တဲ့ သူငယ်ချင်း နှစ်ယောက်ကို စိတ်ကူးထဲမှာ တွေ့ပေးပြီး ဇာတ်လမ်းဆင်ချင် ဆင်တတ်သေးတာ..။ ရည်းစားမရှိသေးတဲ့ လွတ်လွတ်လပ်လပ် သူငယ်ချင်းတွေပေါ့။ တစ်ခါတလေလည်း ကိုယ့်ကိုယ်ကိုယ် စိတ်ကူးထဲမှာ ပုံပြင်ထဲက မင်းသားလေးလို လူမျိုးနဲ့ တွေ့ပေးတတ်သေးတယ်။ ဒါပေမယ့် တွေးနေတုန်းမှာပဲ မင်းသမီးနေရာမှာ ကိုယ့်ကိုယ်ကို ထားရတာ မကြိုက်တော့ပဲ စိတ်ကူးထဲက မင်းသမီး ဖြစ်သွားပြန်ရော..။ ဘာလို့ဆို ကိုယ်သာ ယောက်ျားလေးဆိုလည်း ကိုယ်လိုလူမျိုးကို မကြိုက်လို့ပဲလေ..။ ဘာရယ်မဟုတ် ဟိုရောက် ဒီရောက် အစမရှိ အဆုံးမရှိ ဇာတ်လမ်းတွေလည်း တစ်ခါတလေ တွေးနေမိတာပဲ။ ငယ်ငယ်တုန်းက သူငယ်ချင်းတွေနဲ့လည်း  အပြင်မှာသာ မတွေ့တာ... စိတ်ကူးထဲမှာတော့ တွေ့ဖြစ်နေပါတယ်။

တွေးတဲ့ နေရာမှာတော့ ကိုယ်က အိပ်မက်ထဲမှာကို တွေးနေတတ်တဲ့လူပါ။ ကိုယ်က သူများလို သိပ်အိပ်မက် မမက်တတ်ဘူး။ မက်တဲ့ အိပ်မက်တွေလည်း သိပ်မမှတ်မိတတ်ပါဘူး။ တစ်ညတလေ မက်တတ်တဲ့ အိပ်မက်တွေထဲမှာတောင် ဝတ္တုဆန်ဆန် ဇာတ်လမ်းတွေ ပါသေးတယ်။ ညဘက်ကြည့်တဲ့ ဇာတ်ကားတွေကိုလည်း မစွဲလမ်း မပတ်သက်ပါပဲ မက်တာပါ။ ဒါပေမယ့် ခက်တာက အဲဒီအိပ်မက်တွေကို သေချာ မမှတ်မိတော့ပဲ ဇာတ်သိမ်းလောက်သာ မှတ်မိတတ်တာပါ။

စိတ်ကူးထဲမှာတော့ အရာရာကို လှလှပပ တွေးလို့ရပါတယ်...။ အဲဒါကြောင့်လည်း စိတ်ကူးယဉ် ဝတ္တုတွေမှာ ပျော်စရာ ဇာတ်သိမ်းတွေ ရှိကြတာပေါ့။ ဖြစ်ရပ်မှန်တိုင်းကတော့ မလှပကြဘူးလေ။ စိတ်ကူးထဲမှာတော့ နိုင်ငံကျော် စာရေးဆရာမကြီး လည်း ဖြစ်လို့ရတယ်။ ကမ္ဘာကျော် ရုပ်ရှင် ဒါရိုက်တာကြီးလည်း ဖြစ်လို့ရတယ်။ အောင်မြင်ကျော်ကြားတဲ့ စတိုင်ကျကျ ဖက်ရှင် ဒီဇိုင်းနာ လည်း ဖြစ်လို့ရတယ်လေ…။

