ပုသိမ်မိုး

မိုး မိုး
မျှော်တုန်းကတော့ မလာ မလာ နဲ့
လာပြန်တော့လည်း
သည်းသည်းမည်းမည်း
မိုးဖြူမစဲ မိုးမည်းစွေရွာလို့။

အသည်းခွဲတတ်တဲ့
မိုးနာမည်နဲ့ ချစ်သူမျိုးလည်း
မရှိခဲ့ဖူးပါပဲ
မိုးကို
ငါမုန်းတယ်။

ဇွန် ဇူလိုင်
မိုးနဲ့အမြဲမိတ်ဖွဲ့နေတတ်တဲ့ လမျိုး
အဲဒီလိုလမျိုးမှာ
အားလုံးနဲ့အဝေး
တစ်စိမ်းတို့ အရပ်မှာ
မိုးကလည်း သည်းသည်းရွာလို့ကောင်းတဲ့
Weekend days တွေမှာ
ငါလည်း
တစ်နေကုန် အိမ်တွင်းအောင်းပြီး
မိုးကြောက်တဲ့ သတ္တဝါလို
အထီးကျန် တွေးရင်းငေးရင်း
လွမ်းစရာ မရှိပါပဲ
လွမ်းချင်သလိုလိုတောင်
ဖြစ်လာပါရော...။

(သိင်္ဂါကျော်)
၇.၆.၂၀၀၉

လူကြောက်

ခုနေခါမှာ
ငါ့ကိုမေးလာကြည့်
ဘဝမှာ
ရည်မှန်းချက်ကဘာလဲလို့..
ငါမပြောတတ်တော့ဘူး...
ဘဝကပေးလာတဲ့
လမ်းကြောင်းထဲမှာပဲ
အလိုက်သင့်မျောပါနေလို့ပေါ့။

အသက်က ၃၀
ငွေများများ ရှာနိုင်တဲ့အလုပ်လည်း
တစ်ခါမှမလုပ်ဖူးလို့
သဌေးဖြစ်ဖို့လည်း
ရည်မှန်းလို့မရဘူး။

အောင်မြင်ကျော်ကြားမှုဆိုတာကလည်း
ငါနဲ့မသက်ဆိုင်တဲ့အရာတစ်ခုဖြစ်နေဆဲပဲ၊
ဒါပေမယ့် ငါလည်း
ဆန်ကုန်မြေလေး တစ်ယောက်တော့
မဟုတ်ခဲ့ပါလေ..
တာဝန်တွေရှိတယ်
ဝတ္တရားတွေ ရှိတယ်၊
ပုံစံခွက်ထဲအမြဲမနေချင်ပေမယ့်
လူတစ်ယောက်မှာရှိသင့်တယ်ဆိုတဲ့
အသက်မွေးမှုတစ်ခုတော့လုပ်နေလေရဲ့...။

ကိုယ့်အိပ်မက်မဟုတ်ခဲ့တော့လည်း
ထိပ်ဆုံးရောက်အောင်လည်း မကြိုးစားနိုင်၊
နောက်ဆုံးမှာလည်း ထိုင်မနေချင်တဲ့သူမို့
ဆန္ဒနဲ့ဘဝကြား
ဒုက္ခတွေများနေဆဲပဲ...။
အိပ်မက်တွေလည်း နှစ်မြှုပ်ထားရဆဲပဲ...။

အိပ်မက်ကိုအကောင်အထည်ဖော်ဖို့
အခွင့်အလမ်းအဆင်သင့် မရှိတဲ့သူမို့
အနည်ကျဘဝကိုလည်း
စွန့်ခွာဖို့သတ္တိနည်း...
ဒီလိုနဲ့ပဲ...
ဘဝရေစီးထဲ
အလိုက်သင့်မျောပါရင်း
အသက်တွေလည်း
တစ်နှစ်ပြီးတစ်နှစ် ကြီးလာပေါ့...။

(သိင်္ဂါကျော်)

