ဆူးကြားထဲက ပန်းများ

ဘလော့ကို ပစ်ထားကြာသွားပါတယ်..။ Transformer ပျက်နေလို့ မီးပျက်နေတာက တစ်ပတ်လောက် ရှိမယ်..။  လျှပ်စစ်မီး မရှိတဲ့ ရွာတွေမှာလိုပဲ မီးသွေး မီးဖိုနဲ့ ထမင်း၊ ဟင်း ချက်စား..။ ညကျတော့ ရေဒီယိုလေးနဲ့ FM လေး နားထောင်..။ လျှပ်စစ်မီး မရှိတဲ့ ဘဝဟာ ဘယ်လို မနေပျော်မှန်းကို မသိပါဘူး။ မီးပြန်လာတော့လည်း အလုပ်အကြွေးတွေ လုပ်နေတာနဲ့..။ ပြီးတော့ အိမ်ပြန်နေတာနဲ့...။ မီးပျက်နေတုန်း ဝတ္တုတစ်ပုဒ် လက်ရေးနဲ့ ရေးထားတာလည်း တန်းလန်းကြီး ပြန်ရိုက်နေတာလည်း မပြီးသေးလို့...။ ခု blogger.com ကလည်း ဒီအတိုင်းဖွင့်လို့ မရတော့ပဲ freedom နဲ့ ကျော်မှပဲ ရပါတော့တယ်...။ တင်ဖို့ရာ အရင်လို သိပ်မလွယ်ကူတော့ဘူး။ Internet ဆိုတာလည်း Yatanarpon Teloport ကြီးနဲ့ အနီးလေးမှာကို ခုတလော ဘာဖြစ်မှန်းမသိပဲ နှေးကွေးနေတာ...။ ဟဲဟဲ အမှန်တော့ စာရေးပျင်းနေတာကို အကြောင်းပြချက်တွေ ပေးနေတာပါ။ မြန်မာနိုင်ငံက ကိုယ်ပိုင်ဆိုက်ဒ် မဝယ်နိုင်သေးတဲ့ ဘလော့ဂါတွေ ရဲ့ ဘလော့ပေါ်မှာ တင်ရဖို့ အရေးက ဆူးကြားမှာ ပွင့်တဲ့ cactus ပန်းလေးတွေလိုပါပဲလို့...။ ဝတ္တုတစ်ပုဒ် ရိုက်နေတာ မပြီးသေးလို့ ပုံလေးတွေ တင်ပြီး တောင်းပန်တာပါ..။ :D

မျှော်လင့်ချစ်

ကောင်မလေးရေ..

မင်းအပြုံးတစ်ချက်ပါပဲ

အားလုံးရဲ့

လှောင်ပြောင်ချင်တဲ့ မျက်ဝန်းတွေကို ဖြတ်ပြီး

မျှော်လင့်ခဲ့ရတာ…။

ကောင်မလေးရေ..

မင်းအငြင်းကိုမှ

စိတ်မပြတ်နိုင်တာ

ငါ့ကို စိတ်ကုန်စရာလို့ ထင်နေသလား။

မင်းအချစ်က

တစ်ခြားမှာဆိုလည်း

ဒုသနသော မဖြစ်သရွေ့တော့

မျှော်လင့်ပါရစေ

ကောင်မလေးရေ…။

ငါ့ကို မုန်းမနေဘူးလို့လည်း

ကိုယ့်ကိုယ်ကို အထင်ကြီး ပါရစေ။

မင်းဘက်က

အတုံ့အလှယ် နားလည်မှုကို

ဘယ်အခါမှ မရနိုင်ဘူးဆိုတဲ့

လူတကာရဲ့ အထင်တွေကို

ချိုးဖျက်နိုင်မယ်ဆို

ငါ ဘယ်လောက်ပျော်လေမလဲ

မင်းတွေးကြည့်ပါ

ကောင်မလေးရေ…။

မင်းက စောင့်ဆိုရင်

နောက်ဆုံးထွက်သက်ထိ

ငါက စောင့်နိုင်ပါရဲ့။

သို့ပေမယ့်လေ

ဝေးနေတဲ့အခါ

ငါ့ဖုန်းတွေကို မကိုင်ပဲ မနေပါနဲ့၊

မင်း စကားတစ်ခွန်းလောက်နဲ့တော့

ငါ့အလွမ်းတွေကို ဖြေပေးပါ။

Online မှာ မတွေ့ချင်လို့

ငါ့ကိုလည်း block မလုပ်ပါနဲ့

မင်းနဲ့ အဆက်အသွယ် ရှိနေတာလေးတစ်ခုနဲ့

ငါ့နေ့တွေ အဓိပ္ပါယ်ရှိပါရစေ..