ကိုယ် ငယ်ငယ်ကဆို အလွမ်းဝတ္တုတွေ မဖတ်ဘူး။ အမေတွေ အဒေါ်တွေ ဖတ်တဲ့ မောင်စိန်ဝင်းတို့ ငြိမ်းကျော် တို့ဆို အလွမ်းများလို့ မကြိုက်ဘူး။ ခုထိလည်း မကြိုက်ပါဘူး။ ရသပိုင်းမှာ နာမည်ကြီးတဲ့ ဝတ္တုတွေ လောက်သာ ဖတ်တာ။ အပျော်ဖတ်ဆိုရင်တော့ ပျော်ရွှင်တဲ့ ဇာတ်သိမ်းပဲကြိုက်တယ်..။ အပျော်ဖတ်ဝတ္တုတွေ အရောင်းသွက်နေတာလည်း ဒါကြောင့်ပဲ ဖြစ်မယ်။ ဘဝအမောတွေထဲက ပြေးချင်လို့မှ ဖတ်တာဆိုတော့ တစ်ချို့အပျင်းပြေ ဖတ်တဲ့ လူတွေကလည်း ဘဝသရုပ်ဖော်တွေ၊ စိတ်ညစ်စရာတွေ သိပ်မကြိုက်ကြတာ ဖြစ်မှာပေါ့လေ…။ ဒါပေမယ့် ငယ်ငယ်က စဖတ်တာ စုံထောက်ဝတ္တုတွေပါ။ အောင်ဇင်တို့၊ မြတ်ထွန်းသစ်တို့၊ မင်းသိင်္ခတို့ကို အဒေါ်က အဖတ်များတာ။ ဆရာမကြီး ကလျာ ရဲ့ ဝတ္တုတွေ လည်း ပါသေးတယ်။ ဘာသာပြန်တွေ ဆိုလည်း အမေ့ရဲ့ တက္ကသိုလ် စာကြည့်တိုက်မှာ ရှိတာတွေ အကုန်လောက်နီးနီးပဲ… အဒေါ်နဲ့ ကိုယ်နဲ့ ဖတ်ကြတာလေ…။

ငယ်ငယ်က ဂျူးရဲ့ ဝတ္တုတွေတောင် သိပ်မဖတ်ဖြစ်ဘူး။ မရှိမဖြစ်မိုး ကျမှ စကြိုက်တာ…။ ကြေမွသွားသော တိမ်တိုက်များ ကိုတော့ ၇ တန်းတုန်းက အတန်းထဲမှာ ဆရာ မလာတဲ့ အချိန်လည်း ရှိနေတာနဲ့ ဖတ်တာ နှစ်အုပ်လုံး ပြီးသွားတာပဲ။ ခုတော့ ဂျူးကို တကယ်ကြိုက်တယ်။ သူ့ဝတ္တုတွေရဲ့ ဇာတ်လမ်းတွေကို သဘောကျတာ မကျတာထက် ရေးသမျှ ဝတ္တုတိုင်း အောင်မြင်တဲ့ စာရေးဆရာမ တစ်ယောက်အနေနဲ့… နောက်ပြီး ခုချိန်ထိလည်း အပျိုကြီးဘဝမှာ လှလှပပ ရပ်တည်နေနိုင်သူ တစ်ယောက်အနေနဲ့ ပိုပြီး လေးစား အားကျ ပါတယ်။ 

 စာရေးဆရာထဲက နောက်ထပ် ကိုယ်လေးစားအားကျတဲ့သူတွေက A.J. Cronin နဲ့ Robin Cook ပါ။ A.J. Cronin ဆရာဝန်အလုပ်က အနားယူပြီးတဲ့ အချိန်မှ စာပေလောကကို ဝင်လာတာတောင် အများကြီး အောင်မြင်ခဲ့တဲ့သူမို့ လေးစားမိတာပါ။ သူ့ရဲ့ စာအုပ်တွေ အားလုံးကို ကိုယ်ကြိုက်တယ်။ ကိုယ်လည်း နောင်တစ်ချိန် ဖြစ်နိုင်သေးတယ်လို့ အိပ်မက်တွေကို မစွန့်လွှတ်ဖို့ တွန်းအားပေးနေသလိုပဲ။ Robin Cook ကလည်း ဆရာဝန် စာရေးဆရာ တစ်ယောက်ပါပဲ။ သူ့ဝတ္တုတွေကတော့ ဆရာဝန် အတွေ့အကြုံတွေ အခြေခံတဲ့ စုံထောက် အက်ရှင်ဇာတ်လမ်းတွေပါ။ လောလောဆယ် မှတ်မိနေတာကတော့ COMA ဆိုတဲ့ ဝတ္တုပါ။ စာရေးခြင်းသက်သက်နဲ့ အသက်မွေးတဲ့ စာရေးဆရာ စစ်စစ်တွေထက် ကိုယ်က အဲလို အသက်မွေးဝမ်းကြောင်း ပညာရပ်ကိုလည်း ထူးထူးချွန်ချွန် ရပ်တည်ရင်းနဲ့ အောင်မြင်တဲ့ စာရေးဆရာ ဖြစ်လာသူတွေကို ပို လေးစားအားကျမိပါတယ်။ နောက်ထပ် ကိုယ်ကြိုက်တဲ့ စာရေးဆရာတွေတော့ အများကြီး ရှိသေးတာပေါ့။

