စိတ်ဓာတ်ကောင်းဖို့က အဓိက

              စိတ်ဓာတ်၊ လုပ်ရပ်၊ ရလဒ် (၃) မျိုးတွင် စိတ်ဓာတ်သည် အရေးပါဆုံး အချက် ဖြစ်ပါသည်။ “စိတ်ဓာတ် ကောင်းမှ ရလဒ်ကောင်း” ဆိုသလို ရလဒ်ကောင်း တစ်ခု ရရှိရန် အတွက် လုပ်ရပ်ကောင်းဖို့ လိုအပ်သလို ထိုလုပ်ရပ်ကောင်းကို လုပ်ကိုင်နိုင်ရန် အတွက် စိတ်ဓာတ်ကောင်း ရှိဖို့က အခြေခံ လိုအပ်ချက် ဖြစ်ပါသည်။ အလုပ်တစ်ခုကို လုပ်ချင်သည့် စိတ်ဓာတ်သာ ပြင်းပြင်းပြပြ ရှိလျှင် ထိုအလုပ်ကို ဧကန်မုချ အောင်မြင်အောင် လုပ်နိုင်မည်သာ ဖြစ်သည်။

              ၁၉၈၇ ခုနှစ်တွင် အသက် ၇၄ နှစ် ရှိပြီဖြစ်သည့် ဘေဖန်လီ ဆိုသည့် တရုတ်အဘိုးအို တစ်ယောက်သည် ဆိုက်ကားနင်းသော အလုပ်ကို လုပ်ကာ သူ၏ အသက် ၉၀ ရောက်သည်အထိ ကျောင်းမနေနိုင်သည့် ကလေးများကို ကျောင်းထားပေးခဲ့ပါသည်။ ထက်သန်ပြင်းပြသော စိတ်ဓာတ်ကောင်း တစ်ခုကြောင့် လူတိုင်း မလုပ်နိုင်သည့် အလုပ်တစ်ခုကို လုပ်နိုင်ခဲ့ခြင်းပင် ဖြစ်ပါသည်။ ကမ္ဘာပေါ်တွင် ကိုယ်လက်အင်္ဂါ မသန်စွမ်းသော်လည်း ပြင်းပြသော စိတ်ဓာတ်များဖြင့် မိမိတို့ ရည်မှန်းချက်ကို အောင်မြင်အောင် လုပ်နိုင်ခဲ့သူများ အများအပြားပင် ရှိပါသည်။

              “စိတ်အားထက်သန်မှု မပါပဲ ကြီးကျယ်တဲ့ အောင်မြင်မှုကို မရရှိနိုင်ပါ” ဟု ၁၉ ရာစု ကဗျာဆရာနှင့် ပြုပြင်ပြောင်းလဲရေး ခေါင်းဆောင် တစ်ယောက်ဖြစ်သော Ralph Waldo Emerson က ပြောခဲ့ဖူးပါသည်။ စိတ်အားထက်သန်သူများသည် သူတို့ စိတ်အားထက်သန်သည့် အလုပ်ပေါ်တွင် အချိန်အကြာကြီး အာရုံစိုက် အလုပ်လုပ်နိုင်ကြပါသည်။ သူတို့သည် သူတို့ လုပ်နေသော အလုပ်အပေါ်တွင် သူတို့၏ ဦးနှောက်၊ သိစိတ်၊ မသိစိတ် အားလုံးကို အသုံးချပြီး လုပ်သည့်အတွက် ရလာဒ်ကောင်းများ ပိုရလာပါသည်။ စိတ်အားထက်သန်မှုသည် လူတစ်ယောက်ကို ကြိုးကြိုးစားစား အလုပ်လုပ်စေပြီး ရည်မှန်းချက် ပြည့်မြောက်အောင် အထောက်အပံ့ကောင်း ပေးပါသည်။ စိတ်အားထက်သန်နေသူ တစ်ယောက်သည် ပျော်ရွှင်နေပြီး မိမိ လုပ်ကိုင်နေသည့် အလုပ်ကို နှစ်သက်နေကာ အကောင်းမြင်အတွေးများသာ တွေးလေ့ရှိပါသည်။

              အကောင်းမြင်တတ်သော စိတ်ဓာတ်ကလည်း အောင်မြင်မှု ရလဒ်ကို ရရှိဖို့ရန် အတွက် လိုအပ်ချက်တစ်ခုပင် ဖြစ်ပါသည်။ မကောင်းမြင် အပျက်သဘော စိတ်ဓာတ်များက မိမိ လုပ်နေသော အလုပ်ကို လမ်းတစ်ဝက်တွင် စွန့်လွှတ်လိုစိတ် ပေါ်စေကာ အလုပ်တစ်ခုကို မလုပ်ခင် အမြဲတမ်း အပျက်ကို တွေးတတ်သောကြောင့် ရလဒ်ကောင်း ရဖို့ရန် မလွယ်ကူပါ။ အောင်မြင်သူများတွင် အများနှင့် မတူသည့် အချက်က အကောင်းမြင် အပြုသဘော စိတ်ဓာတ်များ ရှိကြခြင်းပင် ဖြစ်သည်။ သူတို့သည် သူတို့ အလုပ်ကို အလွယ်တကူ စွန့်လွှတ်လေ့ မရှိပါ။ သူတို့ ၏ လမ်းဆုံး ရလဒ်နှင့် ပတ်သက်ပြီး အမြဲတမ်း အကောင်းမြင်လေ့ ရှိပါသည်။