ရွှေစက်တော်ခရီး

ကိုယ်တို့ မြို့နဲ့ ရွှေစက်တော်နဲ့ သိပ်အဝေးကြီး မဟုတ်ပေမယ့်လို့ တစ်ခါမှ မရောက်ဖြစ်ခဲ့ဘူး။ ကိုယ်ကလည်း အိမ်မှာ နေတဲ့ အချိန် သိပ်မရှိပဲ အဝေးမှာပဲ အမြဲနေနေတော့ မိသားစုနဲ့ အတူတူ ဘယ်ခရီးမှ သိပ်မသွားဖြစ်ခဲ့ဘူး။ ဒီတစ်ကြိမ်တော့ သွားဖြစ်အောင် သွားမယ်ဆိုပြီး ကျောင်းပိတ်ရက် သုံးရက်မှာ အိမ်ပြန်ခဲ့ပါတယ်။ ပြန်ဖြစ် မပြန်ဖြစ် မသေချာဖြစ်နေပြီး ပြန်မယ့် နေ့မှပဲ အိမ်ကို ဖုန်းဆက်လိုက်ရပါတယ်။ (မသွားခင် ကင်မရာတစ်လုံးတော့ ပြေးဝယ်ခဲ့ရသေးတယ်)

အိမ်ကလည်း ဘာမှ မစီစဉ်နိုင်ပဲ လိုင်းကားလက်မှတ်ပဲ ဝယ်ထားနိုင်ပါတယ်။ အိမ်ရောက်ပြီး နောက်နေ့ မနက်စောစောမှာပဲ ရွှေစက်တော်ကို ထွက်ခဲ့ကြပါတယ်။

လမ်းမှာ ဖုန်ကလည်း အရမ်းထူ၊ ကားကြီးကလည်း တအိအိနဲ့ မကွေးကို ညနေ ၄ နာရီ ကျော်မှ ရောက်သွားပါတယ်။ ရွှေစက်တော် လိုင်းကား လွတ်သွားလို့ လေးဘီးတစ်စီး ငှားပြီး သွားကြရပါတယ်။ တစ်ချို့နေရာမှာ နှာခေါင်းစည်း နဲ့တောင် သွားရပါတယ်။ ညဘက်မှာ အောက်စက်တော်ရာ ကို ဖူးခဲ့ပါတယ်။

ကိုယ်တို့ သွားတဲ့ အချိန်က သုံးရက်ဆက်ပိတ်တဲ့ ရက်မို့ လူအရမ်း များနေပါတယ်။ မန်းချောင်းထဲက ရေကလည်း နောက်ကျိ ပြီး ရေမှော်တွေနဲ့မို့ သိပ်ပျော်စရာ မကောင်းတော့ပါဘူး။

မနက်ဘက် အထက်စက်တော်ရာတက်ပြီး ဖူးရတာကတော့ ကြည်နူးစရာပါ။

အောက်ဘက်ရှုခင်းကတော့ အတော်ကို လှပါတယ်။

အနှစ် ၅၀ က ဗောဓိညောင်ပင်မှာလည်း ညောင်ထောက်ခဲ့ပါသေးတယ်။

နောက်တစ်နေ့ ၁၀ နာရီလောက်မှာ ပြန်ထွက်ခဲ့ပြီး အလာတုန်းက ကားနဲ့ပဲ ကျောင်းတော်ရာ ကို သွားခဲ့ပါတယ်။ ဖုန်တွေလူးပြီး လူရုပ်မပေါ်တော့လောက်အောင် ပေတူးပြီး ကျောင်းတော်ရာကို ရောက်သွားကြပါတယ်။ အဲဒီက ဆက်ပြီး မင်းဘူးစက္ကန်းတဲ၊ နဂါးပွက်တောင်တော် တို့ကို သွားပြီး မကွေးကို ပြန်အရောက်မှာတော့ ကားလက်မှတ် ကြိုမမှာမိတဲ့ အတွက် ကားမရတော့ပဲ မကွေး အဝေးပြေးဂိတ်မှာ တစ်ည အိပ်ခဲ့ရပါသေးတယ်။

အဲဒီက ဆက်ပြီး မင်းဘူးစက္ကန်းတဲ၊ နဂါးပွက်တောင်တော် တို့ကို သွားပြီး မကွေးကို ပြန်အရောက်မှာတော့ ကားလက်မှတ် ကြိုမမှာမိတဲ့ အတွက် ကားမရတော့ပဲ မကွေး အဝေးပြေးဂိတ်မှာ တစ်ည အိပ်ခဲ့ရပါသေးတယ်။

ဘာမှ ထူးထူးထွေထွေ မဟုတ်ပေမယ့် ကိုယ်သွားခဲ့တဲ့ ခရီးလေးတွေကို အမှတ်တရ ဖြစ်စေချင်လို့ တင်လိုက်တာပါ။ သည်းခံပြီး ဖတ်ပေးတဲ့အတွက် ကျေးဇူးပဲနော်...။

(သိင်္ဂါကျော်)