နောက်ထပ် အားကျမိတဲ့သူက အမျိုးသမီး ဒါရိုက်တာ မီမီလီဒါပါ။ အမျိုးသမီး ဒါရိုက်တာ ပေမယ့် drama ကားတွေရိုက်တာ မဟုတ်ပဲ Deep Impact တို့ Peacemaker တို့လို ကားမျိုးတွေ ရိုက်တာပါ။ ၂၀၀၉ မှာလည်း Antonio Banderas၊ Morgan Freeman တို့နဲ့ Thick as Thieves ကို ရိုက်ခဲ့ပါတယ်။ မြန်မာနိုင်ငံမှာတော့ ခေတ်မီ အက်ရှင်ကားတွေ science fiction တွေ ရိုက်နိုင်ဖို့က အဝေးကြီးလိုနေပါသေးတယ်။ (ကိုယ့်ကို သိန်း နှစ်ထောင် သုံးထောင်လောက် ထုတ်ပေးမယ့် ပရိုဂျူဆာ ရှိရင်တော့ ပီပြင်အောင် ရိုက်ပြမယ်လေ :D)။ ဒါပေမယ့် ကိုယ့်သူငယ်ချင်း ညီမငယ်တွေကတော့ ကိုယ် ဒါရိုက်တာ လုပ်တဲ့ ရုပ်ရှင်ကားမှာ မင်းသမီး မလုပ်ချင်ဘူးဆိုပဲ။ တောထဲတောင်ထဲတွေ.. ပြေးလွှား လှုပ်ရှားရတဲ့ ကားတွေ ရိုက်မှာမှန်း ကြိုသိနေကြတယ်လေ…။ နောက်ဆုံးခန်းမှာတော့ မင်းသားနဲ့ ကြည်နူးတဲ့ အခန်း ပါစေရမယ်လို့ သူတို့ကို ပြောရတယ်.. ဟားဟား..။ Computer Special Effects တွေနဲ့ ပတ်သက်ပြီး စိတ်ဝင်စားပေမယ့်လည်း အချိန်မပေးနိုင်တာရယ်.. သင်တန်းကြေးတွေကလည်း ဈေးကြီးပြီး တကယ်တတ်အောင် သင်နိုင်တဲ့ သင်တန်းလည်း သိပ်မရှိတာကြောင့် ခုချိန်ထိ မတက်ဖြစ်သေးဘူး။ (မြန်မာနိုင်ငံက ထုတ်တဲ့ ကာတွန်းကားတွေထဲက ကွန်ပျူတာနဲ့ ရေးတဲ့ ကာတွန်းရုပ်တွေကလည်း တော်တော်ကို အရုပ်ဆိုးတယ်လေ :D)