              လူတစ်ယောက်ကို သူ ရည်မှန်းသည့်နေရာသို့ ရောက်အောင် တွန်းပို့ပစ်တင်ပေးမည့် အခြေခံအကျဆုံး အရာသည် စိတ်ဓာတ်စွမ်းအား၊ ထက်သန်မှုစွမ်းအားပင် ဖြစ်ပါသည်။ ကိစ္စတစ်ခု ဖြစ်မြောက် အောင်မြင်သွားချင်သည့် ဆန္ဒ ကြီးမား များပြားသလောက် လုပ်ရပ် စွမ်းဆောင်နိုင်မှု များများစားစား လုပ်နိုင်မည်သာ ဖြစ်သည်။ ဘယ်လောက် ခရီးဝေးဝေး၊ ဘယ်လောက် မြင့်မြင့်မားမား သူ သတ်မှတ်ထားသည့် ပန်းတိုင်ကို ရောက်အောင် သွားနိုင်မည်သာ ဖြစ်သည်။

              အလုပ်တစ်ခုကို ဖြစ်အောင် လုပ်မည်ဟု ပိုင်းဖြတ်ထားသည့် ခိုင်မာသော စိတ်ဓာတ်သာ ရှိပါက အခက်အခဲ အကျပ်အတည်း ဘေးဒုက္ခ ဘယ်လောက်ပင် များပါစေ အတားအဆီး ဟူသမျှ ဖြတ်ကျော်နိုင်မည်သာ ဖြစ်ပါသည်။ ဖြစ်ချင်သော စိတ်၊ လုပ်ချင်သော စိတ်သာ ရှိပါလျှင် ရှုံးနိမ့်မှု ဘယ်လောက်ပင် ကြုံရပါစေ၊ လက်မလျှော့ပဲ လဲကျရာက ပြန်ထကာ ပန်းတိုင် အရောက် သွားနိုင်မည်သာ ဖြစ်ပါသည်။

              လူတစ်ယောက်တွင် စိတ်ဓာတ်သည် အရေးကြီးဆုံးပင် ဖြစ်ပါသည်။ ဘဝ အောင်မြင်မှုအတွက် စိတ်ဓာတ်က အရေးပါသလိုပင် ဘဝ နေထိုင်မှု တွင်လည်း စိတ်ဓာတ်က အရေးကြီးပါသည်။ မိမိတစ်ယောက်တည်း ချမ်းသာ ပြည့်စုံ နေရုံနှင့် ကျေနပ်နေသည့် စိတ်ဓာတ်မျိုး မဟုတ်ပဲ အများကောင်းကျိုး စဉ်းစားတွေးတော ပေးတတ်သည့် စိတ်ဓာတ် ရှိပါမှလည်း မိမိပတ်ဝန်းကျင်နှင့် လောကတစ်ခွင်ကို အလှဆင်နိုင်မည် ဖြစ်သည်။ သူတစ်ပါးကို ကူညီလိုသည့် စိတ်ဓာတ်၊ စွန့်လွှတ် အနစ်နာ ခံလိုသည့် စိတ်ဓာတ်ရှိသူ များများစားစား ရှိပါမှလည်း လိုအပ်နေသူများကို ဖြည့်ဆည်းပေးနိုင်သည့် ရလဒ်ကောင်းများ များများစားစား ရလာနိုင်မည် ဖြစ်သည်။

              စိတ်ဓာတ်ကောင်း ရှိသူများကြောင့် လုပ်ရပ်ကောင်းများကို အောင်မြင် ပြီးမြောက်အောင် လုပ်ဆောင်နိုင်ကာ ရလဒ်ကောင်းများ ရရှိလာနိုင်မည် ဖြစ်ပါသည်။ စိတ်ဓာတ် မကောင်းသူများသည် အောင်မြင်မှုကို ကြာရှည် ထိန်းထားနိုင်မည် မဟုတ်ပါ။ စိတ်ဓာတ်ကောင်းမှသာ မိမိ တင်မက၊ မိမိ ပတ်ဝန်းကျင်၊ မိမိနိုင်ငံ နှင့် လောက တခွင်ကို အလှဆင်နိုင်မည့် ရလဒ်ကောင်းများကို ဖန်တီးနိုင်မည် ဖြစ်ပါသည်။

သိင်္ဂါကျော်

(မောင် တစ်ဝမ်းကွဲ လေးက သင်တန်းတစ်ခု ဝင်ခွင့် အတွက် ရေးခိုင်းလို့ ရေးပေးလိုက်တဲ့ စာစီစာကုံးလေးပါ။)