ကောင်မလေးရေ..။

သိင်္ဂါကျော်

25.1.2010

10:04 pm

ရွှေစာရံသို့ တစ်ခေါက်

စာမရေးလို့ ဝိုင်းပြောနေကြပေမယ့် စိတ်မပါဘူးဖြစ်နေလို့ Farm ဆော့ပြီး ရုပ်ရှင်ပဲ ကြည့်နေဖြစ်လို့ တောင်းပန်ပါတယ်..။ စာအသစ် မရေးဖြစ်သေးခင် ပုံလေးတွေပဲ တင်ပါရစေဦးနော်...။

စောမွန်လှ မင်းသမီးလေး တည်ထားခဲ့တဲ့၊ မန္တလေးတိုင်း ပုသိမ်ကြီးမြို့နယ် ဒုဌဝတီ မြစ်ကမ်းနံဘေးမှာ တည်ရှိတဲ့ ရွှေစာရံဘုရား ကို မန္တလေး-ပြင်ဦးလွင် ကားလမ်းမကြီး မှ အထဲသို့ မြင်းလှည်းစီးပြီး သွားခဲ့ပါတယ်။

အဝင်ဝ မုခ်ဦးမှာ ရှိတဲ့ ကြည်ညိုဖွယ်ရာ ရုပ်ပွားတော်မြတ်ပါ။

ရုပ်ပွားမြတ် နံဘေးမှာတော့ လူအများက ပွဲများ ဆက်နေကြတဲ့ ရုပ်ထုတွေ ရှိပါတယ်။

အစ်မတော် စောမွန်လှ နတ်နန်းပါ။ အတွင်းမှာတော့ လူတွေ စည်ကားနေပါတယ်။ ကိုယ်တို့ကတော့ ပွဲလည်း မဆက်၊ ဝင်လည်း မကန်တော့ပဲ ဓါတ်ပုံလေးပဲ ဝင်ရိုက်ပြီး ပြန်ထွက်ခဲ့ပါတယ်။

ရက်ကန်းစင်တောင်ဆရာတော်၊ အဘဘိုးဘိုးအောင် နဲ့ အဘ ဘိုးမင်းခေါင် တို့ရဲ့ ရုပ်ထုတော်တွေပါ။

ဘုရားစောင်းတန်းက လက်ဆောင်ပစ္စည်း ဆိုင်ကလေးတွေပါ။

 

ရေခမ်း နေတဲ့ ဒုဌဝတီမြစ်ရိုးတစ်လျှောက်ကိုလည်း ဆင်းကြည့်ခဲ့ကြပါသေးတယ်။ ဒီအတိုင်း လူတွေ ဆိုင်ကယ်တွေ ဖြတ်ကူးလို့ ရလောက်တဲ့ မြစ်ရေ တိမ်တိမ်လေးထဲမှာပဲ ရေချိုး အဝတ်လျှော်ကြသူများကတော့ ရှိနေဆဲပါ။

မြစ်ဘေးက ပြန်တက်လာကြပြီးတော့ အနီးက ရှေးဟောင်းဘုရားများကို ဖူးမြော်လေ့လာခဲ့ပါတယ်။

အတွင်းထဲဝင်ပြီး ဖူးမြှော်လို့ရတဲ့ စေတီတော် အတွင်းမှာ တည်ထားတဲ့ လျောင်းတော်မူ ရုပ်ပွားတော်မြတ်ပါ။

ဖိုးကုလားဘုရား လို့ ဆိုင်းဘုတ်တပ်ထားတဲ့ စေတီတော်ကတော့ အတွင်းမှာ ရှေးဟောင်း နံရံဆေးရေး လက်ရာများ ရှိလို့လားမသိ၊ သော့ပိတ်ထားပြီး ဝင်ရောက်လို့ မရတာကြောင့် အတွင်းထဲက ရုပ်ပွားတော်ကို သံတိုင်ကြားကပဲ ဖူးမြှော်ပြီး ဓါတ်ပုံ ရိုက်ခဲ့ရပါတယ်။

 

နည်းနည်းလောက် ဆက်သွားတော့ ဖိုးပေါ်ဘုရား ဆိုတဲ့ ရှေးဟောင်းစေတီ တစ်ဆူကိုလည်း တွေ့ရပါတယ်။ 

ဒုဌဝတီမြစ်ကမ်းက ရေခမ်းနေလို့ မျှော်မှန်းထားသလောက် မသာယာပေမယ့်လည်း ရှေးလက်ရာ သမိုင်းဝင် စေတီတော်တွေ ကို ဖူးမြှော်ရလို့ ကျေနပ်နှစ်သိမ့်စွာနဲ့ ပြန်လာခဲ့ကြပါတယ်။

သိင်္ဂါကျော်

24.1.2010