ကိုယ်က အဲလိုပဲ ဟိုဟိုဒီဒီ အတွေးများတတ်တဲ့ အကျင့်ရှိလို့ တကယ် အာရုံစိုက်ရမယ့် ပညာရေးဘက်မှာလည်း မထူးချွန်ခဲ့ပါဘူး။ အားတဲ့အချိန် ရုပ်ရှင်လေးကြည့်လိုက် ဝတ္တုလေး ဖတ်လိုက် လုပ်နေမှတော့ ပညာရေးမှာ ဘယ် ထိပ်ဆုံး ရောက်နိုင်ပါတော့မလဲ။ ကိုယ့်မိဘတွေကတော့ ဖြစ်စေချင်ရှာတယ်။ ဒါပေမယ့် ကိုယ့်ကိုယ်ကိုယ်တော့ ဆင်ခြေပေးစရာ ရှိပါတယ်။ ကိုယ်က မှတ်ဥာဏ်မကောင်းဘူးလို့ ကိုယ့်ကိုယ်ကို အမြဲပြောတတ်တယ်။ စာကျက်ရတဲ့ အချိန် အာရုံများရင်လည်း ကျက်မရဘူး။ ဘာသံမှ မကြား၊ လူတစ်ယောက်မှ မရှိတဲ့ နေရာမှာကျက်မှ ကိုယ်က စာရလွယ်တာလေ.. :D ။ အဲဒါကြောင့် စာတွေ ပြန်ကျက်ရမယ့် ကလေး ဘဝတော့ ပြန်မရောက်ချင်တော့ဘူး။ 
တစ်လောက Movie 5 က နိုင်ငံခြား ရုပ်ရှင် တစ်ကား ကြည့်လိုက်ရတယ်။ ပြေတီဦးနဲ့ မြန်မာမှုပြုပြီး ရိုက်ထားတာလည်း အိမ်ပြန်တဲ့ ကားပေါ်မှာ ကြည့်ခဲ့ဖူးတယ်။ ၁၃ နှစ် အရွယ်ကလေးက လူကြီး ဖြစ်ချင်လို့ ဆုတောင်းရင်းနဲ့ တကယ်ဖြစ်သွားပြီး ကစားစရာ ကုမ္ပဏီမှာ အလုပ်လုပ်ရင်း မင်းသမီး နဲ့ တွေ့ပါတယ်။ နောက်တော့ လူကြီးတွေရဲ့ မဖြူစင်မှုတွေ၊ တစ်ယောက်နဲ့တစ်ယောက် လှည့်ဖျား ညစ်ပတ်မှုတွေကြောင့် ကလေး ပြန်ဖြစ်ချင်ပြီး ပထမ ဆုတောင်းခဲ့တဲ့ နေရာပြန်သွားပြီး ကလေးအဖြစ် ပြန်ရောက်အောင် ဆုတောင်းလိုက်တဲ့ ကားပါ။ ကလေး အဖြစ် ဆုတောင်းအပြီးမှာပဲ မင်းသမီးက လိုက်လာတော့ သူက ဆုတောင်းပြီးသွားကြောင်း ပြောပြီး မင်းသမီးကိုပါ သူ့လို ဖြစ်အောင် ဆုတောင်းလိုက်ပါလား လို့ ပြောတော့ မင်းသမီးက သူ ကလေးဘဝကို ဖြတ်သန်းခဲ့ ဖူးပြီမို့ ပြန်မရောက်ချင်တော့ပါဘူးလို့ ပြောပါတယ်။ ဒါနဲ့ ကိုယ်တို့ သူငယ်ချင်းတွေလည်း ကိုယ့်ကိုယ်ကို ပြန်မေးကြတော့ ဘယ်သူမှ ကလေးဘဝ ပြန်မရောက်ချင်တော့ပါဘူး။ ဒါပေမယ့် ဖြစ်နိုင်မယ်ဆိုရင်တော့ အသက်မွေးဝမ်းကြောင်း ရွေးရမယ့် ဘဝ တစ်ဆစ်ချိုးမယ့် အချိန်ကိုတော့ ပြန်ရောက်ချင်ပါတယ်။ ခုနေ အဲဒီ အရွယ်ပြန်ရောက်ရင်တော့ လက်ရှိအလုပ်ကို လုပ်ဖြစ်ချင်မှ လုပ်ဖြစ်ပါလိမ့်မယ်.. ဘွဲ့လွန်ကို တစ်ခြားနိုင်ငံမှာ တက်ဖို့ ကြိုးစားချင် ကြိုးစားမိလိမ့်မယ်လေ။ ခုနေ စိတ်ကူးကတော့ အရင်နဲ့ မတူမှာ သေချာပါတယ်။

ဘာပဲဖြစ်ဖြစ် ခုလည်း လုပ်နေတဲ့ အလုပ်မှာ စိတ်ညစ်ညူးနေတာတော့ မဟုတ်ပါဘူးလေ…။ မိဘ မိသားစုရဲ့ နောင်ရေးကို စဉ်းစားရင်သာ ကိုယ်လုပ်ခဲ့တာ မှန်ရဲ့လားလို့ စဉ်းစားမိတာပါ။ ဘယ်မှာနေနေလည်း ကိုယ်က တွေ့တဲ့ သူငယ်ချင်းတွေနဲ့ ပျော်အောင်နေပြီး ဘဝကို ပျော်ပျော်ဖြတ်သန်းတတ်တဲ့သူပါ။ ဘယ်သူမှ မရှိလည်း ကိုယ့်ဟာကိုယ် အားတဲ့အခါ တွေးချင်တာတွေး ရေးချင်တာရေး… ရုပ်ရှင်လေး ကြည့်ချင်တဲ့ အခါကြည့်လိုက်၊ စာအုပ်လေး ဖတ်တဲ့ အခါ ဖတ်လိုက်နဲ့ စိတ်ချမ်းသာသလို နေနေတဲ့သူပါ။ ကိုယ်က တစ်ခါတလေ စိတ်လေနေရင်၊ စိတ်ဖိစီးမှုများလာရင်လည်း အဲလိုပဲ ရုပ်ရှင်ကြည့်၊ စာအုပ်ဖတ်ပြီး မေ့အောင်လုပ်လိုက်တယ်လေ။

ခေါင်းစဉ် တပ်ထားတဲ့အတိုင်း ရေးတာတွေက ဟိုရောက်ဒီရောက် ဖြစ်ကုန်ပါပြီ။ ချော ရဲ့ Tag အကြွေးကို ဆပ်တာပါနော်…။ လာဖတ်တဲ့ သူ အပေါင်းကို အားနာပါတယ်.. :P ။

သိင်္ဂါကျော်

ဓါတ်တော်ချိုင့် သို့ တစ်ခေါက်

ကိုယ်တို့ ဓါတ်တော်ချိုင့် ကို သွားချင်နေတာ ကြာပါပြီ။ အိမ်ပြန်နေကြတာနဲ့၊ အလုပ်ကိစ္စနဲ့ ခရီးထွက်နေကြတာနဲ့ လူမစုံ ဖြစ်ပြီး မသွားဖြစ်တာပါ။ တစ်ခါ သွားမယ်လို့ စီစဉ်လိုက်ပြန်တော့လည်း ဓါတ်တော်ချိုင့် မှာ လူငါးယောက် ပျောက်သွားတယ် ဆိုတဲ့ သတင်း ထွက်လာလို့ တစ်ချို့  ကမသွားရဲတော့တာနဲ့  အစီအစဉ်ပျက်သွားပြန်ပါတယ်..။ ကောလဟာလ သတင်းဆို တော်ရုံနဲ့ မယုံကြည်တတ်တဲ့ ကိုယ်လည်း ပြင်ဦးလွင် ရဲစခန်းကို ဖုန်းဆက်ပြီး မေးကြည့်တော့ သူတို့က လုံးဝ မသိပါဘူးလို့ ပြောတော့ ကိုယ်တို့လည်း ကောလဟာလ သက်သက်ပဲလို့ ထင်ခဲ့ပါတယ်။ သွားတော့ မသွားဖြစ်တော့ပါဘူး။ ဒီတစ်ပတ် စနေတော့ တကယ် သွားဖြစ်သွားပါတယ်။

လမ်းပြ အဒေါ်ကြီး ပြောပြမှ အရင်က ကောလဟာလရဲ့  ဖြစ်ရပ်မှန်ကို သိခဲ့ရပါတယ်။ လူ ခုနစ်ယောက် လာခဲ့ပြီး ငါးယောက် တကယ် သေခဲ့တာပါ။ သတင်းကြားသလို ဘာမှန်းမသိ ပျောက်သွားတာတော့ မဟုတ်ခဲ့ပါဘူး။ အဲဒီမှာ ဘာမှမဆိုင်ပဲ ကိုယ်က Jaws ဇာတ်ကားတွေထဲက တာဝန်ရှိသူတွေက ခရီးသွားတွေ မလာမှာစိုးလို့ အန္တရယ်ရှိတဲ့ အဖြစ်မှန်ကို ဖုံးထားတာကို သွားသတိရမိပါတယ်။

အဲဒီခရီးသွား အဖွဲ့မှာ မိန်းကလေး တစ်ယောက် ယောက်ျားလေး ခြောက်ယောက်ပါပါတယ်။ သူတို့က စားဖို့ သောက်ဖို့ သယ်လာကြတဲ့အထဲမှာ အမဲသားတွေတောင် ပါလာခဲ့ပါတယ်။ သောက်စရာတွေလည်း ပါတာပေါ့။ မိန်းကလေး နဲ့ ယောက်ျားလေး အတွဲကလည်း အမှားအယွင်း ရှိခဲ့တယ်လို့ ပြောပါတယ်။ ဒီတောတောင်က အဲဒါမျိုးတွေ မကြိုက်ပါဘူး တဲ့။ သူတို့ အဖွဲ့က လမ်းပြလည်း မခေါ်ပဲ ကိုယ့်ဟာကို လျှောက်သွားရင်း လမ်းမှားသွားခဲ့တာပါ။ လျှိုထဲ ရောက်ပြီး ပဒူအုံ နဲ့ တိုးသွားပါတယ်။ သူတို့က လောက်လေးနဲ့ သွားပစ်တာလို့လည်း ပြောပါတယ်။ အဲဒီမှာပဲ ပဒူတွေ ဝိုင်းတုတ်ပြီး တစ်ချို့လည်း ချောက်ထဲခုန်ချပြီး ခေါင်းနဲ့ ခိုက်မိသွားပါတယ်။ မပြေးနိုင်တဲ့လူတွေကတော့ မျက်နှာ နဲ့  ခေါင်းတွေမှာ အတုပ်ခံရပြီး အခြေအနေဆိုးခဲ့ပါတယ်။ လမ်းပြတွေပဲ သူတို့ကို ရှာဖွေပြီး ဓါတ်တော်ချိုင် အပေါက်ဝကို သယ်လာ၊ ချထားတာပါ။ ဆေးရုံခေါ်သွားဖို့ စောင့်နေတုန်းမှာပဲ မိန်းကလေးကတော့ ဆုံးသွားတယ်လို့ ပြောပါတယ်။ ခေါင်းက ဆံပင်တွေထဲမှာကို ပဒူကောင်တွေပါလာပြီး ဆွဲထုတ်လိုက်တဲ့ အချိန်မှာ ပဒူကောင်တွေရဲ့  ပါးစပ်ထဲမှာ အသားစတွေ ပါလာတာ တွေ့  ရတယ်လို့  ပြောပါတယ်။ တစ်ယောက်ကိုတော့ အကြာကြီး ရှာမတွေ့  ပဲ ဖြစ်နေတာ တကယ်တော့ သူက  ပဒူကောင်ရန်က ပြေးရင်းနဲ့ ရေတံခွန်နားရောက်သွားပြီး ခုန်ချလို့  နစ်သေရတာပါ။ ဆေးရုံရောက်တာလည်း တကယ်တော့ အချိန်မကြာခဲ့ပါဘူး။ အချိန်မီနိုင်ပါရဲ့  နဲ့  သေသွားကြတာ တောထဲမှာ မယူသင့်တဲ့ အသားတွေယူလာ၊ မလုပ်သင့် မပြောသင့်တာတွေ လုပ်လို့  ပြောလို့  ဖြစ်ရတာလို့  လမ်းပြအဒေါ်ကြီးကတော့ ပြောတာပဲ။ ဆေးရုံရောက်ပြီး အသက်ရှင်သွားတဲ့ နှစ်ယောက်ကတော့ အိမ်ထောင်သည်တွေ ဖြစ်ပြီး အရက်လည်း မသောက်ခဲ့ဘူး လို့  ပြောပါတယ်။

အဆင်းတုန်းကတော့ ဓါတ်ပုံတွေ ရိုက်ပြီး  ပြုံးပြုံး ပြုံးပြုံးနဲ့  သွားခဲ့ကြတာ.. အတက်ကြတော့မှ တကယ့်ကို စကားတောင် မပြောနိုင်ကြတော့ပါဘူး။ ကိုယ်ကတော့ နောက်ဆုံးပဲ.. :D ကိုယ့်နောက်မှာ တစ်ယောက်ပဲ ကျန်တယ်။ ပင်ပန်းလွန်းလို့  နောက်တစ်ခေါက်သွားဖို့  တော့ တော်တော် စဉ်းစားရပါဦးမယ်။

ရေတံခွန်ကတော့ နွေဦးရောက်တော့မှာဆိုတော့ ရေသိပ်မများတော့ပဲ ကျောက်တုံးတွေ ပေါ်လောက်အောင် နည်းနေပါပြီ။ ထုံးစံအတိုင်း ကိုယ်လက်စွမ်းပြထားတဲ့ ပုံလေးတွေ တင်လိုက်ပါတယ်။

 

  

သိင်္ဂါကျော်